Jyr energııasy. Serik Aqsuńqarulynyń shyǵarmashylyq keshi ótti

Qazaqtyń «qasqyr aqyny». L.N.Gýmılev atyndaǵy Eýrazııa ulttyq ýnıversıtetinde Qazaqstannyń eńbek sińirgen ártisi Kenjeǵalı Myrjyqbaı jetekshilik etetin «Kəýsar» mádenı-tanymdyq birlestiginiń uıymdastyrýymen ótken aqyn Serik Aqsuńqarulynyń shyǵarmashylyq keshinde belgili satırık Kópen Ámirbek jyr jampozyn osylaı atady. Keshte fılologııa fakýl­tetiniń stýdentteri aqynnyń «Poezııa», «Izdeısiń be, sen meni», «Kenesarynyń basy», «Meniń munda menshigim joq», «Qasqyrdyń monology», «Aqqýlar-aı», «Qazaq», «Mahambettiń monology» atty otty jyrlaryn jatqa oqydy. Belgili sazger Esjan Ámi­rov aqynnyń birneshe óleń­derine án jazǵany málim. Osy keshte Qazaqstannyń eńbek sińirgen qaıratkeri Gúlmıra Sarına «Esil men Nura» jáne «Abyraly» ánderin tebirene oryndady. Daryndy ánshi Karına Karenınanyń oryndaýyndaǵy aqynnyń «Qyzyma» áni de kórermenniń kóńilinen shyqty. Ýnıversıtettiń jýrnalıstıka kafedrasynyń u­stazy Yqylas Ojaı Q.Aman­jolovtyń «О́zim týraly» ánin oryndady. Bul jaı emes, Serik Aqsuńqaruly daýylpaz aqyn Qasym Amanjolovty pirindeı asqaq tutady. Bir topyraq, bir rýh! Arqaly aqyn Serik Aqsuńqaruly óz óleńderin oqyǵan kezde zal siltideı tyna qalǵan. Kenet, jasyndaı jarqyldaǵan, almastaı jutynǵan rýhty jyrlar kókke otshashýdaı shashyldy. Áıgili «Qasqyrdyń monology», «Mahambettiń monology» óleńderiniń sońyn ala sııasy keppegen «Keıkiniń basy», «Qazaq», «Qara taspen syrlasý», «Qasıetti qalam» sııaqty jańa jyrlaryn oqyp, rýhymyzdy asqaqtatty. Endi bir sátte: «Orys ádebıetin úlgi tutamyn. Sergeı Esenın – eń jaqsy kóretin aqynym. Mundaı aqyn jer betinde joq!» – dep Sergeıge arnaǵan óleńin oqı jóneldi. Stýdentter kókeıdegi saýaldaryn qoıyp, aqynnyń tabanda qaıtarǵan tushymdy jaýabyna tánti boldy. Keıbir suraq-jaýap tusynda «Astanaǵa qaltalylardy ákele bermeı, ádebıet, má­denıet jáne óner adamdaryn jınaý kerek», «Ádebı syn joq. Sodan ádebıet betimen ketti», «Ádebıetke memleketten qamqorlyq kerek», «Álem adasty...bıylǵy «Nobel syılyǵyn» aqyn emes adamǵa berdi. Jalpy, túrki jurtyna ortaq ózimizdiń Nobel syılyǵymyz bolý kerek», dep ótkir oılaryn ortaǵa salyp, azamattyq únin irkip qalmady. Aqynnyń óz eline degen súıispenshiligi ár sózinen ańǵarylyp turdy. – Biz Eýropa jurtyna jaǵymsaqtanyp, barlyq dú­nıemizdi shet tilderine aýda­ryp tastaýǵa mindetti emespiz. О́ıtkeni, buǵan olar­dyń sózdik qory, áleýeti jetpeıdi. Men eń aldymen qazaq halqyma kerekpin! О́z halqyma qajet bolmasam, ózgege jaǵynýdyń keregi ne?! Sol Eýropa klassıkterin on orap alatyn aqyn-jazýshylar ózimizde de, shirkin-aı, kól-kósir ekenin keı paqyrlar qaıdan bilsin! – deıdi. Keshti Eýrazııa ulttyq ýnı­versıtetiniń Áleýmettik-mádenı damý jónindegi pro­rektory, alashtanýshy Dıhan Qamzabekuly qory­tyndylap, «Qaraǵandydaǵy búkil halyq­tyń tilegi, muń-muqtajy Se­rik Aqsuń­qarulynyń aý­zy­men sóıle­netindeı kó­rinedi», dep jyly lebizin bil­dirdi. Aqyn­­nyń keýdesine ýnı­ver­­­sıtettiń medalin taqty. Jaq­­­sylar men jaı­sańdar izgi tilekterin jetkizdi. Nebári 25 jasynda «Qas­­qyrdyń monologyn» jazyp, eldi ózine jalt qarat­qan aqyn poezııasynyń «azý tisi» bórili baıraqty babalarynyń azat jolymen asqaqtap keledi. Aqynnyń jyrlary otty ener­gııasymen áserlendirdi. Juldyz TOIBEK, Jýrnalıst