2000
*1 qańtarda Elbasy Nursultan Nazarbaevtyń Qazaqstan halqyna joldaǵan Jańa jyldyq kuttyqtaýy «Egemen Qazaqstan» gazetinde jarııalandy. Quttyqtaýda: «Eki myńynshy jyl ekonomıkamyzdyń órkendeý jyly bolmaq. Buǵan barlyq jaǵdaı bar. Búgingi kúni taıaý ýaqytta-aq árbir qazaqstandyq óz dastarqany men janqaltasy arqyly ekonomıkalyq órleýdiń jemisin aıqyn sezinedi dep nyq senimmen aıtýǵa bolady», dep jazyldy.
*25 qańtarda Prezıdent Nursultan Nazarbaev Máskeýde TMD memleketteri basshylarynyń sammıtine qatysty. Shara sheńberinde N.Nazarbaev jáne О́zbekstan basshysy I.Karımov halyqaralyq lańkestikke qarsy kúreste kúshterdi biriktirý qajettigi, birtutas úılestirýshi ortalyqtyń qurylýy týraly usynys jasady.
* 9 aqpanda Úkimettiń keńeıtilgen májilisi boldy. Májiliste sóz sóılegen Memleket basshysy Nursultan Nazarbaev 2000 jyldy qolaıly jaǵdaıda bastap otyrǵanymyzdy atap kórsetip, jańa Úkimettiń negizgi mindetteri retinde áleýmettik ahýaldy jaqsartýdy, basqarýdyń tıimdiligin arttyrýdy, óndiristik sektordy nesıemen qamtamasyz etýdi, ekonomıkanyń shıkizattyq baǵdaryn ózgertýdi, aımaqtardyń úılesimsizdigin eńserýdi atady.
*16 aqpanda Prezıdent Nursultan Nazarbaevqa «Ǵasyr sańlaǵy» medali tapsyryldy. Bul tańdaý elimizdiń mandaıaldy qaıratkerlerinen qurylǵan erikti qoǵamdyq keńestiń sheshimi boıynsha jasalǵan.
*24 aqpanda Elbasy Nursultan Nazarbaev Vena qalasynda Eýropadaǵy qaýipsizdik jáne yntymaqtastyq uıymynyń Bas hatshysy Iа.Kýbıshpen kezdesti. Munan keıin EQYU-nyń turaqty keńesiniń kezekti otyrysynda sóz sóıledi. Sapar kezinde Elbasy Avstrııanyń federaldyq prezıdenti Tomas Klestılmen áńgimelesti.
*10 naýryzda Prezıdent Jarlyǵymen Almaty oblysynyń Taldyqorǵan aýdany Eskeldi aýdany, Batys Qazaqstan oblysynyń Orda aýdany Bókeı aýdany bolyp qaıta ataldy. Birqatar aýdandardyń orys tilindegi transkrıpsııasy ózgerdi, endi Aqtóbe oblysyndaǵy Chelkarskıı raıon – Shalkarskıı raıon, gorod Chelkar – gorod Shalkar, Batys Qazaqstan oblysyndaǵy Djanybekskıı raıon – Janybekskıı raıon dep jazylatyn boldy.
*17 naýryzda Túrkistan qalasynda qazaqtyń uly hany Abylaıdyń súıegi arýlap qaıta qoıyldy.
*3 sáýirde Prezıdent Nursultan Nazarbaevtyń Izraıl memleketine resmı sapary bastaldy. Izraıl prezıdenti Ezer Veısmanmen áńgime barysynda ekijaqty qatynastardyń oıdaǵydaı damyp kele jatqany qanaǵattanǵandyqpen atap ótildi. E.Veısman óz kezeginde Nursultan Nazarbaevtyń osy aımaqtaǵy turaqtylyqqa járdemdesip otyrǵan syndarly saıasatyna joǵary baǵa berdi.
* 8-11 sáýir aralyǵynda Prezıdent N.Á.Nazarbaevtyń Ázerbaıjanǵa resmı sapary boldy. Elbasy sapar aıasynda Bakýde ótken túrkitildes memleketterdiń VI sammıtine qatysty. Sammıtte sóılegen sózinde Nursultan Nazarbaev halyqaralyq jaǵdaı memleketterdiń arasyndaǵy yntymaqtastyqty burynǵydan da tereńdete túsýdi talap etetinin atap kórsetti. Memleketter basshylary sammıt sońynda Baký deklarasııasyna qol qoıdy. Budan bólek, Prezıdent Nursultan Nazarbaev Prezıdent Geıdar Alıevpen kezdesti.
*15 sáýirde Elbasy Nursultan Nazarbaev Qazaqstanǵa jumys saparymen kelgen AQSh-tyń memlekettik hatshysy Madlen Olbraıtpen kezdesti. Áńgime barysynda qaýipsizdik, qarýdy taratpaý, energetıkalyq saladaǵy yntymaqtastyq, demokratııa men adam quqyǵy, ekonomıkalyq yntymaqtastyq máseleleri sóz boldy. Bul týraly «Egemen Qazaqstan» gazetiniń 18 sáýir kúngi nómirinde «AQSh Qazaqstandy Ortalyq Azııadaǵy basty áriptesi sanaıdy» taqyrybymen maqala jarııalandy.
* 19 sáýirde Elbasynyń qatysýymen qylmysqa jáne sybaılas jemqorlyqqa qarsy kúres máseleleri talqylanǵan jıyn ótti. Erteńinde, Prezıdent «Qylmysqa jáne sybaılas jemqorlyqqa qarsy kúres júıesin jetildirý sharalary týraly» Jarlyqqa qol qoıdy.
*20 sáýirde Tashkentte Qazaqstan, Qyrǵyzstan, Tájikstan jáne О́zbekstan prezıdentteri kezdesip, terrorızmge, dinı ekstremızmge, esirtki bıznesine, sondaı-aq, uıymdasqan qylmysqa qarsy kúres máselelerin talqylady. Prezıdent N.Á.Nazarbaev pen Prezıdent I.Karımovtyń kezdesýi barysynda ekijaqty saýda-ekonomıkalyq baılanys máseleleri talqylandy. Sondaı-aq, prezıdentter lańkestik, saıası jáne dinı ekstremızm, transulttyq uıymdasqan qylmys jáne de turaqtylyq pen qaýipsizdiktiń basqa da qaýipterimen kúresýde birlesken qımyldar týraly shartqa qol qoıdy.
* 26 sáýirde Almatyda «Eýrazııa-2000» ekonomıkalyq sammıti óz jumysyn bastady. Sammıttiń alǵashqy kúninde Qazaqstan Prezıdenti Nursultan Nazarbaev sóz sóıledi. «О́zgelerdiń tájirıbesinen úırenip, ony negizge ala otyryp, biz ózimizdiń tóltýma mádenıetimizdiń ereksheligine jaýap beretin óz jolymyzdy izdeıtin bolamyz», dedi Elbasy. Bul sharaǵa álemniń 37 elinen 500-deı saıası qaıratker, aldyńǵy qatarly kásipkerler jáne halyqaralyq sarapshylar qatysty. Memleketter basshylary eýrazııalyq aımaq damýynyń máselelerin, onyń múmkindikteri men qıyndyqtaryn, ınvestorlarǵa tartymdylyǵy men álemdik arenadaǵy rólin talqylady.
* 10-11 mamyrda Lıtva Respýblıkasynyń Prezıdenti V.Adamkýs Qazaqstanda memlekettik saparmen boldy. Lıtva basshysy Prezıdent N.Á.Nazarbaevtyń qabyldaýynda boldy. El basshylarynyń kelissózi barysynda memlekettik organdar kásipkerlerdiń tikeleı qarym-qatynastaryn damytýǵa barynsha qoldaý jasap otyrýǵa tıis degen ortaq uıǵarym tııanaqtaldy.
*16 mamyrda Prezıdent «Qazaqstan Respýblıkasynda nashaqorlyqqa jáne esirtki bıznesine qarsy kúrestiń 2001-2005 jyldarǵa arnalǵan strategııasy týraly» Jarlyqqa qol qoıdy.
* 23 mamyrda Mınskide Belarýs, Qazaqstan, Qyrǵyzstan, Reseı jáne Tájikstan memleketteri basshylarynyń sammıti ótti. Onda Keden odaǵyna qatysýshy memleketter basshylary ıntegrasııalyq úrdisterdiń odan ári damýynyń negizgi baǵyttaryn belgiledi.
* 2 maýsymda Qazaqstan Prezıdenti Nursultan Nazarbaev óziniń jastyq shaǵy ótken Dneprodzerjınsk qalasynyń 250 jyldyǵyna arnalǵan merekelik sharalarǵa qatysý úshin Ýkraınaǵa keldi. Qazaqstan Prezıdenti ózi oqyǵan №22 kásiptik-tehnıkalyq ýchılıshede, metallýrg mamandyǵynyń qyr-syryn alǵash meńgergen Dneprodzerjınsk metallýrgııa kombınatynda boldy.
