Halyqaralyq standarttarǵa qaraı batyl qadam

Qazaqstan Respýblıkasynyń Qarjy mınıstrligi Dúnıejúzilik ekonomıkalyq forýmnyń Jahandyq básekege qabilettiligi ındeksiniń reıtıngindegi pozısııasyn, onyń ishinde «Aýdıt jáne eseptilik standarttarynyń jetilgendigi» kórsetkishi boıynsha kóterýge nıettenýde. Ol úshin Qazaqstanda zańnamalyq deńgeıde uıymdardyń halyqaralyq qar­jylyq eseptilik standarttaryn qoldaný boıynsha mindetteri bekitilgen. Sondaı-aq, halyqaralyq standarttarǵa sáıkes aýdıt júrgiziledi jáne kásibı býhgalterlerdi sertıfıkattaý júıesi jumys isteıdi. Alaıda býhgalterlik esep jáne aý­dı­torlyq qyzmetti retteýdiń ulttyq júıesin halyqaralyq tájirıbe men aqparat almasýsyz damytý múmkin emes. Býhgalterlik esep, ony uıymdastyrýǵa jáne júrgizýge, bastapqy talaptardy ázirleýge, qarjylyq eseptilikti qurýǵa, aýdıtorlyq qyzmetti uıymdastyrýǵa, sondaı-aq, HQES (halyqaralyq qarjylyq eseptilik standarttary) jáne AHS-pen (aýdıttiń halyqaralyq standarttary) aýdıt pen ulttyq esep júıesin úılestirýge jáne jaqyndatýǵa qoıylatyn bastapqy talaptardy ázirleý máseleleri boıynsha  TMD-ǵa qatysýshy memleketterdiń is-áreketterin úılestirý maqsatynda TMD Atqarý komıteti janynan Úılestirý keńe­si quryldy. Qazaqstan Respýblıkasy Qarjy mınıs­tr­liginde 2016 jyldyń 18-19 qaza­nynda osy Úılestirý keńesiniń XIII otyrysy ótti. Otyrysqa ASSA retteýshi organdary­men qarym-qatynastardy damytý jó­nin­degi dırektory (Ulybrıtanııa, London q.) Shahrýh Alı Khan, sondaı-aq, TMD el­de­riniń, onyń ishinde, Ázerbaıjan, Belarýs, Qyrǵyz, Moldova, Reseı Federasııasynyń jáne О́zbekstannyń 7 ókili qatysty. Oty­rysqa qatysýshylar TMD-ǵa qatysýshy memleketterdegi býh­galterlik esep jáne aýdıtorlyq qyz­metti retteýdiń ulttyq júıe­sinde ózge­she­likterdiń bolýyna qara­mas­tan olardy damytýdaǵy basty baǵyt­tar HQES jáne AHS-pen úıles­tirýge sáıkes keletinin atap ótti. Bul TMD-ǵa qatysýshy memleket­ter­degi býhgalterlik esep jáne aýdıtorlyq qyz­met máselelerin retteıtin ýákiletti organ­dardyń Úılestirý keńesi sheńberindegi belsendi jáne tıimdi yntymaqtastyǵynyń arqasynda múmkin bolyp otyr. Qazirgi kezde Úılestirý keńesiniń kúsh-jigeri býhgalterlik esep salasyndaǵy maman­dardyń kásibı biliktiligine jáne TMD-ǵa qatysýshy memleketterde olardy sertı­fıkattaýdaǵy tásilderge qoıylatyn úlgi-ónegelik talaptaryn ázirleýge, aýdı­torlyq uıymdardy qadaǵalaýdy uıym­dastyrýǵa jáne júrgizýge usynymdamalar ázirleýge baǵyttalǵan. Otyrys kezinde býhgalterlik esep pen aýdıtorlyq qyzmetti retteý tıimdiligine, qarjy naryǵynyń jumys isteýin jetil­dirýge jaǵdaı jasaýǵa jáne TMD-ǵa qatysýshy memleketterdiń sharýashylyq júr­gizý sýbektileriniń qarjylyq aqpara­tynyń salystyrmalylyǵyn qamtamasyz etýge yqpal etetin ózekti máseleler tal­qy­landy. Dınara Bitikova, «Egemen Qazaqstan»