Jańaózendegi jarqyn joba

«Atameken» Ulttyq kásipkerler palatasy kásipkerlermen jumys júrgizýdi jańa beleske kóterýge bel baılap, bilek sybana  kiristi. «Jańaózenge – jańa serpin» Jańaózen qalasyna kelgen olar tyń jumysty aldymen munaıly qaladan bastamaq. Jańaózendegi kásipkerlik ortany damytý,  kásibin asham degender men ashyp, jumysyn alǵa bastyram degenderge buǵan deıin kezdesken kedergilerdi anyqtap, olardy joıýǵa jáne jolǵa qoıýǵa járdemdesý, túsinbeı júrgen máselelerine keńes berý, jalpy kásipkerlik ortanyń jumysyn jaqsartý, sondaı-aq, máselelerdi saraptaı kele Jańaózen kásipkerleriniń kartasyn jasaqtap, ony atqarýshy organdarmen birlesip, tez arada sheshimin tabýyna kómek berý – «Jańaózenge – jańa serpin» jobasynyń basty maqsaty. Jergilikti ákimdiktiń qoldaýymen júzege asyrylatyn, kásipkerlermen keshendi jumys júrgizýdi kózdegen  joba jumyspen qamtý aıasynda kásiptik-tehnıkalyq oqytý jáne qaıta daıarlaý máselelerin júzege asyrýdy da qarastyrǵan. Joba aıasynda Jańaózendegi shaǵyn jáne orta bıznes ókilderimen, óz isin jetik meńgergen tájirıbeli, áleýetti kásipkerlermen jáne jastarmen kezdesý úshin arnaıy jumys toby quryldy. On eki adamnan turatyn jumys toby quramynda Aqtóbe, Atyraý, Ońtústik Qazaqstan jáne Mańǵystaý oblystarynan kelgen sarapshylar, «Mańǵystaý» kásipkerlerge qyzmet kórsetý ortalyǵy basshysy, Astanadan arnaıy ókilder bar, olar ár salada, ıaǵnı kásipkerlikti ashý, júrgizý, tenderlerge qatysý, satyp alý, bıznesti júrgizýde ınfraqurylym qoljetimdiligi, sot isterin qaraý, onyń ishinde kásipkerlerdiń quqyqtary men múddelerin qorǵaı bilýi, kedendik retteý, salyq salý, jumyspen qamtý jóninde kásiptik-tehnıkalyq oqytý, qaıta daıarlaý máseleleri boıynsha  kásipkerlerge  keńes berip, kúrmeýin tappaǵan máselelerin birge sheshýge kómek beretin bolady. Bir aıǵa jýyq Jańaózen qalasynda turaqtaıtyn jumys toby kelýshilerdi qabyldap, olarmen qolaıly jumys júrgizý úshin arnaıy jumys bólmelerimen qamtyldy. Baǵdarlama aıasynda «atamekendikter» jańaózendik kásipkerlerge keńes berýmen qatar, «Bastaý bıznes» mektebin iske qosý boıynsha ózin-ózi qamtyǵan kásipkerler men isin jańa bastaǵan  tulǵalardyń kásipkerlik belsendiligin arttyrý úshin oqytý, sondaı-aq, arnaıy konsýltasııalyq ortalyq uıymdastyrý arqyly bastaýshy jáne jumys istep turǵan kásipkerlerge barlyq sharalar boıynsha qarjylyq jáne qarjylyq emes qoldaý kórsetý máseleleri qamtylsa, «Bastaý kásip» jobasy aıasynda jumysshy kásipter boıynsha jumyssyzdardy oqytý, ásirese jastardy oqytý máselesi júzege asyrylady, ıaǵnı mektepten soń joǵary oqý ornyna túse almaı qalǵan jastardyń belgili bir kásipke mashyqtanyp, jumys ornyn tabýyna at salysady. «Bir tereze» qaǵıdasy boıynsha kásipkerlerge servıstik front-ofıs uıymdastyrý arqyly barlyq memlekettik organdardyń, damý ınstıtýttarynyń qyzmetterin qoljetimdi etý, memlekettik qoldaý sharalary boıynsha turǵyndarǵa kóshpeli prezentasııalar ótkizý, «Atameken Servıses» mobıldi qosymshasynyń múmkindikterin jańaózendik kásip­ker­lerge tanystyrý syndy 30-dan astam is-sharany josparlaǵan. Jańaózen qalasynda ótken jobany iske qosý jıynynda sóz alǵan «Atameken» UKP basqarma tóraǵasy A.Myrzahmetov «Jańaózenge – jańa serpin» jobasynyń maqsaty men júzege asyrylýy, aldyna qoıǵan mindetteri týraly jan-jaqty baıandady. Jańaózendegi jumys toby arqyly kásipkerlermen jasalyp jatqan jumystardyń kúndelikti qadaǵalanyp otyratyndyǵyn jetkizgen ol, kásipkerlerdiń ózderin tolǵandyryp júrgen máseleler boıynsha jaýap alýlaryna keń múmkindik ashylǵandyǵyn jetkizdi. Mańǵystaý oblysy ákiminiń orynbasary R.Ámirjanov joba jumysyna sáttilik tilese, Jańaózen qalasynyń ákimi E.Ábilov «Atameken» UKP qolǵa alǵan Jańaózendegi jobanyń nátıjeli bolatyndyǵyna senim bildirip, atalmysh jumystarǵa ákimdik tarapynan qajetti qoldaý kórsetiletinin jetkizdi. – 2016 jyldyń 9 aıynda jumys­syz­dyqqa 4137 adam tirkelip, onyń  2601-i jumyspen qamtyldy. 2013-2016 jyldar aralyǵynda isin jańadan bastaǵan 20 kásipkerge 57,1 mln teńge kóle­minde memlekettik grant berildi,  82 kásipkerlik jobalardyń paıyzdyq mólsherlemesin sýbsıdııalaýǵa 160,4 mln teńge, kásipkerlikti damytýǵa járdemdesý boıynsha 56 kásipkerge 165,7 mln teńge kóleminde 6 paıyzdyq shaǵyn nesıe berildi. Nátıjesinde qalamyzda jańadan «Jańaózen» oıyn-saýyq ortalyǵy, «Zıba» oıyn-saýyq kesheni, «О́zen» saýda ortalyǵy, «Zańǵar» saýda ortalyǵy, eki qabatty dárihana, «Astana» kólik jýý ortalyǵy, Rahat aýylynda kólik jýý ortalyǵy, «Shapaǵat-2012» bıznes ortalyǵy jáne basqa da  iri nysandar boı kóterip, 577 jańa jumys oryndary ashyldy. Jańaózen qalasynyń óndiristik aımaǵynan ónim óndirýshi kásipkerlerdi bir jerge shoǵyrlandyrý maqsatynda, jalpy aýdany 30 gektar quraıtyn jer telimi bólinip, óndiristik alań quryldy. Búgingi tańda ónim óndirýshi 6 shaǵyn sýbektige alańnan jer telimderi berilip, 3 jeke kásipker dárethana qaǵazyn óndiretin jáne plastmassa qaldyqtardan qurylys materıaldaryn óndiretin sehtarynyń qurylys jumystaryn bas­tady. Aldaǵy ýaqytta, 30 ónim óndirýshi kásipkerdi ornalastyrý, jumyspen qamtý ortalyǵynan 300-ge jýyq jumyssyz turǵyndardy jumyspen qamtý josparlanýda, dedi Jańaózen qalasynyń ákimi. Jańaózende qazirgi tańda shaǵyn jáne orta bıznespen aınalysatyn kásipkerler sany 7 958 adam bolsa, onyń 6510-y jeke kásipkerler. Jeke kásipkerler kóterme jáne bólshek saýda salasynda, kólik jóndeý, kólik jáne qoıma baǵyty, aýyl, orman, balyq sharýashylyǵy, sondaı-aq, qarjy jáne saqtandyrý qyzmeti, taý-ken ónerkásibi, sýmen jabdyqtaý, elektr júrgizý, gaz tartý sekildi qyzmet túrlerin kórsetýmen aınalysady. Jańaózen – jas qala. Sebebi,  Teńge, Rahat, Qyzylsaı eldi mekenderin qosa alǵanda, qalada 14-29 jas aralyǵyndaǵy 38 myńnan astam jas turady. Osynsha jastardyń 272-i jeke kásipkerlikpen aınalyssa, 1550-i jumyssyz eken. Barlyq jannyń munaı salasyna jumysqa turýy múmkin de, mindetti de emes. Osyndaıda asyl dinimizge qatysty bir támsil eske túsedi. Alla árbir pendeni jaryq dúnıege jibergende, eki ýysyna toltyryp tirliginde terer yrys-nesibesin ustatyp jiberedi eken. Ana qursaǵynan shyqqan sábı qos qolyn ashyp, bolashaq yrys-nesibesin shashyp jiberip, keıin ómiriniń sońyna deıin sony ǵana terýmen ótedi eken. Demek,  munaı alańynan dám terý buıyrmaǵan jan óz násibin basqa kásip tóńireginen izdegeni jón. «Atameken» UKP qolǵa alǵan bastama jumys kózin izdegen talaı jastyń armanyna jol ashady dep oılaımyz. Gúlaıym ShYNTEMIRQYZY, «Egemen Qazaqstan» Mańǵystaý oblysy