Memlekettik qyzmettiń mártebesi bıik

Keshe Prezıdent janyndaǵy Ortalyq kommýnıkasııalar qyzmetinde «100 naqty qadam» Ult josparynyń «Memlekettik kásibı apparat qurý» jónindegi birinshi baǵytyn júzege asyrý isine qatysty brıfıng ótti. Brıfıngke Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymova, osy qurylymnyń quzyryndaǵy Memlekettik qyzmet departamenti bastyǵynyń mindetin atqarýshy Jarqyn Tileýkenov, Prezıdent janyndaǵy Memlekettik basqarý akademııasynyń rektory Fatıma Jaqypova jáne Nazarbaev Ýnıversıtettiń professory Kolın Noks qatysty. Birinshi kezekte sóz alǵan Aıgúl Shaıymova Ult josparynyń «Memlekettik kásibı apparat qurý» baǵytyna qatysty 15 qadamnyń 11-i osy ýaqytqa deıin júzege asyrylǵanyn atap ótti. Onyń sózine qaraǵanda, bıyldan bastap elimizde merıtokratııa qaǵıdalary men ashyq konkýrs arqyly irikteý negizinde memlekettik qyzmettiń mansaptyq modeli jumys isteı bastaǵan. Bul óz kezeginde aýystyrý arqyly konkýrs­tan tys taǵaıyndaýlardy 25 ese (5300-den 226-ǵa deıin) qysqartýǵa múmkindik bergen. Endi qyzmetshiler joǵary laýazymdy qyzmetterge konkýrs arqyly jáne tómengi satyda ju­mys tájirıbesi bolǵan jaǵdaıda ǵana taǵaı­yndala alady. Osy tásil arqyly bıyl 3 myńnan astam adam qyzmetke ornalasqan. Bul – byltyrǵy jylǵy kórsetkishpen salystyrǵanda 3 esege artyq. Odan ári spıker jyl basynan beri memlekettik qyzmettiń bastapqy satysynda 5 215 azamat (ortalyq memlekettik organdarda – 1984, jergilikti atqarýshy organdarda – 3231) jumysqa kiriskenin, osy jyly memlekettik qyzmetke ártúrli salalardan úsh satyly irikteý júıesinen ótken 1392 adam qabyldanǵanyn sóz etti. Sonymen birge, A.Shaıymova irikteý júıesi zańnamany bilýge arnalǵan testileýdi, jeke qasıetterin baǵalaýdy jáne konkýrs jarııalaǵan memlekettik organda áńgimelesýden ótýdi qamtıtynyn jetkizdi. Buǵan qosa, jıynda bıyl zańnamalardy bilý baǵytyndaǵy testi 38 myńǵa jýyq adam tapsyryp, olardyń 46 paıyzy oń qorytyndy alǵany, bul kórsetkish ótken jylǵa qaraǵanda 12 paıyzǵa joǵary bolǵany aıtyldy. Al jeke qasıetterin baǵalaý boıynsha synaqtan 20 myń adam ótken. Sondaı-aq, konkýrs jarııalaǵan memlekettik organdarda 18,5 myń adam áńgimelesýge shaqyrylyp, olardyń ishindegi 12 myńy synnan súrinbegen. Spıkerdiń aıtýy boıynsha, birinshi ret túsken jáne irikteýden sátti ótken adamdar úshin tálimgerdiń bekitilýimen jáne beıimdelý josparynyń qurylýymen 3 aı synaq merzimi belgilengen. Osy jyly mundaı synaqtan 2 273 adam ótken kórinedi. Bulardan bólek, A.Shaıymova osy jyly birinshi ret «B» korpýsynyń qyzmetshilerine aralyq baǵalaý ótki­zil­genin jetkizdi. Onyń aıtýynsha, bul aralyq baǵalaýǵa 64,5 myń memlekettik qyzmetshi qatysqan. Munyń qorytyndysy boıynsha olardyń 10,8 paıyzy «óte jaqsy», 63,2 paıyzy «tıimdi», 26 pa­ıyzy «qanaǵattanarlyq», 0,01 paıyzy «qanaǵattanarlyqsyz» degen baǵa alǵan. Al «A» korpýsynyń qyzmetshilerin baǵalaý aldaǵy jeltoqsanda ótpek. Jalpy, mundaı baǵalaýlar memlekettik qyzmetshilerdi materıaldyq turǵyda yntalandyrýǵa tikeleı áser etedi dep josparlanǵan. Brıfıngte sóz sóılegen Jarqyn Tileýkenov, Fatıma Jaqypova jáne Kolın Noks óz kezekterinde Elbasy Nursultan Nazarbaev usynǵan «100 naqty qadam» Ult josparynyń mańyzdylyǵy, onyń memleketimizdi damytýdaǵy róli jóninde áńgime órbitti. Joldybaı BAZAR, «Egemen Qazaqstan»