Parlamentaralyq únqatysýdy nyǵaıtý - Qazaqstan men Fınlıandııa arasyndaǵy jan-jaqty yntymaqtastyq pen ózara senimniń jáne halyqaralyq dıplomatııanyń mańyzdy bóligi. Bul týraly Májilis Tóraǵasy Nurlan Nyǵmatýlın Fınlıandııa Respýblıkasyna resmı sapary barysynda málimdedi.
Helsınkı qalasynda qazaqstandyq májilismender Fınlıandııa Parlamentiniń Spıkeri Marııa Lohelamen kelissózder júrgizip, saýda-ekonomıkalyq yntymaqtastyq jónindegi qazaqstandyq-fındik parlamentaralyq komıssııa jetekshilerimen kezdesip, «Otanıemı» tehnoparkine bardy, dep habarlaıdy QR Parlamenti Májilisi Apparatynyń baspasóz qyzmetinen.
N. Nyǵmatýlınniń aıtýynsha, Elbasy Nursultan Nazarbaevtyń eń damyǵan 30 eldiń qataryna kirý jolyndaǵy aýqymdy reformalaryn júzege asyrý baǵytynda fınlıandyq áriptesterdiń ınnovasııalyq damýdy zańnamalyq qamtamasyz etý, bilim salasyn jetildirý, aqparattyq-kommýnıkasııalyq tehnologııany damytý, ǵylymı jáne isker ortamen yqpaldastyq salasyndaǵy tájirıbeleri óte mańyzdy.
M. Lohelamen áńgime barysynda Májilis Spıkeri ekijaqty qarym-qatynasty turaqty nyǵaıtý jolyndaǵy ózara baılanys óte joǵary deńgeıde qarqyn alyp kele jatqanyn atap ótti.
M. Lohela óz kezeginde qos memlekettiń áriptestigin joǵary baǵalaı kele, parlamenttik komıtetter arqyly yqpaldastyqty arttyra túsýge yntalylyq bildirdi.
Májilis Tóraǵasy halyqaralyq parlamenttik uıymdar aıasynda kún tártibindegi ózekti máselelerdiń sheshimin tabý jolynda da kúsh-jigerdi úılestirýge daıyn ekendigin bildirdi.
Qazaqstan Táýelsizdiginiń 25 jyldyǵy jáne keler jyly Fınlıandııa táýelsizdiginiń 100 jyldyǵy, sonymen birge, dıplomatııalyq qatynas ornaǵanyna 25 jyl tolatyn ataýly kúnderdi alǵa tartqan Májilis Tóraǵasy áriptesin bizdiń elimizge resmı saparmen kelýge shaqyrdy.
