Rýdnyıda terakt týraly jalǵan aqparat taratýshy eki jylǵa sottaldy

Ústimizdegi jyldyń 5 qyrkúıeginde Rýdnyı qalasynyń  Lenın kóshesindegi  9 qabatty úıdiń turǵyndaryn túgeldeı syrtqa kóshirýge týra keldi. Bireý 1 qyrkúıekte 9 qabatty úıdiń lıftine qara markermen 5 qyrkúıekte osy úıde bomba jarylatyny týraly jazyp ketken.  Ábden zárezap bolǵan turǵyndar «bomba» degen sózden  qorqyp, polısııaǵa habarlaıdy.   Arnaıy qyzmettiń mamandary «jarylǵysh zatty» ábden izdep bolyp, birjaqty sheshim aıtqanǵa deıin jurt dúrligip, eki kún boıy úıine kire almaı júrdi. Olardy týystarynyń úıine, mektepke,  qonaq úılerge ornalastyrdy. Jarylǵysh zat aqyry tabylǵan joq, esesine  jurtty  osynsha dúrliktirgen kúdikti anyqtalyp, ustaldy. Ol 23 jastaǵy Erlan Aqmurzaev degen azamat bolyp shyqty.  Rýdnyı qalalyq soty terrorlyq akt týraly jalǵan laqap taratqan  oǵan  úkim shyǵaryp, eki jylǵa bas bostandyǵynan aıyrdy. Aıypty jazasyn jalpy rejımdegi kolonııada óteıtin boldy. Munyń syrtynda ol «bombany» izdegen shyǵyndy jabý úshin keminde 3 mıllıon teńgeni de óteýi kerek. Aıta keteıik, ádette, QR Qylmystyq kodeksi boıynsha terrorlyq akt jóninde jalǵan aqparat taratqany úshin 6 jylǵa deıin beriledi. Bul joly  prokýror  men kúdiktiniń arasynda qorǵaýshylarynyń qatysýymen   sotqa deıingi  prosessýaldyq kelisim boldy. Kóp balaly, tártipti otbasynda tárbıelengen Aqmurzaevtyń eshqandaı radıkaldyq toptarmen qatysy joqtyǵy anyqtaldy. Onyń advokatynyń aıtýynsha, 9 qabatty úıdiń podezi, lıftisi óte las, ol úıdiń 7- qabatynda turatyn apasynyń úıine kóterilgende lıftini bireýler dárethana retinde paıdalanǵanyn kóredi.  Oǵan shydamaǵan Aqmurzaev óziniń  yzasyn osylaı kórsetipti. Teginde oılap sóılemegen osylaı ot basary anyq. Názıra Járimbetova Sýretti túsirgen Sergeı Mıronov