Ortalyq kommýnıkasııalar qyzmetinde Qazaqstan Respýblıkasynyń ulttyq brendin anyqtaý jónindegi baıqaýdyń aralyq nátıjelerine jáne ótý barysyna arnalǵan brıfıng ótti. Oǵan Aqparat jáne kommýnıkasııalar mınıstri Dáýren Abaev jáne Syrtqy ister mınıstriniń orynbasary Roman Vasılenko qatysty.
Baıqaýdy uıymdastyrýshylar ashyq baıqaý arqyly elimizdiń ulttyq brendin qalyptastyrý boıynsha eń úzdik usynysty anyqtaýdy kózdep otyr. Osy maqsatta 2016 jyldyń 31 tamyzynan 15 qazanǵa deıin ótinishter qabyldandy. Búginge deıin 966 ótinim kelip tústi. Solardyń 794-i ekinshi kezeńge jiberiledi. Al 172 jumys ereje talaptaryna saı bolmaǵandyqtan, kelesi kezeńge ótken joq.
«Qazirgi tańda kez kelgen memleket eldiń ımıdjine nazar aýdarady. О́ıtkeni, bul ınvestısııa jáne týrıster tartýdyń birden-bir joly. Árıne, ulttyq brendke eń aldymen, sol memlekettiń shynaıy jetistikteri negiz bolýy kerek ekenin jaqsy túsinemiz. Ol halyqtyń bilim deńgeıi, ekonomıkalyq damýy, mádenı-rýhanı saladaǵy kórsetkishter, sonymen qatar, eldiń ımıdjin ilgeriletý úshin bir kórgennen este qalatyn aıryqsha sımvolıka qajet. Qazaqstannyń ulttyq brendin jarııalaýdaǵy basty maqsat – osy. Eń basty talap – logotıp Qazaqstannyń barlyq ereksheligin qamtıtyn, jeńil qabyldanatyn ári tartymdy bolýy kerek. Ulttyq brend degenimiz – tutas eldiń beınesi» dedi Dáýren Abaev. Onyń aıtýynsha, baıqaý barynsha ashyq júrip jatyr. Osyǵan sáıkes, oǵan kez kelgen adam mamandyǵyna, zańdy mártebesine, jasy men azamattyǵyna qaramastan qatysa alady.
Syrtqy ister mınıstriniń orynbasary Roman Vasılenko ulttyq brendti anyqtaýǵa arnalǵan baıqaýǵa kóptegen usynys kelip túskenin atap ótti. Bul aqparattandyrýdyń joǵary deńgeıde uıymdastyrylǵanyn jáne azamattardyń aıryqsha qyzyǵýshylyǵyn baıqatady. Árıne, logotıp daıyndaý barlyq máseleni sheshpeıdi. Sebebi, ulttyq brendti qalyptastyrý - kún tártibindegi ózekti máselelerdiń biri. Syrt kózge ózimiz týraly jaǵymdy ári jaqsy pikir qalyptastyrý, ony ornyqtyrý – barlyq qazaqstandyqtyń mindeti. Sondyqtan, el turǵyndary ózi qyzmet etip júrgen salada aıanbaı eńbek etýleri kerek. Bizdiń árqaısymyzdy Qazaqstannyń azamaty retinde qabyldaıtyny belgili. Al bul bizden ashyqtyqty eńbekqorlyqty, shynaıylyqty talap etedi. Jolymyz, ónimimiz, qyzmet kórsetýimiz, ınfraqurylymdaramyzdyń sapasy, tartymdylyǵy – bulardyń barlyǵy el ımıdjin qalyptastyrýshy tetikter. Eger, memleketimiz álemge paıdaly bolatyn bastamalar kóterip, olardy júzege asyrsa, onda bizdiń sheteldegi ımıdjimiz de tartymdy bola túspek»,– dedi Roman Vasılenko.
Onyń aıtýynsha, bul baǵytta aýqymdy jumystar júrgizilgen. Bul rette ol Aýǵanstandy mysalǵa keltirdi. «Qazaqstan ondaǵan jyldar boıy kúrdeli kezeńdi basynan ótkerip otyrǵan Aýǵanstanǵa qoldaý-kómek kórsetip keledi. Jalpy, Ortalyq Azııanyń turaqty damýy jolyndaǵy ıgi ister – árdaıym nazarymyzda. Memleket basshysy Túrkııa men Reseı arasyndaǵy jaǵdaıdy qalpyna keltirýge de úles qosty. Elimiz ıadrolyq qarýsyzdaný salasynda kóshbasshylyq tanytýda. Mine, bizdiń osyndaı is-árektterimiz sózsiz, halyqaralyq qaýymdastyq tarapynan baǵalanady», – dedi Syrtqy ister mınıstriniń orynbasary.
Sonymenı qatar, ol árbir memlekettiń aldynda ulttyq brend máselesi óte ótkir turatynyn atap ótti. «Ol qansha jaǵynan tanymal bolsa da. Sebebi, ınvestısııalyq, týrıstik tartymdylyq jóninen elder arasynda báseke týatyny sózsiz. Búginde ár el bul máseleni ártúrli jolmen sheshýge tyrysýda. Bireý óz eliniń jalpy «tabıǵatyn» aıqyndaıtyn logotıp oılap taýyp jatady. Endi bir el týrıstik brendke aıryqsha mán beredi. Árıne, bul jumystardy baǵalaý ońaıǵa túspeıdi. Alaıda, jańa zaman aǵymyna ilesý úshin bul maqsattaǵy jumystardy jalǵastyra berý kerek»– dedi vıse-mınıstr.
Brıfıng barysynda baıqaýǵa jumsalatyn qarjy qorynyń shamamen 8 mıllıonnyń mólsherinde bolatyny aıtyldy. Onyń 5 mıllıony jeńimpazǵa beriledi, baıqaýdyń ekinshi kezeńine ótken qatysýshylar 200 myń teńge mólsherindegi aqshalaı syıaqymen yntalandyrylady. Qarajattyń qalǵan bóligi uıymdastyrýshylyq sharalarǵa bólinedi. Baıqaýdy qarjymen qamtamasyz etýdi uıymdastyrýshy retinde «Kazkontent» AQ óz moınyna alǵan.
Eger, logotıp óte erekshe ári tartymdy bolsa, aldaǵy ýaqytta ony Qazaqstanda óndiriletin taýarlarǵa da qoldaný kózdelip otyr.
Láıla Edilqyzy
Sýretti túsirgen Orynbaı Balmurat
