Kim myqty ekenin sharshy alań sheshedi - Qanat Islam

Búgin Almaty qalasynda qazaqstandyq kásipqoı boksshy Qanat Islam men ganalyq Patrık Alloteı arasyndaǵy jekpe-jekke arnaıy baspasóz-máslıhaty ótti. Birinshi bolyp tilshilerdiń suraqtaryna Patrık Alloteı jaýap berdi. - Barlyqtaryńyzǵa rahmet. Almatyny aralap úlgermedim áli. Munda men tek jeńis úshin keldim. Qarsylasymdy qurmetteımin. Alaıda ol men sııaqty myqty boksshymen áli judyryqtasqan joq. Árıne, Qanattyń talaı kezdesýlerin zerttedim. Onyń Olımpıadaǵa qatysqanyn bilemin. Islam – myqty boksshy. Biraq onyń burynǵy kezdesýleri maǵan mańyzdy emes, sebebi men - basqa qarsylaspyn. Keıin bul kezdesýdiń bas uıymdastyrýshysy Baýyrjan Ospanov Islam – Alloteı jekpe-jegine qatysty óz pikirin aıtty. - Aıta keter jaıt, bul kezdesýde amerıkalyq qazylar qyzmet etedi. Sondaı-aq, «rıng-anonsshy» da amerıkalyq bolady. Endi jekpe-jekke qatysty aıtatyn bolsam, Alloteı ózine senimdi jigit. Ol Almatyǵa jeńilý úshin kelgen joq. Qanat bolsa kásipqoı ne áýesqoı boks bolsyn, birde-bir ret nokdaýnda bolmaǵan. Qazirgi tańda, Islam-Alloteı jekpe-jegine 8000 myń bılet satyldy. Jalpy «Almaty Arena» 14 myń jankúıer syıady. Sondyqtan, bılet alýlaryńyz áli de múmkin. Qanattyń suraýy boıynsha bılet baǵasyn qoljetimdi ettik, shamamen 1000-10000 teńge aralyǵynda. Artynsha, Qanat Islam óziniń qarsylasy týraly pikirin bildirdi. - Patrık – óte myqty boksshy. Men ony qurmetteımin. Onyń nokaýtpen jeńisteri meniń jalpy kásipqoı boksta ótkizgen kezdesýlerimnen kóp. Ne bolsa da, kim myqty ekenin sharshy alań sheshedi. Birneshe aı boıy osy jekpe-jekke daıyndaldym. О́z jankúıerler aldymda bar kúshimdi salamyn. Boksta bir soqqy match taǵdyryn sheshýi múmkin, sondyqtan óte saq bolý qajet. Bul kezdesý men úshin úlken synaq, úlken jaýapkershilik. Allaǵa shúkir, Alloteıge qarsy jekpe-jekke daıyndyǵym jaqsy ótti. Ary qaraı Qanattyń bas bapkeri Nelson Lopeske sóz berildi. - Negizi, Islamnyń kelesi jekpe-jegi AQSh-ta ótýi kerek bolǵan, biraq biz kóp oılanyp, bul kezdesý onyń týǵan jerinde, Almaty qalasynda ótkizýdi jón kórdik. Alloteıge qarsy kezdesýge óte muqııat daıyndaldyq. Ol óte qaýipti boksshy. Onyń birtalaı kezdesýlerin tamashaladyq. Qanat egerde aldaǵy kezdesýinde jeńiske jetse, oǵan úlken múmkindikter ashylady. Qanat qazirgi tańda WBC tujyrymy boıynsha reıtıngte 4-shi orynda tur, ıaǵnı ol jeńiske jetse, chempıondyqqa talasýy ábden múmkin. Qanattyń chempıondyq jekpe-jegin amerıkalyq «Showtime» arnasy kórsetýge daıyn. Esterińizge sala ketsek, Islam men Alloteı qarasyndaǵy jekpe-jek qazannyń 29-y, «Almaty Arena» sport kesheninde ótedi.