Tórt basylymdy tórge shyǵarǵan

Aı saıyn bir nómirdi bir nómirge jalǵap, salalyq basylymdardyń qataryn tolyqtyryp, jýrnaldaryn toqtaýsyz shyǵaryp kele jatqan jýrnalıst Gúljanat Qustanova jaqynda Almatyda óz isiniń 10 jyl­dyǵyn atap ótti. «Mekteptegi psıhologııa. Psıhologııa v shkole», «Bilim kilti – Klıých znanıı», «Peda­gog», «Mekteptegi merekeler» sekildi tórt birdeı jýrnaldy shyǵaryp otyrǵan bas redaktor Gúljanat Qustanova­nyń eńbegin jankeshtilik dep baǵalasaq ta artyq emes. Osy aıda jýrnaldyń 100-nómirin jaryqqa shyǵarǵan Gúl­ja­nat Shaımerdenqyzy on jyl boıǵy qıyn da jaýapty eńbegine esep berip, násip bolyp otyrǵan kásibi­niń qýanyshyn ustazdar qaýymymen, ózine demeý, súıenish bolyp kele jatqan janashyrlarymen birge atap ótýde. QazMÝ-dy 1982 jyly jýr­nalıstıka mamandyǵy boı­ynsha támamdap, biraz jyl Qazaq radıosynda qyzmet etken Gúljanat Qustanovanyń esimi tyń­dar­manǵa da, oqyrmanǵa da jaqsy tanys. Muǵalimderdi kezekti attestattaýdan ótkizý kezinde olarǵa pedagogıkalyq qyz­metin, bilim-biligin keń­i-­­­ nen kór­setetin mindetti ma­qala shyǵarý tala­by qoıylady. Jýrnaldy ja­ryqqa shy­ǵarýdaǵy maq­sat ta sol, mektepterge ar­nalǵan ádistemelik maqa­la­lar ázirleý, bilimge baıla­nysty ǵalymdardyń, mu­ǵalimderdiń, ata-analardyń oı-pikirlerin jarııalaýǵa múmkindik jasaý bolatyn. Qoǵamdaǵy suranystyń ózi túrtki bolyp dúnıege kelgen basylymdar on jyl boıy osy maqsat údesinen shyǵyp keledi. Mamandyǵy jýrnalıst bolǵan­dyq­tan, bilim men ustazǵa arnalǵan basylymdardy shyǵarý Gúljanat Qus­tanovaǵa qıyndyq tý­dyrmady. Psıhologııaǵa baılanysty jýrnaldy jaryqqa shyǵarý týraly oıyn aıtyp, keńes surap bar­ǵan­da, osy saladaǵy bi­li­k­ti ǵalym, psıhologııa ǵy­lym­darynyń doktory, profes­sor Qubyǵul Jaryq­ba­ev aǵynan jaryla batasyn berip, qýana quptaǵan eken. Alǵashqy nómirinen bas­tap kúni búginge deıin aı­týly ǵalym árbir sannyń maz­mundy da maǵynaly bolýyn qadaǵalap, jan-jaqty baǵdar berýde kó­megin aıamaı keledi. Elimiz­de psıhologııa ǵylym re­tinde kenje qalyp, endi damı bastasa, Reseı men Ýkraınada tek bul salaǵa baı­lanysty 200-ge tarta basylym jaryq kóredi. Orny ol­qy tartyp turǵan osy ǵy­lym­ǵa arnap «Mekteptegi psı­hologııa» jýrnalyn shy­ǵa­ra bastaǵanda, oǵan qyzyǵýshylyq tanytqandar da kóp bolǵan. Osy oraıda bul basylymdar respýblıka mektepterinde eńbek etip júr­gen myńdaǵan psıholog-pe­dag­ogqa on jyl ishinde aı­tar­lyqtaı kómegin tı­gi­zip, psıhologııalyq saýat­ty­lyǵyn arttyrýda óz úlesin qosty dep senimmen aıtýǵa bolady. Qazir bul jýrnaldy psıhologııa mamandyǵy bo­ıynsha magıstratýralyq bilim alyp, ǵylymı izdenis­terge boı uryp júrgen ózi­niń qyzy Aqnur Oljaeva shyǵaryp, anasynyń isin jalǵastyra bastady. Sol sekildi, G.Qustanova «Mektep­te­gi merekeler» jýr­nalynyń da basy-qasynda aqyn Ádibaı Tabyldıevtiń turǵanyn maqtanyshpen aıtady. Mek­teptegi túrli is-sharalardyń ssenarıı­leri taqyryptar boıynsha dáıek­telip, júıeli túrde jarııalanyp otyrady. О́zderi de mekteptermen baılanysyn ny­ǵaıtyp, túrli taqyrypta ótetin dóń­gelek ústelderge, dıspýttarǵa qaty­syp, kesh qonaǵy bolyp, ishindegi qyzyq­ty­syn tańdap-talǵap jarııalap júr. «Bilim kilti – Klıých znanıı» jýrnaly eki tilde shyǵady. Sońǵy ýaqytta aǵylshyn tilindegi sabaq­tardy da jarııalaı bastady. Basylymdy shyǵarý isinde «О́rleý» biliktilikti arttyrý ulttyq ortalyǵynyń basqarma tóraıymy Gúlnas Ahmetovanyń qoldaý-kó­me­gine júginetinin jasyrmaıdy. Sondaı-aq, «Pedagog» at­­ty sándi jýrnal da ómirin ustaz­dyqqa ar­naǵan, balaǵa bilim berip qana qoımaı, tár­bıesi úshin de ózin jaýap­ty sanaǵan janashyr jan­dar­dyń izgi qasıetin, shá­kirt júregine jol tapqan erekshe minezin, eskirmeıtin-tozbaıtyn tájirıbesin úlgi etip, egjeı-tegjeıli kór­setýdi maqsat tutady. Ár jobanyń jemisti kezeńi bolady. Jýr­na­­lı­stı­ka deı­tin oı-shuqy­ry kóp erekshe álem­niń ishi­­nen eńbekqorlyǵynyń arqa­syn­da bilim taqyrybyn bó­lip-jaryp alyp shy­ǵyp, bız­neske aınaldyra alǵan Gúl­­janat áriptesimizdiń sátti isi súısinýge turarlyq. Aıgúl AHANBAIQYZY, «Egemen Qazaqstan» ALMATY