Qarjylyq tergeýdiń mańyzdylyǵy aıtyldy

Budan buryn habarlaǵanymyzdaı, keshe qarjylyq tergep-tekserý jáne urlanǵan aktıvterdi qaıtarý jónindegi mamandandyrylǵan semınardyń ekinshi kezeńiniń ashylýy boldy. Onda elimizdiń Bas prokýrorynyń orynbasary Andreı Kravchenko qarjylyq tergep-tekserý salasyndaǵy oqytý semı­narynyń, ásirese, Bas prokýratýra jú­zege asyryp otyrǵan «Shetelden urlan­ǵan aktıvterdi qaıtarý» jobasy aıasyn­da ótip jatqan bul semınardyń mańyz­dy­lyǵyn jáne biregeıligin atap kórset­ti. Budan alynǵan bilim men daǵdylar birden tájirıbede qoldanylatyn bolady, deıdi ol. Rasynda, atalǵan semınar qadaǵalaý, tyıym salý jáne urlanǵan aktıvterdi qaıtarý múmkindikterin arttyrý úshin basqa elderdiń quzyretti organdarymen vedomstvoaralyq jáne halyqaralyq yntymaqtastyqty damytýǵa baǵyttalǵan. Kýrstar bes kún boıyna jalǵaspaq. Dáris berý úshin Italııa, Avstrııa, AQSh jáne Izraıl sarapshylary shaqyrylǵan, al solardyń arasynda Izraıl Bas prokýrorynyń orynbasary Iаhýd Shaffer de bar. Bul bastama aıasynda tergeýshiler men prokýrorlardy oqytýdan basqa, shet ­elden urlanǵan aktıvterdi qaıtarý bo­ıynsha tıimdi jumys júrgizý úshin quqyq qorǵaý organdarynyń ádistemelik jáne normatıvtik bazasyn qurýǵa baǵyttalǵan júıeli sharalar jasalmaq eken. Buǵan qosa, onyń Eýropadaǵy «CARIN» jáne Azııadaǵy «ARIN-AP» álemdik aqparat almasý jelilerine qosylýy josparlanýda kórinedi. Osyǵan oraı: «Búkilálemdik bank pen BUU-nyń «Urlanǵan aktıvterdi qaıtarý jónindegi bastamasy – «StAR» jobasyna qosylýǵa suraý hat joldandy», – dedi Bas prokýrordyń orynbasary Andreı Kravchenko. Semınar aıasynda, sondaı-aq, Qazaqstan Bas prokýrorynyń orynbasary Andreı Kravchenko men osy Bas prokýratýra janyndaǵy Quqyq qorǵaý organdary akademııasynyń rektory Ulan Baıjanov AQSh Memlekettik hatshysynyń halyqaralyq esirtkige qarsy kúres jáne quqyq qorǵaý qyzmeti jónindegi kómekshisi Ýılıam Braýnfıldpen jáne Qazaqstandaǵy AQSh elshisi Djordj Krolmen kezdesý ótkizdi. Suhbat barysynda ekijaqty quqyqtyq yntymaqtastyq máseleleriniń keń shoǵyry, atap aıtqanda, qarjylyq qylmystarǵa, terrorızm men ekstremızmge, qylmystyq jolmen alynǵan aqsha qarajatyn jylystatýǵa qarsy is-qımyl máseleleri talqylandy. Al joǵaryda aıtqanymyzdaı, osy kýrstardyń birinshi kezeńi – bazalyq deńgeıdegi qarjylyq tergep-tekserý boıynsha semınary men trenerlerge arnalǵan trenıng qazan aıynyń basynda ótken bolatyn. Oǵan qarjylyq qylmystarǵa mamandanǵan, quqyq qorǵaý jáne fıskaldyq organdardyń arnaıy iriktelgen 24 qyzmetkeri qatysqan edi. Bul jolǵy semınardyń ashylýyna elimizdiń Bas prokýratýra janyndaǵy Quqyq qorǵaý organdary akademııasynyń rektory Ulan Baıjanov, AQSh Memlekettik hatshysynyń halyqaralyq esirtkige qarsy kúres jáne quqyq qorǵaý qyzmeti jónindegi kómekshisi Ýılıam Braýnfıld, AQSh-tyń Qazaqstandaǵy elshisi Djordj Krol, BUU Esirtkimen jáne qylmyspen kúres boıynsha basqarmasynyń bólim basshysy (BUU EQB, Vena) Tofık Mýrshýdlý, EQYU-nyń Astanadaǵy Baǵdarlamalar keńsesiniń saıası máseleler jónindegi ofıseri Kolın MakKallaý, sonymen qatar, qazaqstandyq sarapshylar, tergeýshiler, prokýrorlar jáne sýdıalar qatysty.