Qazaqstandyq kompanııa Iranda altyn óndirisin qolǵa aldy

Qazaqstandyq kompanııa Iran ken ornynan alǵashqy altynyn Qazaqstanǵa jetkizdi. Bul týraly búgin Úkimet otyrysynda QR Investısııalar jáne damý mınıstrliginiń birinshi vıse-mınıstri Albert Raý málim etti. «Tústi metallýrgııanyń ósimine óńdelmegen altyn óndirisiniń 19 paıyzǵa ósýi áser etti. Affınajdalǵan altyn kólemi de 19 paıyzǵa ósti. «Qazaqmys» affınaj altynyn ulǵaıtty. Elde óndirilgen altynnyń túgeli óz elimizde, otandyq affınaj zaýyttarynda óńdeletinin aıta ketkim keledi. Taǵy da atap ótetin jaıt - biz bıyl Irannan altyndy alǵash ret jetkize bastadyq. Onyń kólemi ázirshe 125 keli. Iranda bizdiń otandyq kompanııa altyn óndirip jatyr. Jyl sońyna deıin taǵy 500 keli jetkizemiz dep boljap otyrmyz. Eger biz bıyl jalpy 11 tonna shyǵarsaq, Irannan jetkizilgen 700 keli edáýir úles qosatynyn baıqaımyz. Kelesi jyly olar Irannyń 2 tonnaǵa deıin altynyn Qazaqstanda óńdeýdi josparlaýda», - dedi A. Raý. Aǵymdaǵy jyldyń 9 aıynda óndiris kóleminiń damýyna toqtalǵan birinshi vıse-mınıstr, Údemeli ındýstrıaldyq-ınnovasııalyq damý baǵdarlamasy aıasynda kórsetilgen memlekettik qoldaýdyń arqasynda óńdeýshi salada óndiris kólemi artyp otyrǵandyǵyn atap ótti. «Metallýrgııada óndiris kólemi 7,8 paıyzǵa ósken. Onyń ishinde qara metallýrgııa - 3 paıyz, tústi metall óndirisi - 10 paıyz. Qara metallýrgııanyń ósimine bolat óndirisiniń 10 paıyzǵa ósýi áser etti», - dedi ol. Alıýmınıı óndirisi 14 paıyzǵa ósip otyr. Hımııalyq ónerkásip 0,1 paıyzǵa ósim kórsetip otyr. Fosfattar men sary fosfor boıynsha óndiris tómendegen. Biraq ammııak sılıtrasynyń 17 paıyzǵa ósýi baıqaldy. Farmasevtıka salasynyń óndirisi 2 paıyzǵa joǵarylady. Jeńil ónerkásip ósim 1 paıyzǵa artty.