Jetimdi jebep, jesirdi jarylqady

Alǵa aýdanynda nemeresimen birge turǵyn úıden qıyndyq kórip kelgen jalǵysbasty ana Antonına Plechkova «Nur Otan» partııasynyń qoldaýymen bas­panaly boldy. 52 jastaǵy jalǵyzbasty ana osy kúnge deıin nemeresin jalǵyz ózi jetektep ósirip kelipti. О́mirdiń taýqymetin kóp tartqan onyń jalǵyz uly balalaryna úsh aı tolǵanda áıelimen ajyrasyp, eki jarym jyl buryn dúnıe salǵan. Al kelini balasyna qaıyrylmapty da. Antonına Plechkovanyń baspanasy bolmaǵandyqtan, nemeresin zańdy túrde óz qamqorlyǵyna ala almaı kelgen. Ol osy kezge deıin nemeresimen birge jaqyn-jýyqtaryn saǵalaýǵa májbúr bolǵan, 9 jyl boıy nemeresi Maksımdi balalar úıine alyp kete me degen kúdikpen ómir súrgen. Birneshe jyl buryn jumysynan qysqaryp, úı alýǵa qarajat jınaı almaǵan eken. Amaly taýsylǵan ol tamyz aıynda «Nur Otan» partııasynyń aýdandyq fılıalynyń qoǵamdyq qabyldaýyna baryp, óziniń muń-muqtajyn baıandaǵan jalǵyzbasty áıelge kásipkerler demeýshilik jasapty. Partııa fılıaly tóraǵasynyń birinshi orynbasary Amangeldi Seı­dalıev máseleni birden qolǵa alyp, de­meý­shiler izdedi. Nátı­je­sinde, nurotan­dyq kásipker kómekke keldi. Osy adam­nyń demeýshiligimen olarǵa Alǵa qa­lasynan bir bólmeli úı satyp alyndy. – Jyldar boıy armandap kelgen bas­panaǵa bir aıdyń ishinde qol jet­kizem­in dep oılamap edim. Máselemdi sheshýge kómektes­ken nurotandyqtarǵa, qaıy­rymdy demeýshi azamatqa alǵysym sheksiz. Eń bastysy, endi nemeremdi qamqorlyǵyma alatyn boldym, – deıdi qýanyshy qoınyna syımaı qýanǵan Antonına Plechkova. Demeýshilik jasaǵan kásipker aýdan ortalyǵynan alty qabatty úıdiń besinshi qabatynan bir bólmeli páterdi alyp bergen. Nemeresi Maksım qazir №4 Alǵa orta mektebiniń úshinshi synybynda oqyp jatyr. – Bul otbasyna jyl saıyn «Mektepke jol» aksııasy aıasynda kómek kórsetip kelemiz. Osy aıda eń basty máselesi sheshildi. Endi úıine jóndeý jumystaryn júrgizip, ózin jumysqa ornalastyrýdy josparlap otyrmyz, – dedi partııa fılıaly tóraǵasynyń birinshi orynbasary Amangeldi Seıdalıev. Nurotandyqtar Antonına Plechkova men nemeresin úılerine baryp, jańa qonysymen quttyqtady, kilem, jıhaz, te­ledıdar syılady. Aıaq astynan bas­panaly bolyp, nemeresin qamqorlyǵyna alýdy rásimdep úlgergen ananyń qýa­ny­­shynda shek joq. Satybaldy SÁÝIRBAI, «Egemen Qazaqstan» Aqtóbe oblysy