«Astana» úsh dúrkin Qazaqstan chempıony atandy

Fýtboldan elordanyń «Astana» komandasy úshinshi jyl qatarynan Qazaqstan chempıony atandy. Búgin Kókshetaýda Qazaqstan premer-lıgasy 25-týrynyń keıinge shegerilgen bir oıynyna baılanysty «Oqjetpes» pen «Astana» kezdesti. Soltústikte kúnniń sýytýyna baılanysty Kókshetaýdaǵy stadıondy qar basyp qalǵan. Alań syzyqtary durys kórinbeıdi. Soǵan qaramastan oıyn dál osy stadıonda ótti. Qolaısyz jaǵdaıǵa qaramastan eki komanda oıynshylary alańda 90 mınýt óner kórsetip shyqty. Biraq, matchta esep ashylmady.  Birinshi kezeńniń sońǵy mınýttarynda «Astananyń» gol soǵatyn múmkindigi bolǵan edi. Alaıda, 11 metrlik penaltıden kolýmbııalyq legıoner Roher Kanıas múlt ketti. Sóıtip, eki komanda teń tústi. Degenmen, bir upaı «Astananyń» chempıon atanýyna jetkilikti boldy. Sóıtip, Stanımır Stoılov shákirtteri chempıonattyń aıaqtalýyna bir týr qalǵanda jeńiske jetti. Osylaısha, «Astana» úshinshi jyl qatarynan el chempıony atanyp otyr. Sońǵy týrdaǵy nátıjege qaramastan «Qaırat» kúmis júldege ıelik etedi. Al úshinshi orynnyń taǵdyry sońǵy týrda sheshilmek. Qola júldege, negizinen, «Ertis» pen «Ordabasy» úmitti.