Sergeı Dıachenko kim edi?

2016 jylǵy 26 qazanda kórnekti memleket jáne qoǵam qaı­ratkeri, II, III, IV, V, VI saı­lanǵan Qazaqstan Respýblıkasy Parlamenti Májilisiniń depýtaty Sergeı Aleksandrovıch Dıa­chenko 64 jasqa tolǵan sha­ǵynda uzaqqa sozylǵan aýyr naýqastan qaıtys boldy. Sergeı Aleksandrovıch Dıachen­ko Aqmola oblysynyń Shortandy eldi mekeninde 1952 jyly 18 qyrkúıekte dúnıege kelgen. 1973 jyly Kýıbyshev josparlaý ıstıtýtynyń óner­kásip-ekonomıka fakýltetin ekonomıst mamandyǵy boıynsha bitirdi. Eńbek jolyn osy jyly Penza oblysy, Kýznesk qalasyndaǵy aspaptyq jabdyqtaý jáne kondensatorlar zaýytynda ınjener-ekonomıst bolyp bastady. Áskerı qyzmetten soń týǵan eli Qazaqstanǵa qaıta oralyp, on jylǵa jýyq Shortandy aýdandyq komıtetiniń nusqaýshysy qyzmetinen Qazaqstan komsomoly Ortalyq Komıtetiniń ekinshi hatshysyna deıingi eńbek jolynan ótti. 1985-1991 jyldar aralyǵynda Qazaqstan Kompartııasy Kókshetaý qalalyq komıtetiniń birinshi hatshysy jáne sonymen qatar, halyq depýtattary Kókshetaý qalalyq keńesiniń tóraǵasy boldy. Al 1991-1993 jyldary Qazaq KSR Jastar isi, dene tárbıesi jáne sport jónindegi memlekettik komıteti tóraǵasynyń orynbasary, Qazaqstan Respýblıkasy Týrızm, dene tárbıesi jáne sport mınıstriniń orynbasary qyzmetterin asqan jaýapershilikpen atqara júrip, táýelsizdik alǵan jas memleketimizdiń qoǵamdyq ómirine belsene aralasty. Sergeı Dıachenko táýelsizdik alǵan alǵashqy qıyn kezeńderde óziniń eńbekqorlyǵynyń, iskerliginiń, biliktiliginiń, kásibı sheberliginiń jáne týǵan eline degen shynaıy patrıottyq rýhynyń arqasynda tuńǵysh Prezıdentimiz, Elbasy Nursultan Ábishuly Nazarbaevtyń joǵary senimine ıe bolyp, jańa Qazaqstanymyzdy qalyptastyrý jolyndaǵy barlyq bastamalaryn qoldap, júzege asyrý jolynda aıanbaı eńbek etti. Sergeı Dıachenko 1999 jáne 2005 jyldarda ótken Mem­leket basshysyn saılaý naýqandarynda Alma­ty qalasy boıynsha N.Á.Nazarbaevtyń senim bil­dirilgen ókili bolýy, sonymen birge, osy jyldary ekinshi shaqyrylǵan Qazaqstan Respýblıkasy Parlamenti Májilisiniń depýtaty bolyp saılanýy Prezıdentimizdiń Sergeı Dıachenkoǵa degen senimin burynǵydan da joǵarylata tústi. О́zine júktegen jaýapkershilik pen zor senimdi abyroımen kótere bilgen Sergeı Aleksandrovıch odan ári III, IV, V jáne VI saılanǵan Parlament Májilisiniń depýtaty, Májilis Tóraǵasynyń orynbasary bolyp, memleketimizge, halqymyzǵa qajetti sapaly zańdar shyǵarý isine belsene aralasty. Keı jyldary Elbasynyń taǵaıyndaýymen Aqmola obly­synyń ákimi, Qazaq­stan halqy Assambleıasy Tóraǵasynyń oryn­basary syndy laýazymdy qyzmet­terdi de joǵary deńgeıde atqardy. Memleket basshysynyń ózine degen senimine daq túsirmeýdi maqsat etken ol týǵan jerge de­gen qurmetin bárinen bıik qoıyp, árqashanda qoǵamnyń áleý­­mettik múddesin qorǵaý úshin bar múmkindigin paıdalan­dy. Árbir saılaýshynyń ótinish-tilegine, aryz-shaǵymyna der kezinde nazar aýdaryp, ár máse­leniń naqty sheshimin tabýǵa at salysty. Osynyń barlyǵy Sergeı Dıachen­konyń azamattyq  kel­betin ashyp, naǵyz halyq qalaý­lysyna laıyqty abyroıyn arttyra tústi. Sonymen birge, Sergeı Dıa­chen­ko Prezıden­timiz tóraǵa­lyq etetin «Nur Otan» partııasy Saıası keńesiniń jáne Bıýrosynyń múshesi bola júrip, partııa qurylǵan kúnnen bastap, osy ýaqytqa deıin partııa jumysyn jetildirýge úzdiksiz úles qosty. Otanǵa adal ári ádil qyzmet etýdi ómirlik usta­nymy etken Sergeı Dıachenko adamgershilik, izgi qasıetterdi aldyńǵy  orynǵa qoıyp, kún saıyn biliktiligin jetildirýden de jalyqqan emes. Nátıjesinde, Saıası ǵylymdar akademııasynyń korrespondent-múshesi atanyp, júzden astam ǵylymı jumystardyń, kitaptardyń, oqýlyqtar men ádistemelik quraldardyń avtoryna aınaldy. Saıası ǵylymdar doktory dárejesine kóterildi. Sergeı Dıachenko ómiriniń sońǵy sátine deıin Elbasynyń mańyzdy tapsyrmalaryn tıimdi júzege asyrýǵa, Parlament Májilisi jumysynyń zaman talabyna saı bolýyna, el azamattarynyń múddesin qorǵaý, qazaqstandyqtardyń ómir sapasyn jaqsartý, qoǵamda turaqtylyq pen kelisimdi saqtaý, Qazaqstannyń halyqaralyq abyroıyn kóterý jolynda búkil kúsh-jigerin, bilimi men tájirıbesin, kásibı sheberligin jumsap, ólsheýsiz úles qosyp ketti. Osy joldaǵy eleýli eńbekteri memleket tarapynan joǵary baǵalanyp,  «Qurmet Belgisi», «Parasat», I dárejeli «Dostyq» ordenderimen, TMD-nyń «Dostastyq» ordenimen, kóptegen medaldarmen, Qazaq KSR Joǵary Keńesiniń Qurmet gramotasymen marapattaldy. Onyń qasıetti Otanymyz aldyndaǵy árbir eńbegi keler urpaqqa jalǵasyp, úlgi-ónege bolary sózsiz. Sanaly ǵumyryn memlekettiń órkendeýi men jarqyn bolashaǵyna arnaǵan belgili saıasatker, memleket jáne qoǵam qaıratkeri, ardaqty azamat, aıaýly áriptesimiz Sergeı Aleksandrovıch Dıachenkonyń aqjarqyn asyl beınesi, adamgershilik jarqyn kelbeti bizdiń júregimizde árdaıym saqtalady. Qazaqstan Respýblıkasy Parlamentiniń Májilisi

Oıy bıik, jany jaısań jan edi

Sergeı Aleksandrovıch Dıa­chenko elimizdegi jas­taıy­nan patrıot­tyq, otan­súıgishtik rýhta tárbıelenip ósken urpaqtyń kór­nekti ókili edi. Kezinde jastar uıymynda birge qyzmettes bolyp ómirde rýhanı, azamattyq senimmen serik­tesip óstik. Ol qoǵam, memleket de­­gen uǵ­ymdarǵa erekshe jaýap­kershilikpen qaraıtyn. Adam­­­­­gershilik, dos­tyq, jol­dastyq qaty­nasqa berik, senimdi. Táýelsiz mem­­leketi­mizdiń eń jaýapty quzyr­ly qurylym­darynyń laýa­­zymdy qyz­metterin Elba­synyń senimi­men abyroıly atqardy. Syılastyqqa taza, ulty­myz­dyń salt-dástúrine, tili­ne asa qurmetpen qaraıtyn zııaly azamat bolatyn. Ol táýelsiz memleketimizdiń quqyqtyq keńis­­tigin, azamattyq qoǵam qa­lyp­tas­tyrýǵa kóp eńbek sińirdi. Sergeı jany jańalyqqa qumar, ádebıet, óner jaq­sylyq­taryna qulaǵy túrý­li, kókiregi ashyq, dos­tyqqa yqylasty, jaı­sań jan bolatyn. Ol bizdiń parla­menttik áriptestik, adamı tul­ǵalyq ortamyzdy toltyryp júrý­shi edi. Jany jánnatta bolǵaı. Qýanysh SULTANOV Parlament Májilisiniń Depýtaty

Tulǵalyq kelbeti aıqyn seziletin

Elimizdiń belgili azamat­tarynyń biri Sergeı Aleksan­drovıch Dıachenko ómirden ozdy. Sergeı Aleksandrovıchti kópten biletinmin. Toqsanynshy jyl­dar­dyń aıaǵynda Astanaǵa kelgen soń jaqsyraq tanystyq. Oblystar ákim­deri bolyp jumys istegen kezde­rimizde áriptes­ter retinde únemi baılanysyp turdyq. 2012 jyly Parlament Máji­lisi Tóraǵasynyń orynbasarlary bolǵan kezimizde ábden jaqyn aralastyq. Jumysqa baılanysty keıde qıyn máselelerdi de birge aqyldasyp, sheshim ázirlep júrdik. Sergeı Aleksandrovıchtiń ustamdy minezi, kóregendiligi ábden baıqalyp turatyn. Ekeýmiz ótken ómir joldary jóninde syr shertken kezde onyń sonaý komsomol basshylarynyń biri bolǵanyn, úlken ómir mektebinen ótip, tárbıe kórgenin talaı estigenmin. Sergeı baýyrymyzdyń qyzmettes joldas­tarymen qarym-qatynasy onyń úl­ken tulǵa ekenin sezdirip turatyn. Parlament Májilisiniń VI shaqy­rylymynda qaıta kezdeskennen keıin biraz jyl qatar júrgen joldasymnyń syrqatyn estip, qolymnan kelgenshe demeý­ge tyrystym. Biraq taǵdyrdyń jazǵany óz degenin istedi. Elimiz, halqymyz úshin eleýli, adal qyzmet etken belgi­li azamat bul dúnıemen qoshtasty. Endi esimizde Sergeı Alek­san­dro­vıchtiń esimi, onyń adam­ger­shiligi, eńbeksúıgishtigi, qara­paıym­dylyǵy, adal jar, súıikti áke bolǵany qalady. Otbasyna, uly men qyzdaryna qatty qaıǵyryp kóńil aıtamyn. Baqtyqoja IZMUHAMBETOV, Parlament Májilisiniń depýtaty

Tek abyroı bıiginen kórinip júrdi

Memleket jáne qoǵam qaı­rat­­keri Sergeı Dıachenko da my­­naý jalǵannan ótti... Qazaqstan Respýblıkasy Parla­menti Májilisiniń ekinshi shaqy­rylymynan beri qaraı úzdik­siz halyq qalaýlysy bolyp bira­zymyzǵa áriptes, maǵan Májilis Tóraǵasy saılanǵan jyl­da­rymda orynbasar – senimdi seriktes bolǵan azamat edi. Aqmola topyraǵynda dú­nıege kelgen ol erte atqa qondy. Otyzǵa endi shyq­qanynda Kókshetaý kompartııasy qalalyq komıtetiniń birinshi hatshysy boldy. Sol kezden bas­tap qolynan is keletin bilikti basshy kadr retinde elge tanyla basta­dy. Almaty qalalyq fılıa­lynda Qazaqstan Respýb­lıkasy Prezıdentiniń senim bildirilgen ókili retin­de qoǵamdyq shtab basshy­synyń orynbasary boldy. 1999-2005 jyldarǵy saılaýda da N.Nazarbaevtyń senim bildirilgen ókili boldy. Qazaq­stan halqy Assambleıasy Tór­aǵasynyń orynbasary qyz­metin de abyroıly atqardy. Elbasy seniminiń arqasynda Parla­ment Májilisiniń ekin­shi sha­qyry­lymynan bastap de­pýtattyqqa saılandy. Úshin­shi, tórtinshi jáne besinshi sha­qyrylymdarda áriptesteri oǵan senim bildirip, Májilis Tór­aǵasynyń orynba­sar­lyǵyna saılap otyrdy. Osyndaı jaýap­ty qyzmette bilimdiligi men biliktiligi árdaıym kórinip turatyn. Májilis depýtaty kezde­rimde áriptes, spıker kezimde vıse-spıker bolǵan, seriktesim bolǵan qımas zamandasym edi. Qazaqstan Respýblıkasynyń Táýelsizdigine bar qajyr-qaı­ratyn qosqan patrıot, saıası ǵylymdar doktory, memleket jáne qoǵam qaıratkeri retinde eldiń esinde qalary anyq. Qabıbolla JAQYPOV, Parlament Májilisiniń depýtaty

Esimizde árdaıym saqtalady

Men Sergeı Aleksandrovıch Dıachen­komen Parlament Máji­lisin­de 2004 jyldan beri birge qyzmet istedim. Osy jyldar ishinde Sergeı Aleksandrovıchti tek jaqsy jaǵynan bildim. Ol adamgershiligi zor, qarapaıym, óz isine tııanaqty, talap qoıa biletin azamat edi. Sergeı Aleksandrovıch memle­kettiń, halyqtyń múddesin árqa­shan joǵary qoıatyn, zańdardyń da sapaly, el ıgiligi úshin qabyl­danýyna erekshe nazar aýdaratyn. Qazaqstan­nyń damýyna, ultaralyq qatynas­tardyń saqtalýyna, eldegi turaqty­lyqqa da úlken úles qosqan azamat. S.Dıachenko Parlament Má­jilisi Tór­aǵasynyń orynbasary retinde de palata jumysyn joǵary deńgeıde uıym­dastyryp, basqa da memlekettik organdarmen qarym-qatynasty jaqsy úıles­tiretin, zań shyǵarý organy­nyń qyz­metin memlekettiń damýyna, halyqtyń ál-aýqatynyń kóte­rilýine bura bile­tin. Osyndaı atqarǵan adal eńbegin kúndelikti qyzmetinen kórip, bilip júrdik. Tipti, ómiriniń sońǵy kúnine deıin ol Par­lament Májilisiniń, komıtettiń, jumys toptarynyń otyrystaryna belsene qatysyp, óz oı-pikirin, usynystaryn aıtyp júrdi, ózine júktelgen depýtattyq mindetti abyroımen oryndady. Áriptesimiz, dosymyz Sergeı Aleksan­drovıch Dıachenkonyń jar­qyn beınesi bizdiń esimizde árdaıym saqtalady.  Nurtaı SABILIаNOV, Parlament Májilisiniń Depýtaty

Otanynyń patrıoty bolatyn

Táýelsiz Qazaqstannyń qalyp­tasýynda jaýapty qyz­met atqarǵan árbir azamattyń el tarıhynda ózindik orny bar. Búgingi jetken jetistik, shyqqan bıigimizge úlesi bol­ǵan sondaı tulǵalardyń biri – Sergeı Aleksandrovıch Dıachenko. Sergeı Aleksandrovıchpen Parlament qabyrǵasynda biraz jyl áriptes bolǵan ýa­qyt­ta memleketshil, isine adal, mádenıetti, sergek oıly, qyzmetine tııanaqty kásibı tulǵany tanydyq. О́zine júktelgen mindetterine adal, ár istiń baıybyna úńil­gen azamat qashanda saı­laý­shylarynyń muń-muq­tajyna beıtarap qaraı almaıtyn. Depýtattyq laýazymynda, ásirese, áleýmettik máselelerge belsene kirisetin Sergeı Aleksandrovıch oıǵa alǵan isin aıaǵyna deıin aparýǵa umtylatyn. Sol jolda dittegen maqsatyna jete bilýi uzaq jylǵy basqarýshylyqtan kelgen ómirlik tájirıbesi ǵana emes, jeke basyndaǵy adamgershilik qasıetinen de bolsa kerek. Ol táýelsiz Qazaqstanǵa, Elbasyna adal qyzmet atqardy. Jıǵan tájirıbe, kórgen táli­min, kúsh-jigerin sol jolǵa jumsady. Qazaq mádenıetine aıryqsha qurmetpen qaraıtyn S.Dıachenkomen qarym-qatynasymyz óte jyly bolatyn. Sońǵy kúnderiniń birinde Sergeı Aleksandrovıchpen júzdesip qalǵanymda, dendegen aýyr naýqasyna qaıratyn jeńgizbeı, ádettegideı jady­rańqy keıip tanytyp, jaı surasqany jadymda. Týǵan eline qaltqysyz qyzmet etken sypaıy da syrbaz jan, aıaýly áriptes Sergeı Aleksandrovıchtiń ómirden ozǵanyna qımastyq sezimimizdi jetkize otyryp, jaqyn-jýyq, týys-týmalaryna kóńil aıtamyz. Bekbolat TILEÝHAN, Parlament Májilisiniń depýtaty