Urpaqty ulttyq ónerge baýlyǵan mýzyka mektebi

Ult ulanyna babalar úlgisimen sazdy áýendi sanalaryna sińirý úshin elordada ashylǵan alǵashqy mýzyka mektebi táýelsizdik jemisi desek bolady. Eldikke deıin elordada mundaı bilim ordasy bolmaǵan eken. Halyqtyq dástúrdi jalǵastyrý maqsatynda osy bir ıgilikti sharany táýelsizdiktiń alǵashqy kúnderi sol tustaǵy Bilim mınıstriniń orynbasary Sh.Berkimbaeva Aqmola qalalyq atqarý komıtetiniń tóraǵasy A.Bólekbaev, ózge de azamattar kópten beri sondaı bir óner uıasy qajet dep júrgende, Táýelsizdiktiń tańy atyp, sol jyly osy mektep shańyraq kótergen eken. Mekteptiń irge bekitip, qanatyn keńeıtýine alǵashqy dırektory Ospan Súleımenovtiń de eńbegi zor dep bilemiz. Jaqynda osy óner mektebiniń ataýly kúnine oraı úlken shara ótti. Oǵan mekteptiń túlekteri, ustazdar qaýymy, ata-analar, qalalyq máslıhat depýtattary, ózge de azamattar qatysyp, aq tilekterin bildirdi. Ásirese, bilim mekemesiniń túlekteri men qazirgi shákirtterinen quralǵan «Rýh», «Tumar» qylqobyzshylar ansambli, «Naz» jetigenshiler ansambli, «Meıir», «Erke» estradalyq vokal ansamblderi, «Balaýsa» folklorlyq toby, basqa da shaǵyn óner ujymdary án áýeletip, kúı kúmbirletip, myń buralǵan bılerin usyndy. Ulaǵatty ustazdar men ónerli jastarǵa qalalyq bilim basqarmasynyń syı-sııapaty jasaldy. Eń bastysy, 115 muǵalimnen 800-den asa oqýshy bilim alyp jatqan bul mekteptiń túlekteri qazirdiń ózinde óz Otanymyz ǵana emes, sonymen qatar, alys-jaqyn 50 memleketke jol tartyp, ultymyzdyń rýhy myqty qundylyqtaryn ózgelerge tanystyryp, nasıhattap júrgeni kóńilge qýanysh uıalatady. Shırek ǵasyr urpaqqa qyzmet etip kele jatqan óner mektebine án men kúıdi teń damytqan qazaqtyń aıtýly kompozıtory Kenjebek Kúmisbekovtiń atyn berý máselesi kópten beri kóterilip kelgen edi. О́ner adamdary men ata-analar tıisti oryndarǵa ótinishterin talaı ret jetkizgen-tin. Ádemi dıdarlasý sátinde qalalyq máslıhattyń depýtaty Saıat Batpenov jurttyń usynysyn depýtattar qaýymy qoldap otyrǵanyn, aldaǵy ýaqytta sheshim qabyldaý nıetteri bar ekenin tilge tıek etip, qaýmalaǵan úlken-kishini bir qýantyp tastady. Sonymen, elordadaǵy irgeli bilim ordasy aldaǵy ýaqytta da jas urpaqqa ulttyq ónerdi úıretýmen qatar, tálimdi tárbıe berýdi jalǵastyra berýdi maqsat etip otyr. Súleımen MÁMET, «Egemen Qazaqstan»