Germanııa bıýdjetine qarjynyń 80%-i shaǵyn jáne orta bıznesten túsedi

«Qazaqstan  90-shy jyldardyń basynda bolǵan kedeıshilikti eńserdi. Halyqtyń kirisi kóbeıdi. Máselen, sol kezde jan basyna shaqqandaǵy ishki jalpy ónim 300 dollar shamasynda bolsa, al 2015 jyldyń qorytyndysy boıynsha, bul kórsetkish  10 myń dollarǵa jetti.  Kedeıshilik halyqtyń 47 %-in quraǵan kezder de boldy. Búginde  bul kórsetkish 2-3%-tiń aınalasynda tur». Memlekettik hatshy Gúlshara Ábdiqalyqova Germanııa Federatıvtik Respýblıkasy Parlamenti Býndestaginiń depýtaty Sıbılle Pfaıfermen kezdesýi kezinde osylaı dedi. Kezdesý barysynda Qazaqstan men Germanııa arasyndaǵy saıası-ekonomıkalyq áriptestikke toqtalǵan Gúlshara Ábdiqalyqova bul elmen rýhanı-mádenı saladaǵy da yntymaqtastyq jaqsy jolǵa qoıylǵanyn atap ótti. «Biz Qazaqstanda turatyn etnıkalyq nemisterge de aıryqsha kóńil bólemiz. Qazir qazaq jerinde 180 myń-ǵa tarta nemis turady. Elimizdiń kóp óńirinde nemis ortalyqtary bar. Olarǵa nemis ultynyń mádenıetin, tilin, salt-dástúrin damytý úshin barlyq jaǵdaı jasalǵan. Al búgingi kúnge deıin Germanııaǵa ketken nemisterdiń sany shamamen 900 myń adamdy quraıdy. Biz olarmen de belsendi túrde áriptestik baılanys ornatyp kelemiz»,– dedi Gúlshara Naýshaqyzy. Sondaı-aq, Memlekettik hatshy Qazaqstannyń Germanııamen genderlik saıasat tóńireginde de áriptestik ornatýǵa ázir ekendigin jetkizdi. «Qazir Parlamenttegi azamattardyń 28 %-i,  bızneste júrgen jandardyń 50 %-i áıelder. Shaǵyn jáne orta kásipkerlik salasynyń tizginin ustaǵandardyń 40 %-i de názik jandylar. Biz Germanııanyń ulttyq iri kompanııalaryna áıelderdiń kóptep jetekshilik etetinin bilemiz. Iаǵnı, sizderdiń  bul salada úlken tájirıbelerińiz bar degen sóz.  Endeshe, bul baǵytta jan-jaqty áriptestik ornatýǵa daıynbyz», – dedi Gúlshara Ábdiqalyqova. Sıbılle Pfaıfer ózin arnaıy osy elge shaqyryp, qonaqjaılyq tanytqany úshin Qazaqstan tarapyna alǵysyn bildirdi.  «Men Qazaqstanǵa memlekettiń ekonomıkalyq tetigin nyǵaıtý baǵytyndaǵy tájirıbemizben bólisýge keldim. Búginde Germanııa bıýdjetindegi qarjynyń  80 %-i shaǵyn jáne orta bıznesten túsedi. Biz shaǵyn jáne orta kásipkerlikti, onyń ishinde eldi mekenderde óz kásipterin dóńgeletip otyrǵan áıelderge qoldaý kórsetýge, ózara tájirıbe almasýǵa daıynbyz. Germanııada shaǵyn jáne orta bıznestiń damýyna úles qosatyndardyń 50 %-i áıelder.  Olardyń áleýeti - joǵary, kiristeri - turaqty.  Iаǵnı,  áıel kásipkerler Germanııa ekonomıkasynyń damýyna belgili bir mólsherde qomaqty qosyp otyr», – dedi Býndestag depýtaty. Sondaı-aq, ol Germanııanyń orta jáne kásipkerlikti damytýǵa aıryqsha kóńil bólip otyrǵanyn, bul maqsatta memlekettik qoldaý kórsetiletinin,  máselen, kásipkerlik salasynda júrgen azamattarǵa beriletin nesıe óte tómen % -pen beriletinin jetkizdi.