Qazaqstan táýelsizdik alǵan alǵashqy jyldarda, basqasyn bylaı qoıǵanda, halyqtyń eńbekaqysy men zeınetaqysyn berýdiń ózi ońaı bolmaǵany belgili. Qarjynyń tapshylyǵy saldarynan áleýmettik sala kúrdeli jaǵdaıǵa tap bolǵanyn bilemiz. Arada shırek ǵasyr ýaqyt ótti, qazir bul salanyń hal-ahýaly qalaı? Áleýmettik salanyń búgingi tynysyn óńirlerden kelgen tómendegi pikirlerden aıqyndaýǵa bolady.
Egemendiktiń eleń-alańynda aýyldyq jerlerde qıyndyq bolǵany ras. Aýyldan qalaǵa qaraı qonys aýdarǵandar kóp boldy. Alaıda, Elbasy N.Nazarbaevtyń sarabdal saıasatynyń arqasynda bul qıyndyqtar artta qaldy. Shalǵaıdaǵy Qaroı selosynda da oń ózgerister júzege asty. Aýylda zamanǵa saı eńseli mektep boı kóterip, jańa oqý quraldarymen jaraqtandyryldy. Balabaqsha jumys isteıdi.
Kópten keneýi ketip turǵan Mádenıet úıi jóndelip, aýyldyqtarǵa qyzmet etýde. Sapaly baılanys júıesi bar. Eń bastysy, aýyz sý máselesi oń sheshildi. Qazir taza sý ár úıdiń aýlasynda. Buǵan aýyldyqtar dán rıza. Bul bıýdjetke 37 mıllıon teńgege tústi. Endi ıgiligin jurt kórip otyr. Jańa dárigerlik ambýlatorııa paıdalanýǵa berildi. Bir sózben aıtqanda, halyq Elbasynyń alys aýyldardy damytýǵa basa nazar aýdaryp otyrǵanyn aıqyn sezinýde.
Bizdiń aýdan – eń shalǵaı aýdandardyń biri. Jetpis jyl boıy qatty jamylǵy joly bolmaǵan aýdanǵa asfalt jol keldi. Kúni keshe ǵana aýdan ortalyǵyna gaz berildi. Osynyń bári táýelsizdiktiń tartýy.
Zoıa BOZShINA,
Oıyl aýdanynyń turǵyny,
Qaraoı mektep-balabaqshasynyń kitaphanashysy
Aqtóbe oblysy
Olga ISAEVA,
Oral qalasynyń turǵyny, áleýmettik sala qyzmetiniń ardageri
Táýelsizdiktiń alǵashqy jyldarynda áleýmettik salada qyzmet jasadym. Ystyǵy men sýyǵyn óz basymnan ótkergendikten, sol ýaqyttaǵy jaǵdaı men memleket tarapynan halyqqa qandaı áleýmettik kómek bolǵany kóz aldymda. Elbasynyń tapsyrmasyna oraı, ataýly áleýmettik kómek belgilendi. Basqa birde-bir elde balamasy joq, turmysy tómen otbasylarǵa arnalǵan osy bir qarjylyq qoldaý sol tusta olarǵa úlken kómek boldy. Qazir de osyndaı ataýly áleýmettik-qarjylyq qoldaý bar, biraq sol jyldarmen salystyrǵanda óte az. Sebebi, sońǵy jyldary respýblıkamyzda jańa jumys oryndary kóbeıdi. Eger táýelsizdiktiń alǵashqy jyldarynda bir otbasynyń barlyq múshesi jumyssyz qalǵan bolsa, qazir bul kórinis kelmeske ketti, jumyssyzdar kúrt azaıdy. Batys Qazaqstan oblysy Gúlnar PARMANOVA,Taraz qalasynyń turǵyny
2000 jyly Jambyl oblysynda bar-joǵy 15 mádenıet úıi men klýb bolǵan eken, qazir – 199. Al 1999 jyly 21 ǵana kitaphana bolsa, búgingi tańda – 287. Iаǵnı, qazir Jambyl óńiriniń óneri men mádenıeti erekshe órkendedi. 545 mádenı mekeme halyqqa qyzmet kórsetip otyr. Bul – Táýelsizdiktiń tartýy. Táýelsizdik týy jelbiregeli beri Jambyl oblysynda 92 jańa bilim nysany iske qosylǵan. Onyń 71-i mektep, 20-sy balabaqsha, 1-eýi kolledj. Osynyń arqasynda 46 tozyǵy jetken, 8 úsh aýysymdy, 10 oryn tapshylyǵy bar, 7 yńǵaılastyrylǵan ǵımaratta ornalasqan mektepter máselesi sheshildi. Táýelsizdik jyldary tek Taraz qalasynyń ózinde 11 mektep, 56 mektepke deıingi mekeme, eki mektepten tys balalar shyǵarmashylyǵy ortalyǵy, alty densaýlyq nysany, bir mádenıet jáne alty sport kesheni paıdalanýǵa berilipti. Árıne, bul jaǵdaılardyń bári – Elbasynyń el bolashaǵyna jasap otyrǵan úlken qoldaýy, qamqorlyǵy. Jambyl oblysy
