Elimizde dene shynyqtyrý men sporttyń damýyna, onyń buqaralyq sıpat alýyna aıryqsha kóńil bólinip keledi. Bul saladaǵy eń basty maqsat – jergilikti turǵyndardyń, onyń ishinde jastardyń salamatty ómir saltyn ustaný arqyly densaýlyǵyn saqtaýǵa yqpal etý, sport nysandarynyń qoljetimdiligin arttyrý. Mine, el Táýelsizdiginiń 25 jyldyǵyna oraı Jambyl oblysy, Shý qalasynda ashylǵan zamanaýı deneshynyqtyrý jáne saýyqtyrý kesheni osy baǵytta óz jumysyn bastap ketti. KSRO eńbek sińirgen jattyqtyrýshysy Iýrıı Shaıdyń bastamasymen qolǵa alynǵan bul sport kesheni memlekettik-jekemenshik áriptestik negizinde salyndy. Jobalyq smetalyq quny 480 mln. teńgeni quraıdy.
Aldaǵy ýaqytta sport súıetin balalardyń naǵyz ordasyna aınalatyn bul jańa ǵımarat sporttyq-saýyqtyrý blogy men jataqhanadan turady. Sondaı-aq, trenajer, taekvondo, boks, kúres zaldarymen qamtylǵan. 24 tósek-orynǵa arnalǵan on bólme, 16 orynǵa arnalǵan ashana jáne býfet bar. Osy tusta aıta ketý kerek, búgingi kúni oblystaǵy jalpy sport nysandarynyń sany 2016-ny quraıdy.
Sońǵy jyldary bul óńirde memlekettik-jekemenshik áriptestik sheńberinde salynǵan nysandar qatary kóbeıip keledi. Sonyń dáleli retinde Shý qalasynda ashylǵan «Araılym» balabaqshasyn da aıtýǵa bolady. 150 oryndyq úsh qabatty ǵımarattyń qurylys jumystaryn merdiger «Kompanııa-Mark» JShS ótken jyly bastaǵan bolatyn. Jobanyń jalpy quny 340 mln teńgeni quraıdy.
Bul memlekettik-jekemenshik áriptestik baǵdarlamasy aıasynda ashylǵan elýinshi balabaqsha eken. Qazirgi tańda Shý aýdanda 943 búldirshin balabaqsha kezeginde tur. «Araılym» balabaqshasynda mektep jasyna deıingi búldirshinderge bilim berý jáne oqytý úshin qajetti nárseniń bári bar. Balabaqshada mýzyka, sport zaldary, oıyn bólmeleri, tórt medısınalyq kabınet, ákimshilik keńseler, sondaı-aq balalar oıyn alańy soǵylǵan.
Oralhan DÁÝIT,
«Egemen Qazaqstan»
Jambyl oblysy
Sýretterdi túsirgen
Aqádil RYSMAHAN
