Qyryq jyl qııýy qashqan jol jóndeldi

«Bir jol bar – alys, alys ta bolsa jaqyn, bir jol bar – jaqyn, jaqyn da bolsa alys», degendeı, Aqsýat pen Zaısanǵa bet alǵan jolaýshy buryn qashyq bolǵanyna qaramastan, Qalbataý arqyly júrgendi jón sanaıtyn. О́ıtkeni, Qaraǵandy men Almaty oblysy jaqtan keletin jolaýshylar úshin «Aıagóz – Boǵas» baǵyty tóte bolsa-daǵy sanattan shyǵyp qalǵan jol sıpatynda edi. Al táýekel eter jan bolsa, ábden áýre-sarsańǵa túsip, ıt-yrǵyljyńmen jeter edi. «Samarqannyń sar joly, Bulanaıdyń tar joly» demekshi, jol taýqymetin tartyp, zapy bolǵan turǵyndardyń talap-tilegi eskerildi. Byltyr bergen ýáde bıyl oryndaldy. Oblys ákimi osyǵan deıin shuryq tesik, keteýi ketken jolmen ózi júrip ótip, ony jóndeýge tıisti mekemelerge tapsyrma júktegen edi. Endi jaz boıy kúrdeli jóndeý júrgizilgen jolmen taǵy da júrip ótip, qurylys sapasyn tekserdi. «Aıagóz – Boǵas» trassasy – qy­ryq jyl jóndeý kórmegen, tozyǵy jet­ken jol toraby. О́ńir úshin óte mańyzdy joldyń jóndelýi ar­qyly jolaýshylardyń 200-den astam shaqyrymdy únemdeýine múmkindik týdy. Bıyl bul joldyń 78 shaqyrymy jóndeýden ótti. Taqtaıdaı jolmen tosylmaı tike tartqan turǵyndar dán rıza. «Jol aqysy – júrý» deıtin elge keregi de osy ǵoı. – Buryn Aqshı men Aıagóz arasynda bir saǵattan artyq júrsek, qazir jarty saǵatta jetemiz. Ýaqyt únemdeletin boldy, kóligimiz de buzyla bermeıdi. Aýyldyń máse­lesine kóńil bólip, qamqorlyq kór­set­ken Elbasymyzǵa, oblys basshysyna eldiń rızashylyǵy sheksiz, – dedi Aıagóz aýdanyndaǵy Aqshı aýylynyń turǵyny Tursynǵalı Oralbaev. Oblys basshysy atqarylǵan jumysqa oń baǵasyn berdi. Bul baǵyttaǵy jol qurylysynyń qal­ǵan bóligi kelesi jyly jal­ǵas­paq. Alǵys aıtqan aǵaıyn mem­lekettiń qoldaýyn sezinip, kóńilderi tasyǵannan taǵy bir joldy jóndep berýdi surady. Bul – aýdan aýmaǵyndaǵy «Aıagóz – Shubartaý» tas joly. – Jóndeý jumystary jalǵasyn ta­bady. Al Shubartaýǵa deıingi jol­dyń jaǵdaıyn qarastyraıyq. Tıisti oryndar barlyq jumys kólemin eseptep, saraptaıdy. Sodan keıin bir sheshimge kelemiz, – dedi D.Ahmetov. Jalpy, Shyǵys óńiri – jol­dar­dyń uzaqtyǵymen erekshelenetin aımaq. Oblystyq jolaýshylar kó­ligi jáne avtokólik joldary basqarmasynyń basshysy Berik Beısekenovtiń aıtýynsha, aǵymdaǵy jyly oblystyq mańyzdaǵy jol­dar­dy ortasha jóndeýge bıýdjetten 5,3 mıllıard teńge qaras­ty­rylǵan. Onyń ishinde 3,5 mıllıard teńge jol jóndeýge, 1,77 mıllıard teńge joldardy kútip, ustaýǵa baǵyttalǵan. Bıyl jalpy qashyqtyǵy 221 shaqyrym bolatyn 16 jol ýchaskesinde ortasha jóndeý jumystary júrgizilýde. – Bıyl jyly Sibe kól­de­ri­ne, Alakólge, О́skemennen «Nur­taý» shańǵy bazasyna baratyn joldar men Kúrshim – Qaljyr, О́skemen – Tarǵyn – Samar, Borodýlıha – Shemonaıha jáne Sereb­rıansk qalasyna kireberis avtojoldar qalpyna keltirildi. Bul óńirdiń týrıstik áleýetin kóterý maqsatynda da jasalyp otyr, – dedi basqarma basshysy. Al «QazAvtojol» ulttyq kompanııasy oblystyq fılıalynyń dırektory Serik Aqtanov oblystaǵy respýblıkalyq dárejedegi joldardy jóndeýge aǵymdaǵy jyly 5 mıllıard teńge bólingenin aıtady. Bul qarajattyń 76,5 mıllıon teńgesi joldardy qaıta qurýǵa, 1 mıllıard 440 mıllıon teńgesi kúrdeli jóndeýge baǵyttalǵan. Qalǵan qarjy ortasha jóndeý men jol kútimine jumsalýda. Oblys ákimdiginiń keńeıtilgen má­ji­lisinde óńir basshysy aldaǵy ýa­qy­tta «О́skemen – Semeı» joly men Osınov asýyndaǵy aınalma jolǵa kóńil bólýdi júktedi. Ob­lys ákiminiń aıtýynsha, keler jyly «Qalbataý – О́skemen» jo­­lyna jáne «Aqsýat – Aıagóz» joly­nyń 69 shaqyrymyna jóndeý júr­giziledi. – Joldy jóndeýde qıyrshyq tas paıdalanylatyn mastıkaly asfaltty keń qoldaný kerek. Eýropada jol tósenishiniń osy túri kóp qoldanysqa ıe. Baǵasy qymbat bolsa da, sapasy áldeqaıda joǵary, – dedi jol qurylysy operatorlaryna D.Ahmetov. Dýman ANASh, «Egemen Qazaqstan» Shyǵys Qazaqstan oblysy