Depýtattar dýblıajdaý jumysymen tanysty

Sh.Aımanov atyndaǵy «Qazaqfılm» AQ-qa  Parlament Májilisiniń depýtattary keldi. Ulttyq kınostýdııada Parlamenttiń áleýmettik-mádenı damytý komıtetiniń hatshysy Beıbit Mamraev, osy komıtettiń músheleri Káribaı Musyrman jáne Janat Omarbekova, Zańnama jáne sot-quqyqtyq reforma komıtetiniń múshesi Snejanna Imasheva, sondaı-aq, ekonomıkalyq reforma jáne aımaqtyq damý komıtetiniń múshesi Aızada Qurmanova boldy. Kezdesý barysynda depýtattar kınostýdııanyń jumysy­men, onyń jańa jobalarymen jáne kınoóndiris prosesimen tanysty. Sondaı-aq, qonaqtar dýblıaj­daýdyń barlyq túrlerine, ıaǵnı akterlik dybystaý, dıktorlyq dybystaý, sýbtıtrlaýǵa bólinetin qarajat týraly aqpar surady. Sıfrlyq keshenniń qyzmet­kerleri depýtattarǵa 2010 jyly «Qazaqfılm» kınostýdııasy tehnologııalyq bazasynyń jańa jaraqtandyrýdan ótkeni jaıynda maǵlumattar berdi. Máselen, kınostýdııa kınoóndiristiń óne boıynda kerekti zamanaýı kameralarmen, jaryq túsirý jáne dybys tehnıkasy, kompıýterlermen qamtamasyz etilgeni, óndiristik alańdardyń onyń ishinde pavılondar, sehtar, laboratorııalar, fılmoteka jóndeýden ótken. – Keńestik kezeńde kınostý­dııa jylyna 60-tan astam tolyq­metrajdy fılmdi dybystaıtyn. Biz qazir de qajetti ozyq tehnıkamen jabdyqtalǵanbyz, óndiristiń barlyq qyzmetin álemdik deń­geı­­ge sáıkes kórsete alamyz. Degen­­men, kınostýdııa udaıy teh­nı­kalyq jańǵyrýdan ótip turýy tıis, – deıdi «Qazaqfılm» kınostýdııasynyń aýdıovızýaldy jobalar jetekshisi Oljabaı Musabekov. Sondaı-aq, kınostýdııa qyz­metkerleri dybystaýǵa bólinetin qarajat máselesi jobaǵa baılanysty ár túrli bolatynyn, mysal retinde, bir fılmdi qazaq tiline akterlik dybystaý jasaý úshin 10 mıllıon teńge kóleminde qarajat ketetinin aıtty. Kezdesý sońyna qaraı Parla­ment Májilisiniń depýtattary lısenzııalanǵan Dolby qaıta dybystaý stýdııasyn aralap, «28 panfılovshy» fılminiń qazaq tiline dybystalý jumysyna kýá boldy. Esterińizge sala ketsek, ótken aptada Parlament Májilisiniń jumys toby ótkizgen otyrysynda «Qazaqstan Respýblıkasynyń mádenıet máselelerine qatysty birqatar zań aktilerine ózgerister men tolyqtyrýlar engizý týraly» depýtattyq zań jobasy qaralǵan bolatyn. Depýtattar, kıno men teatr salasynyń mamandary, azamattyq qoǵam jáne saıası partııa­lar ókilderi elimizdiń ádebıet jáne kıno, teatr, mýzeıleriniń jumys isteý barysy týraly ózgerister jaıyn talqylady. Osy oraıda 2017 jyldyń 1 qańtarynan bas­tap Qazaqstanǵa ákelingen barlyq fılmderdiń qazaq tiline dybystalý máselesi talas týdyrǵan bolatyn. Aınash ESALI, «Egemen Qazaqstan» ALMATY