QR World Botanic EXPO-2016 kórmesinde úzdik úshtikke kirdi

Túrkııanyń Antalıa qalasynda aıaqtalǵan «Antalıa EKSPO - 2016» halyqaralyq botanıkalyq kórmesinde qazaqstandyq pavılon qatysýshy 54 memlekettiń ishinen úshinshi oryn aldy, dep habarlaıdy QR BǴM baspasóz qyzmeti. Túrkııada alty aı boıy ótken World Botanic EXPO-2016 halyqaralyq mamandandyrylǵan kórmesinde qazaqstandyq pavılon baqsha ekstereri men ıntererin jasaý nomınasııasynda úshinshi oryn aldy. Qazaqstandyq pavılondy kórme barysynda 75 eldiń ókili tamashalaǵan. Qazaqstandyq pavılonnyń eksponattaryn QR BǴM Ǵylym komıteti janyndaǵy Botanıka jáne fıtoıntrodýksııa ınstıtýty ázirlep, kópshilikke usynǵan. Pavılon qonaqtary paleobotanıkalyq úlgiler jıyntyqtary túrinde jasalǵan Qazaqstannyń florasynyń tarıhymen tanysyp, «Qyzyl kitapqa» engizilgen sırek kezdesetin jáne joıylyp bara jatqan segiz aǵash tuqymdas ósimdik túrin kóre aldy. Marapattaý saltanatynda sóz sóılegen «Antalıa EKSPO-2016» uıymdastyrý komıtetiniń tóraǵasy, Túrkııanyń azyq-túlik, aýyl jáne mal sharýashylyǵy mınıstri Farýk Chelıktiń aıtýynsha, 191 kúnniń ishinde kórmege 4,5 mıllıonnan asa jergilikti jáne sheteldik qonaq kelgen. Keıbir kúnderi kórme qonaqtarynyń sany 70 myńnan asqan. «Antalıa EKSPO-2016» halyqaralyq botanıkalyq kórmesi óz jumysyn 22 sáýirde bastaǵan bolatyn. Kórme fılosofııasy - «Bolashaq urpaqtyń jasyl álemi», basty taqyryby - «Gúlder men balalar». Kórme aýmaǵy 120 gektardy qurady, onda 54 memlekettiń pavılony jumys istedi.