Bokstan eki dúrkin álem chempıony Nazym Qyzaıbaı mesenat Baýyrjan Ospanov salyp bergen úıin kórsetti.
QazAqparat tilshisine eksklıýzıvti sýretterin joldaǵan sportshy jańa baspanada óziniń ata-anasy turatyndyǵyn aıtty. 4 bólmeli jańa shańyraq Almaty oblysy Qarasaı aýdanyna qarasty Irgeli aýylynda salynǵan.
«Baýyrjan Keńesbekuly úıdiń qurylysyn tolyqtaı aıaqtap, kiltin tabystady. Qazir jıhazdardy alyp, yńǵaılanyp jatyrmyz. Baýyrjan aǵanyń qamqorlyǵyna, sportqa degen janashyrlyǵyna alǵystan basqa aıtarym joq. Kólikti de áperdi, endi mine úı salyp berdi. Artqan úmitti aqtaýǵa bar kúsh-jigerimdi jumsaımyn», - dep sportshy qyz óz alǵysyn bildirdi.
Nazym Qyzaıbaı Almaty oblysy Ile Aýdany Jetigen aýylynda dúnıege kelgen. Otbasynda 6 aǵaıyndy. О́zi úıdiń 3-shi balasy. 23 jastaǵy sportshy qyz qazir sporttyq babynda. «Josparymda áli turmysqa shyǵý degen oı joq. Aldaǵy jarystarǵa daıyndalyp júrmin. Men ózim Alǵabastaǵy jeke páterimde turamyn. Al, Baýyrjan aǵa salyp bergen úıde ata-anam turady», - dedi Nazym Qyzaıbaı.
Esterińizge sala keteıik, Nazym Qyzaıbaı áleýmettik jelidegi jeke paraqshasyna jerlesi, belgili kásipker - Baýyrjan Ospanov úı salyp bergenin aıtyp, alǵysyn bildirgen edi: «Sálemetsizder me, meniń qurmetti ınsta oqyrmandarym. Men 2014 jyly birinshi ret Álem chempıonatyn utqanda Baýyrjan Ospanov aǵamyz maǵan kólik syılaǵan edi, al 2016 jyly mamyr aıynda ózimizdiń Astanada ótken Álem chempıonatynyń jeńimpazy bolyp, Álemniń eki dúrkin chempıony atanǵanda, maǵan jáne ata-ana, baýyrlaryma úlken úı salyp beremin degen edi. Mine, qazir sol úıge kóship keldik. Osyndaı aǵamyzǵa barlyq otbasymyzdyń atynan úlken rahmet aıtqym kelip otyr! Osyndaı Baýyrjan aǵamyzdaı, qazaqtyń sportqa degen barlyq jaǵynan kómektesip, kóńil bólip júrgen aǵalarymyzǵa myń da bir rahmet!!! Aman bolyńyz, Baýyrjan aǵa!».
Aıta ketý kerek, sport janashyry, Jetisý jeriniń týmasy - Baýyrjan Ospanovqa Qanat Islam da óz alǵysyn jaýdyrǵan bolatyn. Jəne mesenat óziniń jerlesterine de erekshe qamqorlyǵyn jasaýda. Qazir Almaty oblysy Alakól aýdany Jylandy aýylynyń halqyna bar jaǵdaı jasalǵan. Aýylda kınoteatr, sportzal, demalys alańy, toıhana syndy ózge de halyq úshin asa qajetti ǵımarattardyń barlyǵyn kásipker Baýyrjan Ospanov jóndep, el ıgiligine berdi. Oqýshylarǵa sapaly bilim berý maqsatynda aýylǵa qalanyń bilikti mamandaryn mesenat ózi arnaıy shaqyryp, jańa baspana salyp, barlyq jıhazǵa deıin alyp bergen. Jalaqylaryn da birneshe ese ósirgen muǵalimder qaladan tek chemodanmen kelgenderin aıtqan edi.
