Qazaqstanda búrkitshilerdiń halyqaralyq týrnıri ótedi

5-6 qarashada elordanyń irgesinde tanymal qusbegi Kúntýǵan Toqtybaıuly atyndaǵy búrkitshilerdiń Halyqaralyq týrnıri jáne Astana qalasynyń ashyq birinshiligi  ótkiziledi, dep habarlaıdy egemen.kz QazAqparatqa silteme jasap. Belgili bolǵandaı, týrnırdiń alǵashqy kúni  búrkitti qolǵa shaqyrý, erkin ushyrý jáne shyrǵaǵa salý sııaqty saıystar bolady. Al, sońǵy kúni búrkitti qoıanǵa, túlkige salý syndy ańshylyqtyń eń qyzyqty sátterine kezek berilmek. «Kózi tirisinde baptap salǵan qyrany taǵy ańnan taısalmaǵan qusbegi Kúntýǵan aqsaqaldy eske túsirýge arnalǵan týrnır bıyl ekinshi márte uıymdastyrylyp otyr. Bul jarys alǵashqy  jyly respýblıka kóleminde ótse, bıylǵy jyly Halyqaralyq týrnır deńgeıine qadam basty.  QR Ulttyq sport túrleri qaýymdastyǵy uıymdastyrǵan bul týrnırge  bıyl kórshiles Mońǵolııa jáne Qyrǵyzstan elderiniń búrkitshileri men elimizdiń barlyq oblystarynyń qusbegileri  qatysady dep kútilýde. Jarys ótkiziletin jer - Astanadan Qoıandy aýyly baǵytyna shyǵatyn «Sofıevka tas jolynyń» boıy»,-dep atap ótilgen QR Ulttyq sport túrleri qaýymdastyǵy baspasóz qyzmetiniń málimetinde. Eske salyp ótsek, Kúntýǵan Toqtybaıuly atyndaǵy búrkitshilerdiń alǵashqy jylǵy týrnırinde  elimizdiń toǵyz oblysynyń qusbegileri baq synaǵan.  Búrkitteri babynda bolyp, baqtary janǵan Taraz qusbegileri bas júldeni jeńip alǵan edi. Ekinshi oryn Astana búrkitshilerine, úshinshi oryn Pavlodar oblysynyń qusbegilerine buıyrǵan bolatyn.