Eriktiler eńbegi elendi

Dúnıejúzilik eriktiler kúni qarsańynda Din isteri jáne azamattyq qoǵam mınıstrligi men Qazaqstan jastar kongresi birlese otyryp, «Úzdik volenter-2016» baıqaýynyń jeńimpazdaryn anyqtady. Elordadaǵy Elbasynyń kitaphanasynda ótken sharada mınıstr Nurlan Ermekbaev qoǵamnyń úzdik belsendi jastaryn marapattap, eriktilerdiń erik-jigerin janydy. Baıqaý uıymdastyrýdaǵy basty maqsat – jyl on eki aı boıy san túrli qoǵamdyq sharalardyń merekelik leppen, joǵary deńgeıde ótýine únemi at salysyp júretin eriktiler uıymdary men eriktilerdiń aralarynan úzdikterdi anyqtap, eńbekterin eskere otyryp, ózgelerge úlgi etý bolatyn. Elimizdiń eń belsendi ári eń maqtaýly eriktilerin marapattaý rásiminde sóz alǵan mınıstr Nurlan Baıuzaquly volenterlik qyzmettiń arman, maqsattardy júzege asyrýǵa taptyrmas múmkindikter beretinin atap ótti. «Eriktilik – adamdar aldynda ǵana emes, ózińniń aldyńdaǵy da úlken jaýapkershilik. Volonter bolý, tek shyǵarmashyl bolýmen nemese belsendi is-áreketpen shektelmeıdi. Ondaı bolý úshin batyl minezdi ári soǵan laıyqty bolýyń kerek. Shyn júrekten jumys jasaıtyn barlyq eriktiler – erik-jigeri mol, shynaıy ári ashyq jandar. Bizdiń qoǵamdaǵy árbir erikti árkez qurmet pen qoldaýǵa turarlyq jastar ókilderi», – dedi mınıstr. Sodan keıin N.Ermekbaev respýb­lıka óńirlerinen baıqaýǵa qatysqan 150-den astam úmitker ishinen iriktelip, I orynǵa laıyq dep tanylǵan Latıf Parpıev pen Arýjan Qurymbaevany jáne «Bolashaq» volenterlik ortalyǵyn baǵaly syılyqtarmen marapattady. Sondaı-aq, bizdiń qoǵamda kóp rette eriktilerdiń eńbegi eleýsizdeý qalyp jatqanymen, olardyń ıdeologııalyq úgit-nasıhat jumystaryndaǵy qyz­me­tiniń mańyzy orasan ekendigin atap ót­ken Májilis depýtaty Baqtııar Mákenuly jeńimpaz jastardy quttyq­tap, qýanyshyna ortaqtasty. Ol óz só­zinde elimizdegi erikti jastardyń osy kúnderdegi qozǵalysy qoǵam nazary­nan tys qalmaı, kerisinshe, alys aýyldar men shalǵaı eldi mekenderde de qyzý qoldaý taýyp otyrǵandyǵyn tilge tıek etti. «Ásirese, Memleket basshy­sy bizdiń jastarymyzǵa qarata aıtqan izgi tilekke toly sózderi men olar­dyń maqsat-mindetterin aıqyndaýǵa qatysty ozyq oılary keıingi tol­qyn ini-qaryndastarymyzdy jigerlen­dire túsetini sózsiz. Onyń ústine Pre­zıdentimiz jańa zamannyń jas býyndaryna senim artyp, bolashaqtarynan zor úmit kútedi. Sondyqtan da osy senim údesinen shyǵý úshin jastarymyz bilimdi ári belsendi bolýy kerek dep izgi nıetin bildirip, jeńimpazdarǵa tıesili júldelerin tabystady. Aıta keteıik, búgingi tańda elimizdiń barlyq aımaqtarynda EKSPO-2017 halyqaralyq kórmesi men Almatyda ótetin Ýnıversıadaǵa eriktilerdi daıyndaý klýbtary qyzý jumys júrgizýde. Osyndaı sharalardy qoldap, qýattaý maqsatynda uıymdastyrylǵan bul baıqaýdyń jalpy júlde qory 360 myń teńgeni qurady. Nurlybek DOSYBAI, «Egemen Qazaqstan»