Qostanaıda belgili sýretshi, Qazaqstannyń eńbek sińirgen qaıratkeri, «Qurmet» ordeniniń ıegeri Marat Toqseıitovtyń jeke kórmesi ashyldy. Qylqalam sheberi kórmeni «Týǵan ólkem» dep atapty. Rasynda, Marat Tólegenuly Qostanaı oblysynyń Qarabalyq aýdanynda týyp ósken. Kórmege ilingen shyǵarmalaryna ol týǵan aýyl kórinisterin arqaý etipti. Polotnodaǵy aýyldyń shynaıy kórinisteri aýylda ósken kez kelgen kisiniń júrek qylyn shertip turǵandaı.
Marat Toqseıitovty oblys ákiminiń orynbasary Marat Júndibaev kórmeniń ashylýymen jáne el Táýelsizdiginiń 25 jyldyq merekesimen quttyqtady. Aldaǵy jyldyń basynda 70-ke tolǵaly otyrǵan sýretshi shyǵarmashylyǵyna tabystar tiledi. Kórmege sýretshi maqtanysh tutatyn jerles kórermenderi, Marat Tólegenulynyń qostanaılyq áriptesteri de jınaldy. Belgili sýretshi Nıkolaı Torshın Toqseıitovty jıvopıs, peızaj janrynyń asa iri ókili dep atady.
-Marat Tólegenulynyń salǵan shyǵarmalary shynaıylyǵymen baýrap alady, aldyńda onyń qylqalamynan shyqqan sýret emes, tiri ómir turǵandaı sezimde bolasyń, - dedi Nıkolaı Vasılevıch.
-Aldaǵy qańtar aıynda Astanada kórmem ashylady. Men kórmemniń aldymen týǵan jerimde ótkenin qaladym, mine, qostanaılyqtarǵa sońǵy kezdegi týyndylarymdy usynyp otyrmyn, - dedi sýretshi. Onyń shyǵarmalary kóptegen halyqaralyq kórmelerge qatysty. Sýretshi 2001 jyldan bastap memlekettik rámizder jónindegi memlekettik komıssııanyń múshesi.
Názıra Járimbetova,
"Egemen Qazaqstan".
Qostanaı
