«Jankúıerlerimizdi jerge qaratpaýǵa umtylamyz»

– deıdi kerlıngshi Ramına IýNIChEVA Bul kúnderi qazaqstandyq kerlıngshiler qysqy Ýnıver­sıadaǵa daıyndyqtyń qorytyn­dy kezeńine kiristi. Olar ótken jyldyń qarasha aıynda Ońtústik Koreıada oqý-jattyǵý jıynyn ótkizip, Tynyq muhıty-Azııa oıyndarynda óner kórsetip qaıtty. Qazaqstanda kerlıng óte qarqyndy damyp kele jatqan sport túrleriniń biri bolyp tabylady. 1998 jyldan bastap osy sport túri Olımpıada baǵ­darlamasyna engizilgen bolatyn. Almatynyń qysqy Ýnıver­sıadany ótkizýge quqyq alýy elimizde kerlıngtiń damýyna taǵy bir serpin beredi. Qazaqstan Ker­lıng qaýymdastyǵynyń bas hatshysy Vıktor Kımniń aıtýynsha, qysqy Ýnıversıadaǵa bıik maqsattardy kózdegen jas komanda qatyspaqshy. – Biz Qazaqstannyń toǵyz aımaǵyndaǵy sportshylardan ulttyq quramany jınadyq. Olardyń barlyǵy kerlıng dese, isher asyn jerge qoıatyn, osy sport túrimen shuǵyldanǵysy keletin qyz-jigitter. Koman­damyzda qazir 20 adam bar, bar­lyǵy óner kórsetýge saqa­daı daıyn otyr. Alaıda, olar­dyń kerlıngpen aınalysyp júrgenine bar-joǵy 1-2 jyl ǵana bolǵanyn eskerý qajet. Al Ýnıversıada kezinde álemdik deńgeıdegi komandalar qashanda kúshti qurammen qatysady. Ýnıversıada – mańyz­dylyǵy jaǵynan Olımpııa oıyndarynan keıin ekinshi orynda turǵan jarys. Oǵan Reseı, Shveısarııa, Chehııa, Germanııa, Shve­sııa, Kanada, Ońtústik Koreıa, Japonııa sekildi elderden álem­niń myqty komandalary qaty­sady. Árıne, olarmen básekege túsý qıyn bolmaq, alaı­da, biz bú­kil kúshimizdi salamyz, – dedi ol. Qazaqstannyń kerlıngten ulttyq qurama músheleri osyndaı aýqym­dy sport básekesinde el namysyn aıan­baı qorǵaýdy nıet tutyp otyr. – Ýnıversıadaǵa daıyn­dyǵymyz qyzý júrip jatyr. Jarystar jaqyndaǵan saıyn bárimiz tolqyp júrmiz, óıt­keni, óz elimizde saıysqa túsý – biz úshin úlken jaýap­ker­shilik. Bizdiń oıyndarymyzdy jan­kúıerlerimiz tamashalaı­tyndyqtan, bar kú­shimizdi salyp, aıanbaı oıyn kór­setýimiz qajet, – deıdi Qazaq­stan­nyń ker­lıngten  áıelder qura­ma­synyń skıbi Ramına Iýnı­cheva. Ýnıversıada-2017 aıasyn­daǵy kerlıng jarysy «Al­maty-Are­na» kesheniniń tegis muz tósel­gen stadıonynda ótedi. Aınash ESALI, «Egemen Qazaqstan»