Aýrýhana ortalyq jylý júıesine qosyldy

Semeıdegi jedel járdem aýrýhanasy 2013 jyly paıdalanýǵa berilgen. Áleýmettik nysan ortalyqtandyrylǵan jylý júıesine bıyl ǵana qosyldy. Áý basta osy aýrýhanany ashqan kezde elektr qýaty arqyly jylýmen qamtylýy tıis degen joba bekitilip ketipti. Biraq bul tıimsiz boldy, bar bolǵany eki-úsh jyl ishinde jylý aqysy mıllıondap ósip, memleket qazynasyna orasan zor shyǵyn ákelgen. Naqty aıtsaq, aýrýhana buǵan deıin jylýǵa aıyna shamamen 37-40 mln teńge tólep kelipti. 2015 jyly oblys basshysy Danıal Ahmetov aýrýhana ujymy ótinish jasaǵannan keıin, birden osy jaǵdaıdy tikeleı nazaryna alyp, jylýdy ortalyqtandyrylǵan júıege qosý qajettigin jáne sol úshin buryn bolmaǵan jylý qubyrlaryn tartýdy usyndy. Oblys basshysynyń tapsyrmasynan keıin qysqa merzimde jo­balyq-smetalyq qujattama daı­yndalyp, aýrýhanany jaqyn mań­da­ǵy «5-ınternat» qazandyǵyna qo­sý jumystary bastaldy. Sóı­tip, uzyndyǵy 2 700 metr jy­lý jelisi tartylyp, aýrýhana or­ta­lyq­tandyrylǵan jylý júıe­si­­ne qosyldy. Bıyldan bastap jy­lý úshin jumsalatyn shyǵynnyń kó­lemi 5-6 esege azaıatyn bolyp otyr. – Buryndary aı saıyn jylýǵa 40 mln teńgedeı tólep keldik. Endi bıyldan bastap aıyna 6-7 mln teńge ǵana tóleımiz degen úmitimiz bar, – dedi Jedel medısınalyq ortalyq dırektory Qaınollan Mýsın. – Buryn barlyq qarajatty jylýǵa berip qoıyp, qarap otyratynbyz. Bul óte tıimsiz boldy. Endi únemdelgen qarjy naýqastardy emdeýge, aýrýlardyń aldyn alýǵa, aýrýhanaǵa jańa tehnologııalar men dárilik preparattar alýǵa jumsalatyn boldy. Eń aldymen, óz atymnan jáne ujym atynan osy ýshyqqan máseleni basty nazaryna alyp, durys sheshim jasaǵan oblys ákimi Danıal Ahmetovke alǵysymyzdy aıtamyz. Aýrýhana 325 orynǵa arnalǵan. Oblystaǵy eń iri emdeý mekemesi qazirgi zamanǵy medısına talap­taryna saı jumys istep tur. Mun­daǵy gematologııalyq bólimde qa­zir 16 adam em qabyldap jatyr. Orta­lyq­tandyrylǵan jylý júıe­si­ne qosylǵannan beri aýrýhana ishi bir­qalypty jyly. – Dárigerlerdiń qyzmet kórsetýi kó­ńilimizden shyǵady, – deıdi em­delýshi Tamara Borısovna, – palata­lar da jylynyp qaldy. Osynda bir jyl buryn jylýǵa kóńilim tolmaǵan edi. Em qabyldap jatyrmyz. Bári unaıdy. Qyzmet sapasy da durys. Raýshan NUǴMANBEKOVA SEMEI