Sekseýil sırep barady

Qaıbir jyly Talas aýdany, Úsharal aýylynyń joldaryn qum kóshkini basyp qalǵanda jergilikti jurt oblys basshylarynan kómek surap, áreń degende ashyp alǵan bolatyn. Sonda mamandar qum kóshkininiń bulaısha aýylǵa basyp kirýiniń bir sebebin osy mańda sekseýildiń tym sırep, dalanyń jalańash qalýymen túsindirgen edi. Shynynda shól dalaǵa «shóp» bolyp, shyraıyn keltirip, keı jerlerde bıiktigi 10 metrge deıin jetetin sekseýildi jappaı otaý – qurǵaqshylyq pen qum kóshkinine, tabıǵattyń tepe-teńdiginiń buzylýyna alyp keledi. Búginde Jambyl oblysynda sekseýil ormanynyń qory 1126,4 myń gektardy quraıdy eken. – Desek te sekseýil ormanyn tek otyn retinde ǵana kórip, múmkindiginshe otap alǵysy keletinderdiń joly birjolata kesilmeı tur, – deıdi Jambyl oblysy prokýrorynyń aǵa kómekshisi Dastan Asqar. – Áli de keń alqapty qorǵaý, baqylaý máselesi tolyq sheshilmegen. Jaz kúnderi tilsiz jaý da aıaq astynan órship, qanshama alqapty órt qushaǵyna orady. Osy tusta jyl saıyn sekseýildi paıdalaný kóleminiń artyp kele jatqany da qatty alańdatady. Mysalǵa, 2014 jyly 12 myń tekshe metr sekseýildi kesýge ruqsat berilse, 2015 jyly bul kólem 16 myńǵa, ótken jyly 22 myńǵa ósti. Bul óte qaýipti jaǵdaı. Oblystyq prokýratýranyń málimetine qaraǵanda, sońǵy úsh jylda sekseýildi zańsyz kesý, tasymaldaý boıynsha 270-ten astam oqıǵa tir­kel­gen. Bul shamamen 500 tekshe metrden as­tam sekseýil zańsyz kesildi degen sóz. 56 fakti boıynsha qylmystyq is qoz­ǵaldy. Árıne, sekseýildi egý, kóbeıtý baǵy­tynda da kóptegen jumystar atqary­lýda. Sońǵy bes jylda 30 myń gek­tardan astam jerge sekseýil egilgen. Biraq, tabıǵatqa bas-kóz bolatyn qoryqshylardyń azdyǵy, bul baǵyt­taǵy jumystardyń tıimdi jolǵa qoıyl­maýy sekseýildiń sıreýin jedeldete túsýde. «Sondyqtan bul máselege tyń kóz­qaraspen qarap, jumysty jandandyrý qajet», deıdi prokýratýra qyzmetkerleri. Oralhan DÁÝIT, «Egemen Qazaqstan» Jambyl oblysy