Beıbit shara, ımandy is – elimizge tán

Áne-mine degenshe bizdiń elimizge de kezek keldi. Iá, jas respýblıka, egemendigin qaıtaryp alǵan memleket retinde bizdiń de kóshemizde búgin toı bolyp jatyr. Qańtardyń alǵashqy on kúndiginde Qazaqstan 2017-2018 jyldar kezeńinde BUU Qaýipsizdik Keńesiniń turaqty emes múshesi retinde ókilettikteriniń bastalýyna oraı birinshi otyrysyn ótkizdi. Oǵan udaıy múshe bes memleket, ár kontınetten barlyǵy on memleket qatysty. Dál osy tusta Qazaqstan Pre­zıdenti Nursultan Nazarbaev BUU Qaýipsizdik Keńesine saıası Úndeý jarııalady. Onda elimizdiń moınyna artqan joǵary jaýapkershilik pen halyqaralyq qoǵamdastyqtyń bizdiń elimizge, onyń beıbitshil saıasatyna senimi erekshe atap ótildi. Nıý-Iorktegi bas keńsede kún tártibine oraı birneshe másele qaraldy. Jalpy, Qaýipsizdik Keńesi jumysynyń rettik tártibi, eń aldymen, keńesýden turatynyn eske salaıyn. Ekinshi kezeńde pikir­ler saıysyna – debattarǵa, talqy­laýǵa kezek beriledi. Al úshinshi ke­zeńde qarar qabyldanady, BUU Qaýip­sizdik Keńesiniń qarary oryn­dalýy kerek, óıtkeni, ol halyq­aralyq quqyqtyń talaptary bolyp tabylady. Talaptar oryndalmasa, sanksııa salynýy ábden múmkin. Tipti, qatty ketse, ol aýmaqqa tártip ornatatyn kúsh te jiberiledi. Al endi soǵan qaramaı, álemde mundaı qararlardy oryndamaıtyn memleketter de kezdesip qalady. Birikken Ulttar Uıymynyń tarıhynda mundaı da oqıǵalar qaıtalanyp turady. Sonymen, bizdiń arnaıy jumys tobymyz bar, kún tártibimiz bekitilgen. Endi soǵan sáıkes qurylǵan tapsyrmalardy oryndaýǵa mindettimiz. Alǵashqy otyrysta osyǵan oraı on bes memlekettiń ishinde keńesý ótti. Keńesýge túsken basty másele – Sırııada hımııalyq qarý bar ma, joq pa, bar bolsa qandaı dárejede, ILIM (DAISh)-men eldegi qantógisten bolǵan qasirettiń aýqymyn anyqtaý edi. Munyń syrtynda Somalıdegi azamat soǵysy, Ortalyq Afrıkadaǵy tózgisiz jaǵdaılar – bári-bári ózge de máseleler qatarynda kún tártibine qoıylǵan. Men muny úsh kezeńdi jumys talqylaý úderisi der edim. Buǵan qosa, osy arada Qazaq­stannyń burynnan da moınyna alǵan mindettemeleri bar ekenin, ol óńirdegi memleketterge septigin tıgizý bolyp tabylatynyn da qaperge ile keteıin. Ol – Aýǵanstandaǵy ahýaldyń jaqsarýyna kómektesý. Qazirdiń ózinde bizdiń memleketimiz aýǵandyq 1000 stýdentke grant berdi. Olardyń birazyna men ózim dáris berip júrmin. Sol sııaqty kórshimiz – qýaty báseń Qyrǵyzstan memleketine de kómek qajet. Budan basqa tolyp jatqan is-sharalardyń qatarynda halyqaralyq marketıngtik ádisterge barýǵa májbúrmiz. Ony da eskereıik. Máselen, BUU-nyń aqshasyna bıdaı ósirip, nan satýdyń nesi aıyp?! Beıbitshilik shara, ımandy is, kómek qolyn sozý – jas Qa­zaq­stanǵa tán qasıet. Osy aıdyń aıa­ǵynda Astanada Sırııadaǵy soǵy­sýshy taraptar bas qosyp kelisýi kerek. Búgin oǵan kúlli álem mem­leketteriniń nazary aýyp otyr. Olar ymyraǵa kele me, kelmeı me bel­gisiz, óıtkeni, olardyń ishinde esh­kimge de baǵynbaıtyn toptar bar. Biraq, soǵystan sharshaǵan halyq­ty beıbit ómirge tartý álem tanyǵan Qazaqstannyń moınynda tur. Sırııada beıbitshilik ornatý ońaıǵa túspesi anyq. Taǵy bir aıtarym, Ýkraınadaǵy jaǵdaı da kún tártibinen túspeı kúıip tur. Ýkraına basshysy bizge senedi. Sol sekildi Reseı men Batys ta bizge senim artyp otyr, endeshe, Ýkraınaǵa bir jaqsylyq jasaý ıgilikti mindet. Árıne, mundaı álemdik shıelenisti faktorlarǵa birkelki kepildik berý ońaı da, múmkin de emes, degenmen, Qazaqstan tarapynan munyń barlyǵy úshin áreket etý nıeti bar. Ázimbaı ǴALI, saıasattanýshy ALMATY