«Qorǵas – Shyǵys qaqpasy» aımaǵyna bólingen qarjy ıgerildi

«Qorǵas – Shyǵys qaqpasy» arnaıy ekonomıkalyq aımaǵyna bólingen 36,8 mlrd teńge tolyq ıgerildi. Bul týraly búgin Parlament Májilisinde ındýstrıaldyq jobalardyń qurylysyn baqylaý komıssııasynyń otyrysynda «Samuryq-Qazyna» AQ atqarýshy dırektory Nurlan Rahmetov málimdedi, dep habarlady QazAqparat. «Respýblıkalyq bıýdjetten atalmysh jobany júzege asyrýǵa 36,8 mlrd teńge bólingen jáne olardyń barlyǵy ınfraqurylym qurylysyna baǵyttaldy. Qurlyqtyq port QTJ kompanııasynyń qarajaty esebinen qarjylandyryldy. Arnaıy ekonomıkalyq aımaqtyń ózi úsh bólikten turady – qurlyqtyq port, logıstıkalyq aımaq jáne ındýstrıaldy aımaq. Qazirgi ýaqytta «Qorǵas – Shyǵys qaqpasy» arnaıy ekonomıkalyq aımaǵyna bólingen 36,8 mlrd teńge qarajat tolyq ıgerildi», – dedi Nurlan Rahmetov. Onyń aıtýynsha, AEA ınfraqurylymynyń josparlanǵan barlyq 68 nysany paıdalanýǵa berildi. «Bólingen 36,8 mlrd teńgeniń tek 82,5 mln teńgesi qazynada qalyp otyr. Ol arnaıy ekonomıkalyq aımaqty basqarýdyń aqparattyq júıesin qurýǵa baǵyttalady», – dep atap ótti ol. «Samuryq-Qazyna» AQ atqarýshy dırektory bul jumystar bıyl qańtar-aqpan aılarynda aıaqtalatynyn aıtty.