Elbasy Nursultan Nazarbaevtyń ulystyń uly kúninen keıingi jumys sapary beısenbi kúni Almatyda jalǵasty. Prezıdent «Dostyq úıin» saltanatty túrde ashty. Bul ǵımarattyń ultymyz úshin de, Qazaqstanda aýyzbirshilikpen ómir súrip otyrǵan ulystar úshin de orny bólek. «Dostyq úıinde» táýelsizdikti tatýlyqpen tuǵyrly etý sharalary udaıy talqylanyp qana qoımaı, naqty iske asty. Basqasyn aıtpaǵanda, Táýelsiz Memleketter Dostastyǵyn, ıaǵnı TMD-ny qurý týraly taǵdyrsheshti sheshimniń osy úıde qabyldanǵany, qujattarǵa osy ǵımaratta qol qoıylǵany belgili.
Elbasy Nursultan Nazarbaev beısenbi kúni qaıta jóndeýden ótken, resmı túrde «Dostyq úıi – etnosaralyq qarym-qatynastardy zertteý jónindegi ortalyǵy» dep atalatyn ǵımarattyń qaıta ashylý rásimine qatysty. Bul ǵımarat eki jyldan beri kúrdeli jóndeýden ótkizildi. Naýryz aıynda qaıta salynǵandaı jańǵyryp shyǵa kelgen «Dostyq úıi» bul kúni óz shejiresindegi aıtýly sátterdi bastan ótkerdi. Ǵımarattyń keń hollynda Qazaqstanda yntymaqpen ómir súrip jatqan ulttardyń kórmesi uıymdastyryldy. San-alýan mádenı órnekpen birin biri baıytqan kórme barshamyzdyń ortaq baılyǵymyz degendeı, bul shara kóńilge shýaq uıalatty. Báıdibek baba aıtqandaı: «Bir úıdiń balasyndaı, bir qoldyń salasyndaı» deıtin salıqaly basqosý, emen-jarqyn, rııasyz júzdesýler – búgingi Qazaqstannyń tynys-tirshiliginiń jarqyn kórinisi ispetti áser qaldyrdy.
Sonymen, eleýli sharaǵa Qazaqstan halqy Assambleıasynan saılanǵan birqatar Májilis depýtattary, etnomádenı birlestikterdiń jetekshileri men ókilderi jáne Mádenıet mınıstri Muhtar Qul-Muhammed pen qala ákimi Ahmetjan Esimov qatysty.
Nursultan Nazarbaev «Dostyq úıiniń» qaıta jóndeýden ótkizilgen ǵımaratyn aralap kórip, etnomádenı birlestikterdiń ókilderimen áńgimelesti, oı bólisti.
Aıtýly oqıǵa barysynda Elbasy tarıhymyzdyń tamasha jádigeri – saq dáýirinen qalǵan Altyn adamnyń rekonstrýksııalanǵan jańa kóshirmesine nazar aýdardy.
Qurmanǵazy kóshesindegi talaı keleli jıyndardy qabyldaǵan bul ǵımaratta Qazaqstan halqy Assambleıasynyń basshylyq organdary, 19 etnomádenı birlestik, memlekettik jáne túrli etnos tilderin oqytýmen aınalysatyn 9 jeksenbilik mektep ornalasqan. Dostyq úıiniń ǵımaraty 1999 jyly Úkimettiń arnaýly qaýlysymen Qazaqstan halqy Assambleıasynyń jetekshi organdarynyń quzyryna berilgen bolatyn.
«Dostyq úıiniń» jumysynyń basty baǵyty men qyzmetiniń maqsaty – otandyq mádenıet pen ǵylymdy damytýdaǵy óndiristik-sharýashylyq qyzmetterdi júzege asyrýǵa qoldaý kórsetý ekenin de aıta ketý kerek.
Búginde «Dostyq úıinde» ultaralyq qatynastar problemasyn zertteýmen aınalysatyn ortalyq jumys isteıdi, ol Qazaqstan halqynyń tilderi men mádenıetin jandandyrý jónindegi áleýmettik baǵdarlamalardy júzege asyrýǵa, ultaralyq qatynastar men qoǵamdaǵy etnomádenı baılanystardy nyǵaıtý máseleleri boıynsha ǵylym men mádenıet salasynda ǵylymı zertteý qyzmetin júrgizýge atsalysady.
«Dostyq úıi» 1972 jyly sáýletshiler R.Seıdalın, L.Tımchenko jáne H.Iаkýpbaevtyń jobasy boıynsha salynǵan eken. Sáýlet óneriniń de tamasha týyndysyna aınalǵan ǵımaratqa 1974 jyly Qazaq KSR Memlekettik syılyǵy berilgen. 2006 jyldyń 29 jeltoqsanynda «Dostyq úıi» RMK bazasynda Ultaralyq qatynastar problemasyn zertteý ortalyǵy quryldy.
Táýelsizdik tusynda ǵımaratty qaıta túletip, kúrdeli jóndeý júrgizý úshin 2008-2010 jyldary 726 mıllıon teńge bólindi. Kóktemmen birge, Táýelsizdigimizdiń 20 jyldyǵyna oraı, kórkem kelbetke kóshken «Dostyq úıi» ulttyq naqyshpen bederlengen.
Áý basta jobasy kıiz úı, kúmbezi shańyraqty etip kóterilgen ǵımarat barlyq kezde de tatýlyq shýaǵyn shashatyn kıeli úı bolyp qala bergeı!
Aınash ESALI, Almaty.
