Astana prosesine qatysýshylar elordaǵa jınaldy

Astana prosesine qatysýshylar kelissóz ótkizýge daıyndalýda. Bul týraly búgin QR Syrtqy ister mınıstriniń orynbasary Roman Vasılenko málim etti, dep habarlaıdy QazAqparat. «Sırııalyq retteý boıynsha kezdesý (Astana prosesi) Reseı men Túrkııa Prezıdentteriniń bastamasymen ótýde. Oǵan QR Prezıdenti Nursultan Nazarbaev jan-jaqty qoldaý kórsetken bolatyn. Bul rette Qazaqstan Respýblıkasynyń sırııaaralyq kelissózder úshin tek qana alań usynatyndyǵyn, kelissózder prosesine aralaspaıtyndyǵyn túbegeıli túsiný asa mańyzdy», - dedi ol. Vasılenkonyń sózine qaraǵanda, Astana prosesine Sırııa Úkimetiniń, qarýly sırııalyq oppozısııasynyń, Reseı, Túrkııa jáne Irannyń ókilderi qatysady. «Sonymen qatar, BUU Bas hatshysynyń Sırııa jónindegi arnaýly elshisi men AQSh-tyń Qazaqstandaǵy elshisi de qatysatyn bolady. Barlyq delegasııalardyń basshylary Astanaǵa qazirgi ýaqytta keldi jáne kelissózderdi bastaýǵa daıyndalýda. Kelissózder Astana ýaqytymen saǵat 13.00-de «Rıksos» qonaq úıi zaldarynyń birinde bastalady jáne 24 qańtar kúniniń sońyna deıin aıaqtalýy tıis», - dedi QR Syrtqy ister mınıstriniń orynbasary.