Eldi eleń etkizgen elik

Qysy qaharly Shyǵysta mundaı jaıttarǵa jergilikti jurttyń eti úırengen, kóp tańǵala bermeıdi. Desek te, «aýylǵa elik kirip ketti» degende eriksiz eleń ettik. Muny bizge Tarbaǵataı aýdanynyń Aqsýat aýylyn­da turatyn ardager áriptesimiz Hamza Sátıev habarlady.  – Ańshylardan qashty ma, ıt-qustan úrikti me eken, baq­shamyzǵa elik kirip ketti. Qorshaýdaǵy temir torǵa soǵy­lyp, jaralanyp qalypty. Ustap alyp, jeke qoraǵa qamap, shóp berip, úsh-tórt kún baqtyq. Betin­degi qany ketip, jarasy ja­zylǵandaı bolǵan kezde aýyldyń syrtyna Tana myrza aýyly jaqtaǵy shabyndyqqa aparyp, dalaǵa bosatyp jiber­dik, – deıdi áriptesimiz. Hamza Sátıevtiń aıtýynsha, eki kózi móldirep turǵan túz taǵysy balalardyń qolynan bosap shyǵa salysymen zymyraı jónelipti. Shamamen júz metrdeı jerge barǵannan keıin toqtap, artyna burylyp, sál qarap turypty da, en dalany betke alyp, qalyń shıge baryp sińip ketipti. «Qorada tur­ǵanda eliktiń qasyna baryp, shóp salyp, basynan sıpap, sýretke túsip, baýyr basyp qalǵan nemerelerim Iman­ǵalı men Aızere: «Álgi elik dalaǵa qashyp bara jatyp bizge burylyp, «saý bolyńdar» dedi ǵoı», dep maqtanady», dep aıaqtapty Hamza Sátıev aǵamyz bizge joldaǵan shaǵyn habaryn. Elik degenińiz janýardyń ishindegi sulýy ǵoı, shirkin!  Artyna burylyp qaraǵany, perishte kóńil balalar men keń peıildi jýrnalıst-otaǵasyna jetkizgen alǵysy shyǵar. О́zinen góri jurttyń qamyn kóp oılaıtyn jýrnalıst qaýymy shynynda da ańqyldaǵan, alǵaýsyz halyq qoı. Túz taǵysy da sirá, sony sezgen bolar. Azamat QASYM, «Egemen Qazaqstan» Shyǵys Qazaqstan oblysy  Sýretti túsirgen Hamza SÁTIEV