Osydan úsh jyl buryn ataqty Tóle bıdiń shapany tabylyp, onyń mýzeıge alynǵany týraly aqparat ázirlep bergenimizde, «Feısbýktaǵy» qurdastarymyzdyń biri ázildep, «Baraholkadan satyp alǵandaı jap-jańa eken» dep jazyp edi. Mine, Ulttyq mýzeıde turǵan qundy jádigerlerdiń «túpnusqalaryn» da oqyrmandarǵa usynamyz.
Bul sonaý HVIII ǵasyrdan jetken jádiger. Ataqty Abylaı hannyń shapany. Qyzyl kúreń tústi púlishten, ishkiligi jibek matadan tigilgen. Aldyńǵy eki óńir, artqy boı, eki jeń, tik jaǵadan turady. Aldy ashyq jelbegeı, qaýsyrmaly, qoltyq astynan bastap etek jaǵyna deıin úshkildenip qıylǵan. Shapannyń jaǵasy, óńiri, jeń jıekterinde altyn jippen eki qatar syzyq júrgizilip, ortasyna «tolqyn» tárizdi órnekter beınelengen. Ishki syzyqty boılaı shyrmaýyq gúl úlgisinde oıý salynǵan.
«Ulttyq murajaıdyń Qazaqstan tarıhy zalynda turǵan bul qundy murany 2006 jyly Hamze Sátjanuly – «Nazarbaev ortalyǵyna» amanat etip tapsyrǵan eken. Hamze Sátjanuly – Abylaı hannyń segiz bıiniń biri jáne han keńesiniń múshesi Baıdaly Bekeshulynyń tikeleı urpaǵy. Memleket jáne qoǵam qaıratkeri Myrzataı Joldasbekov jáne jazýshy Aqseleý Seıdimbek aǵalarymyzdyń bastamasymen mýzeıge alynǵan bul jádiger qazirgi kúni halyqtyń murasyna aınaldy», deıdi Ulttyq murajaıdyń Qazaqstan tarıhy bóliminiń ǵylymı qyzmetkeri Roza Kenjebekova.
«Sheshendik sózder» atty kitapta (qurastyryp, alǵysózin jazǵan B.Adambaev. Almaty. 1967) han Abylaıdyń shapany mura bolyp Ýálı hanǵa aýysqany, Ýálı han qaıtqan soń, báıbishesi Aıǵanym ony Baıdaly bıge tartý etkeni týraly derek bar.
Shapandy qaıta jańǵyrtýdan ótkizgen sheber Tursynkúl Jaılaýbaeva.
Aıgúl SEIILOVA,
«Egemen Qazaqstan»
Sýretterdi túsirgen
Orynbaı BALMURAT,
«Egemen Qazaqstan»
