Qazaqstanda áreketsiz ÚEU-lar jabylady

Qazaqstanda áreketsiz úkimettik emes uıymdardy jabý boıynsha iri jumys bastaý alady. Bul týraly búgin Úkimet otyrysynyń qorytyndysy boıynsha ótken baspasóz konferensııasynda QR din isteri jáne azamattyq qoǵam mınıstri Nurlan Ermekbaev aıtty. Mınıstrdiń aıtýynsha, qazirgi tańda ÚEU júıesindegi kemshilikterdiń biri – tirkelgen uıymdardyń shamamen jartysynyń is júzinde áreketsiz ekeninde. Bul esepke alýda jańylysýǵa, kúmándi aqparattyń shyǵýyna jáne azamattar men ÚEU-dyń durys baǵyttan adasýyna ákelip soǵady. «Sol sebepti, bizdiń aldymyzda osy júıeni retke keltirý mindeti tur. Ol úshin ÚEU-dy qurýǵa atsalysqan azamattar olardy jabý týraly sheshim qabyldaýy kerek nemese jumys istep bastaýy qajet. Qazir biz azamattar men ÚEU-ǵa túsindirý jumystaryn belsendi túrde júrgizýdemiz, degenmen, óziniń ári qaraıǵy qyzmetinen mán-maǵyna kórmeıtin ÚEU úshin biz qarjy jáne ádilet mınıstrlikterimen olardyń qandaı da bir jaýapkershiliksiz jabylýy úshin jumystar atqarýdamyz», - dedi N. Ermekbaev. Sondaı-aq, mınıstr ÚEU-dyń derekter bazasy da úlken ózgeristerge ushyraıtyny týraly aıtyp ótti. «Biz qazir ony elektrondy formatqa aýystyrý jumystaryn júrgizýdemiz. Bul tehnıkalyq jáne baǵdarlamalyq qamtamasyz etýdi talap etetin kólemdi jumys», - dedi N. Ermekbaev.