Dımash Qudaıbergen Ýnıversıadanyń ashylýynda óner kórsetedi

Qytaıdyń Chańsha qalasynda ótip jatqan án baıqaýynyń alǵashqy eki kezeńinde jeńiske jetken Dımash Qudaıbergen Almatyǵa keldi. El namysyn qorǵap júrgen ánshimiz búgin Ýnıversıadanyń ashylý saltanatyna qatysyp, tikeleı efırde óner kórsetetin bolady. «Ýnıversıadaǵa qatysatyn barlyq qatysýshylarǵa sáttilik, Qazaqstanǵa jeńis tileımin! Men sizdermen birgemin!» – dep jazdy ınstagram paraqshasynda. Al ánshiniń basy-qasynda júrip, tilmashtyq qyzmet atqaryp júrgen prodıýser Alpamys Sharımov ınstagram paraqshasynda: «Biz Ýnıversıadaǵa daıynbyz. Saǵynyshpen Almatyǵa keldik. Sportshylarymyzǵa sáttilik tileımiz! Kók baıraǵymyz kókte jelbiresin! Dımash búgin tikeleı efırde óner kórsetetin bolady. Jasa qazaq! Alǵa, Qazaqstan!» – dep jazdy. Aıta keteıik, Dımash Qudaıbergen Qytaıdyń Hunan TV basty oıyn-saýyq telearnasyndaǵy «I am a Singer-2017» mýzykalyq shoýyna qatysyp júr. Alǵashqy kezeńde «SOS d'un terrien en détresse» ánin shyrqasa, keshe Vıtastyń «Opera №2» ánin oryndap, qos kezeńde de birinshi oryn aldy. Bul konkýrsta barlyǵy 14 kezeń bar.