«Barselona» tóreshiler qateliginen birneshe jeńisinen aıyrylǵan

Ispanııanyń Mundo Deportivo basylymy «Real» men «Barselona» komandalarynyń ishki birinshiliktiń alǵashqy aınalymdaǵy oıyndaryn zerttep shyqty. Bul týraly eurosport.com habarlady. Mamandardyń pikiri boıynsha «Barselona» komandasy tóreshilerdiń qateliginen osy maýsymda 6 upaıynan aıyrylypty. Al olardyń basty qarsylasy «Real» kerisinshe 8 upaı artyq jınaǵan. Mundo Deportivo «Real» – «Selta» matchynda shabýylshy Alvaro Morata ofsaıdtan dop soqqanyn, sondaı-aq komanda kapıtany Serhıo Ramos ta «Malagaǵa» qarsy kezdesýde jeńisti goldy osyndaı sátten salǵanyn jazǵan. Budan bólek, atalǵan basylym «Espanol» men «Deportıvo» ujymdaryn da arbıtrdiń qateliginen utqanyn jazǵan. Al «Barselonanyń» oıyndarynda tóreshiler biraqatar qatelik jibergenin alǵa tartty. «Seltaǵa» qarsy kezdesýde referı Neımarǵa qarsy tártip buzylǵanyna qaramastan penaltı belgilemepti. «Malagamen» ótken oıynda Pıkeniń soqqan golyn esepke almaǵan. Al «Vılıarrealǵa» qarsy matchta aıyp alańynda Brýno Sorıanonyń qolyna dop eki ret tıse de, 11 metrlik aıyp dobyn belgilemedi. Sondaı-aq, keshe syrt alańdaǵy «Betıspen» ótken matchta Jordı Albanyń soqqan golyn qaqpaǵa kirmedi degen sheshimmen esepke almaǵan jáne dál sol ýaqytta Lýıs Sýareske qarsy oıyn tártibi buzylǵanyn da nazardan tys qaldyrdy. Degenmen, basylym jýrnalısteri «Barselonanyń» paıdasyna bir matchtaǵy sheshim septigin tıgizgenin jazǵan. «Real Sosedadpen» ótken oıynda Mark-Andre Ter Shtegenniń qaqpasyna penaltı qoıylmaǵan. Aıta keteıik, Ispanııa chempıonatynda Madrıdtiń «Realy» 19 oıynnan keıin 46 upaımen kósh bastap keledi, al 20 match ótkizgen «Barselona» 42 upaımen 2-orynda.