Nazarbaev Úkimetke “Sandyq Qazaqstan” qurýdy tapsyrdy

Memleket basshysy Nursultan Nazarbaev óziniń el halqyna arnaǵan «Qazaqstannyń úshinshi jańǵyrýy: jahandyq básekege qabilettilik» atty Joldaýynda Úkimetke «Sıfrlyq Qazaqstan» jeke baǵdarlamasyn ázirleýdi tapsyrdy. «Biz sıfrlyq tehnologııany qoldaný arqyly qurylatyn jańa ındýstrııalardy órkendetýge tıispiz. Bul – mańyzdy keshendi mindet. Elde 3D-prıntıng, onlaın-saýda, mobıldi bankıng, sıfrlyq qyzmet kórsetý sekildi densaýlyq saqtaý, bilim berý isinde qoldanylatyn jáne basqa da perspektıvaly salalardy damytý kerek. Bul ındýstrııalar qazirdiń ózinde damyǵan elderdiń ekonomıkalarynyń qurylymyn ózgertip, dástúrli salalarǵa jańa sapa darytty. Osyǵan oraı, Úkimetke «Sıfrlyq Qazaqstan» jeke baǵdarlamasyn ázirleýdi jáne qabyldaýdy tapsyramyn. Bizdiń zańnamamyzdy jańa jaǵdaıǵa beıimdeý kerek», – dedi Elbasy. Prezıdent málim etkendeı, kommýnıkasııanyń damýy men optıkalyq-talshyqty ınfraqurylymǵa jappaı qoljetimdilikti de qamtamasyz etý kerek. Sıfrlyq ındýstrııany damytý basqa barlyq salalarǵa serpin beredi. Sondyqtan Úkimet IT salasyn damytý máselesin erekshe baqylaýda ustaýǵa tıis. Sonymen qatar Nursultan Nazarbaev Úkimetke «EKSPO-2017» nysandarynyń biriniń bazasynda IT-startaptar halyqaralyq tehnoparkin qurýdy tapsyrdy. “Ol álemniń barlyq elinen kásipkerler men ınvestorlar tartýdyń platformasy bolýǵa tıis. Bul úshin tıisti ınfraqurylym jáne salyq jeńildikterin, ońaılatylǵan vıza men eńbek rejimin qosa alǵanda, qolaıly jaǵdaı kerek. Biz joǵary oqý oryndary, Nazarbaev Ýnıversıteti jáne «Alataý» ınnnovasııalyq tehnologııalar parki bazasynda ózimizdiń ǵylymı jáne ınnovasııalyq áleýetimizdi damytýymyz kerek. Ekinshi keshendi mindet. Jańa ındýstrııalar qurýmen qatar dástúrli bazalyq salalardy damytýǵa serpin berýimiz kerek. Bul – ónerkásip, agroónerkásiptik keshen, kólik pen logıstıka, qurylys sektory jáne basqa salalar”, – dedi ol.