Elordadaǵy Qazaq gýmanıtarlyq zań ýnıversıtetinde «Jemqorlyqqa qarsy birinshi medıa ortalyq» respýblıkalyq qoǵamdyq birlestiginiń uıytqy bolýymen «Jemqorlyqqa qarsy qoǵamdyq pikir, halyqtyń oıyn qalyptastyrýdaǵy qoǵamdyq uıymdar men BAQ-tyń róli» taqyrybynda forým ótti. Jemqorlyqpen kúreste qoǵam men qoǵamdyq uıymdardyń, aqparat quraldarynyń rólin kúsheıtý arqyly halyqtyń sanasyna áser etýdi maqsat etken jıynǵa quqyq qorǵaýshylar qaýymy, BAQ ókilderi men ÚEU jetekshileri qatysty.
Sondaı-aq, forým jumysyna Memlekettik qyzmet salasyndaǵy óńirlik habtyń basqarýshy komıtet tóraǵasy Álıhan Baımenov te qatysyp, sóz sóıledi. Sybaılas jemqorlyq – halyqty qanaý, kásibılikti qunsyzdandyrý, adal eńbekti qorlaý bolyp tabylatyndyǵyn basa aıtqan ol, túpten kelgende, para bolyp keletin qarjynyń barlyǵy qarapaıym eńbek adamynyń – sharýa men jumysshynyń, muǵalim men dárigerdiń aq adal mańdaı teri jelinip, urlanýynan túsetindigine toqtaldy.
«Qazir memlekettik organdar tarapynan sharalar qoldanylýda. Iri laýazym ıelerine qatysty ister qozǵalýda. Biraq jemqorlyqqa qarsy kúrestiń tıimdiligine qatysty qoǵamdyq pikirde ázirge seń qozǵala qoımady. Qoǵamnyń memlekettik organdardyń tazalyǵy men adaldyǵyna senim deńgeıi áli de bolsa tómen. Bul óz kezeginde turaqty damýymyz ben memlekettigimizge qater. Jemqorlyqqa qarsy turý ortaq azamattyq paryzymyz bolýy tıis», – dep atap ótti Á.Baımenov.
Alqaly keńeste sybaılas jemqorlyqpen kúres bılik qana emes, oǵan barlyq azamattar atsalysqanda ǵana nátıjeli bolatyndyǵy baıandaldy. Sonymen qatar, qoǵamdyq aǵartý jumystary, máselen, adal memlekettik qyzmetkerler men para bermeıtin kásipkerlerdi dáripteıtin aksııalar uıymdastyrý, olardy buqaralyq aqparat quraldary arqyly nasıhattaý qajettigi de sóz boldy.
Ashyq pikir almasý pishiminde órbigen jıynda Á.Baımenov memlekettik ınvestısııa, memlekettik tapsyryspen qatar, qoǵamdyq ıgilikterdi bólý, páter kezegin nemese jer telimderin berý isi áli de ashyqtyq pen jarııalylyqty qajet etetinin alǵa tartty.
Aıta keteıik, Memlekettik qyzmet salasyndaǵy óńirlik hab tıisti memlekettik organdarmen birlese otyryp, halyqaralyq sarapshylardyń qatysýymen memlekettik organdardyń baspasóz qyzmetshileri men jýrnalısterdiń biliktilikterin arttyratyn semınarlar uıymdastyrýdy kózdep otyr. Sondaı-aq, aqpan aıynda Grýzııada ótetin Habtyń semınaryna memlekettik qyzmetshilermen qatar, Sybaılas jemqorlyqqa qarsy medıa ortalyq ókilderi de qatystyrylady dep josparlanǵan.
Nurlybek DOSYBAI,
«Egemen Qazaqstan»