Joldaý jaýapkershiligi júkteldi

Úkimet Elbasynyń bıylǵy Jol­daýyn júzege asyrýǵa kirisip te ketti. Mınıstr­likter ózderine tıesili min­detterdi bólisip, tıisti tapsyr­malaryn aldy.   Keshe Premer-Mınıstr Baqyt­­jan Saǵyn­taevtyń tóraǵa­ly­ǵymen ótken Úkimet otyry­­synda Joldaýdaǵy tapsyrma­lar jaıy tal­qylandy. B.Saǵyn­taev Prezıdent Nursultan Nazarbaevtyń Úkimet aldyna Qazaq­stannyń úshinshi jańǵyr­tylýyn júrgizý týraly mindet qoı­ǵanyn atap ótti. Ony júzege asyrý úshin elimizdiń básekege qabi­let­tiligin arttyratyn ekono­mı­kalyq ósimniń jańa úlgisin qurý qajet. Memleket basshysy Joldaýda ekonomı­ka­nyń jedeldetilgen tehnologııalyq jańǵyr­tylýyna basymdyq berip, sıfrlyq teh­no­lo­gııany qoldaný arqyly qury­latyn jańa ındýs­trııalardy ór­ken­detý qajettigin atap ótken bolatyn. Osyǵan oraı, Úkimet­ke «Sıfr­lyq Qazaqstan» jeke baǵ­darlamasyn ázirleýdi jáne qabyl­daýdy tapsyrdy. Premer-Mınıstr Aqparat jáne kommýnı­ka­sııalar mınıstrligi­niń aldyna múddeli memlekettik organdarmen bir­lesip osy baǵdarlamany daıyn­daý mindetin qoıdy. «Innovasııalardy qoldap, olar­­dy jedel óndiriske en­gi­zý ma­ńyzdy. Sondyqtan EKSPO-2017 nysandarynyń biri­­niń bazasyn­da IT-startaptar ha­lyq­­ara­­lyq tehnoparkin qurý kerek. Osy­ǵan oraı Aqparat jáne kom­mý­nı­kasııalar, Ulttyq ekonomıka, Qarjy mınıstrlikterine múd­­deli memlekettik organdarmen birge tehnopark qurý jáne sa­lyq jeńildikteri, ońaılatylǵan vıza men eńbek rejimi túrinde zań­­na­­malyq qoldaý kórsetýdi pysyq­taýdy tapsyramyn», dedi Úkimet basshysy. Sonymen qatar, Bilim jáne ǵylym mınıstr­ligine JOO-lar, Nazarbaev Ýnıver­sıtet­tiń Astana Bıznes Kampýsy jáne «Alataý» aq­parattyq tehnologııalar parki bazasynda otan­­dyq ǵylymı jáne ınnovasııalyq áleýetti damy­tý boıynsha qajetti sharalardy qolǵa alý tapsyryldy. Jańa ındýstrııalar qurý­men qatar dástúrli bazalyq sala­lar­dy damytýǵa serpin berý kerek. Osyǵan oraı jaýapty mı­nıstr­likter 2025 jylǵa deıin negiz­gi salalardy tehnologııalyq turǵy­­dan qaıta jaraqtandyrý boıynsha keshendi sharalar ázirleıdi. Úkimet aldynda qazirdiń ózinde 2025 jylǵa qaraı shıkizattyq emes eksportty 2 ese ulǵaıtý min­deti tur. Bul baǵyttaǵy jumysty jan­dan­dyrý úshin eksportty damy­tý men ilgeriletý te­tik­­terin bir ve­dom­stvoǵa shoǵyrlandyrý qajet. «Investısııalar jáne damý mınıstrligine eksport saıasaty jónindegi keńes qurý boıynsha usynystar engizýdi tapsyramyn. Sondaı-aq, 1 qyrkúıekke deıin biryńǵaı eksport strategııasyn qabyldaý kerek», dedi Premer-Mınıstr. Bul jumystardy úılestirýdi óziniń orynbasary Asqar Mamınge tapsyrdy. Budan bólek, 1 qyrkúıekke deıin ın­ves­tısııalyq strategııa qabyldanady. Sonymen birge, Úkimet basshysy Energetıka mınıstrligine jyl sońyna deıin jańa jer qoınaýy kodeksin qabyldaýdy qamtamasyz etýdi tapsyrdy. Prezıdent Joldaýynda qury­lys sek­toryn damytý qajettigin alǵa tartty. Bul rette «Nurly jer» turǵyn úı baǵdarlamasyn tolyq­qandy iske asyrýdy bastaý kerek. Eńbek naryǵyn jańǵyrtý asa mańyzdy. Úki­met basshysy osyǵan baılanysty da tıisti organ­darǵa tapsyrma júktedi. «Jańa tehnologııalardyń engizilýi­ne baı­lanysty dástúrli salalarda eńbek resýrs­tary bosap qalatyn bolady. Bul jerde júıe quraýshy kásiporyndarmen ynty­maqtastyqty qarastyrý kerek. Ákimdikter iri kásiporyn­darmen birlese otyryp, tıisti jol kartalaryn ázirleýi qajet. Eńbek jáne áleýmettik qorǵaý mınıstrligi ákimdikter­men birge jumyspen qamtý ortalyqtaryn refor­malap, barlyq bos jumys oryndary men búkil eldi meken­derde biryńǵaı onlaın plat­forma qalyptastyrýdy qol­ǵa alýy kerek», dedi Úkimet basshysy. Prezıdent Joldaýynda son­daı-aq, bıznes-ortany túbegeı­li jaqsartý jáne keńeıtý jaıy aıtylǵan bolatyn. Osyǵan oraı, Úkimet pen ákimder 1 shildege deıin bıznesti qaıta retteý jónindegi júıeli sharalar ázirleıdi. Premer-Mınıstr ken-metal­lýrgııa jáne munaı-gaz keshenin odan ári damytý úshin otandyq ónimdi jetkizý geografııasyn keńeı­tip, geologııalyq barlaý ju­mys­taryn belsendi damytý qajet ekenin aıtty. Osyǵan oraı, Ener­getıka mınıstrligine jyl sońyna deıin Jer qoınaýy týraly jańa kodeksti qabyldap, salyq zańnamasyna qajetti túzetýler engizý tapsyryldy. Sonymen qatar, B.Saǵyntaev Memleket basshysynyń tapsyr­masyna sáıkes, otandyq aýyl sharýa­shylyǵy el ekonomı­kasy­nyń negizgi kúshine aınalýy tıis ekenin aıtyp ótti. «Biz ekologııalyq taza azyq-túlik shyǵarý arqyly álemdik azyq-túlik naryqtarynda óz orny­myzdy taba alamyz. «Made in Kazakhstan» brendiniń ózi eko­logııalyq taza ónimmen baılanys­tyrylýy kerek. Búginde biz sýbsı­dııa­lardy bólý men jeke qosalqy sharýashylyqtardyń áleýetin paıdalana otyryp kooperatıv qurýdyń, sonymen qatar, eńbek ónimdiligin attyrýdyń jańa qaǵı­dalary boıynsha tásilderdi ázirledik. Barlyq mindetter kesheni AО́K damytýdyń jańa memlekettik baǵdarlamasy aıasyn­da iske asyrylýy tıis», dedi B.Saǵyntaev. Budan ózge, Premer-Mınıstr Memleket basshysynyń jańa eýr­azııa­­lyq logıstıkalyq ınfra­qury­­lymdy damytý týraly min­det qoıǵanyn aıtty. «Bul úshin biz júk tasymalyna erkindik berip, Azııa men Eýropa arasynda qur­lyq­aralyq hab bolýǵa múmkindik beretin, kólik dálizderin quryp, olardy jańǵyrtýymyz qajet. Nátıjesinde biz 2020 jylǵa qaraı konteınerlik júkter úshin tranzıttik tasymal kóleminiń kór­setkishterin jeti esege, jolaý­shylar tasymalynyń kólemin tórt esege arttyrýymyz kerek», dedi B.Saǵyntaev. Osy oraıda, Investısııalar jáne damý, Syrtqy ister, Ulttyq ekonomıka mınıstr­likterine alǵa qoıylǵan mindetterdiń sheshimin tabýǵa baılanysty qajetti shara­lardy qabyldaýǵa tapsyrma berildi. Budan bólek, Baqytjan Saǵyn­taev «Samuryq-Qazyna» holdıngin sapaly túrde tran­sformasııalaý, «Báıterek» jáne «QazAgro» holdıngterin qaıta qurý, elimizdiń qarjy sektoryn jańǵyrtý men qor naryǵyn odan ári damytý bo­ıynsha tıisti tulǵalarǵa min­detter júktedi. «Tórtinshi basymdyq – adamı kapıtal sapasyn jaqsartý. Bilim mınıstrligine bilim sapasyn, ásirese aýylda jaqsartý boıyn­sha usynystar daıyndaýdy tapsy­ramyn. Prezıdent aǵylshyn tilin kezeń-kezeńimen engizý mindetin qoıdy. Elbasynyń tapsyrmasy boıynsha tegin kásiptik-tehnı­kalyq bilim berý jobasy iske asyryla bastaıdy. Joǵary bilim salasynda da mańyzdy mindetter tur», dedi Úkimet basshysy. Eńbek jáne áleýmettik qorǵaý mınıstrligi 1 shildeden zeınetaqy men bala týǵanda beriletin bir rettik járdemaqy kólemin 20 paıyzǵa ósirýdi qamtamasyz etýi tıis. Sondaı-aq, 2018 jyldan bastap ataýly áleýmettik kómek kór­setý shegi eń tómengi kúnkóris deńgeıiniń 50 paıyzyna deıin artady. Al besinshi basymdyq – ıns­tıtýttyq ózgeristerge, qaýip­sizdikke jáne sybaılas jem­qor­lyqqa qarsy kúreske qatysty. Osy rette Úkimet basshysy Ishki ister mınıstrine naqty tapsyrma berdi. «Úkimet úshinshi jańǵyrtý aıasynda EYDU-nyń ozyq tájirı­beleri men usynymdaryn ımp­le­mentasııalaý jumysyn qam­tamasyz etýi tıis. Bul baǵytta jumys bastaldy jáne ár mınıstr josparlanǵan nátıjege qol jetkizýi tıis. Ekinshi, jekemen­shikti qorǵaýǵa, zań ústemdigine jáne barshanyń zań aldynda teń­digin qamtamasyz etýge baılanys­ty. Ádilet mınıstrligi múddeli memlekettik organdarmen birlese tıisti jumystardy júrgizýi kerek. Terrorızmmen kúresti nyǵaıtýdy zańnamalyq qamtamasyz etýdi jalǵastyrý kerek. Din isteri jáne azamattyq qoǵam mınıstrligine dinı ekstremızmdi nasıhattaýdyń aldyn alý boıynsha sharalardy qolǵa alyp, qoǵamda túsindirý jumystaryn júrgizýdi tapsyra­myn. Túrmelerde teologııalyq ońaltý qyzmetteriniń jumysyn uıymdastyrý kerek», dedi Baqytjan Saǵyn­taev. «Qazaqstan kıberqalqany» júıesin qalyptastyrý men sy­baılas jemqor­lyq deńgeıin tómen­detý boıynsha da tıisti tap­syrmalar berildi. «Elbasy bizdiń aldymyzǵa Qazaqstandy úshinshi jańǵyrtý­dyń jahandyq deńgeıdegi maqsat-mindetin aıqyndap berip otyr. Onyń ishinde Úkimet­ke «Qazaqstannyń ulttyq teh­nologııalyq bastamasy» dep atala­tyn 2025 jylǵa deıingi stra­te­gııalyq damý josparyn daıyn­daýdy tapsyrdy. Ult­tyq ekonomıka mınıstrligi jos­pardy daıyndaý jumysyna dereý kirisýi qajet. Sondaı-aq, Pre­zı­denttiń árbir tapsyrmasynyń merzimderin, oǵan jaýap­ty laýa­zymdy tulǵalardy belgilep, Jol­­daýdyń der kezinde oryn­dalýyn qatań baqylaýǵa alý kerek. Al Jalpyulttyq jospar­dy 7 aqpan kúngi Úkimet otyrysynda talqylap, qabyldaýymyz qajet», dedi B.Saǵyntaev. Dınara BITIKOVA, «Egemen Qazaqstan»