OQO-ǵa tartylatyn ınvestısııa 25 paıyzǵa artady

Elbasynyń «Qazaqstannyń úshinshi jańǵyrýy: jahandyq básekege qabilettilik» Joldaýy – aldaǵy maqsattarymyzdy túsindirýdiń eń basty qujaty bolyp tabylady. Bul týraly Ońtústik Qazaqstan oblysynyń ákimi J.Túımebaev Prezıdenttiń jazbasha túrde jaryqqa shyqqan Joldaýy boıynsha ótken oblys aktıviniń jıynynda aıtty, dep habarlady OQO ákiminiń baspasóz qyzmeti. «Memleket basshysy elimizdiń birinshi jańǵyrýynda óz jolymyzdy qalaı bastaǵynymyzdy jáne memlekettiń irgetasyn qalaı qalaǵanymyzdy aıtsa, sol jyldary josparly ekonomıkadan naryqtyq ekonomıkaǵa kóshý júzege asyryldy. Bárimiz birlesip, elimizdi alǵa jyljytýǵa baǵyttalǵan jumystardy atqardyq. Ekinshi jańǵyrý «Qazaqstan-2030» strategııasynyń qabyldanýymen jáne jańa elorda – Astananyń salynýymen bastaldy. Elimiz ekonomıkalyq turǵydan artta qalǵan aımaqtan shyǵyp, álemdegi ekonomıkasy báskekege qabiletti 50 eldiń  qataryna endi. Tabysty ótken eki jańǵyrý arqyly baǵa jetpes tájirıbe jınaqtadyq. Elbasymyzdyń Qazaqstandy damytýdyń úshinshi jańǵyrý boıynsha jasaǵan Joldaýy álemdik daǵdarys kezinde alǵa batyl qadam basýǵa baǵyttaıtyn saıası qujat bolyp tabylady», - dedi ákim. Sonymen qatar, májiliste ákim óńirimizde eksportqa baǵyttalǵan kásiporyndardyń sanyn arttyrý maqsatynda jergilikti taýar óndirýshilerdiń básekelik qabilettiligin joǵarlatyp, óńirimizdiń búgingi 1,1 mlrd. AQSh dollaryn quraıtyn eksporttyq aınalymdy 2 esege arttyrý qajettigin mindettedi. Sondaı-aq, aımaq basshysy Elbasynyń jeke jáne sheteldik ınvestısııa kólemin ekonomıkadaǵy úlesin arttyrý tapsyrmasy boıynsha oblysta 14,5 paıyz kólemindegi sheteldik ınvestısııany 2020 jylǵa deıin 25 paıyzǵa ulǵaıtý qajettigine toqtaldy. «Bul úshin bizder ınvestorlarmen tyǵyz jumys júrgizip, olarǵa tıimdi jaǵdaılarldy jasaýymyz qajet. Atalǵan baǵytta óńirimizde tıisti jumystar óz deńgeıinde atqarylyp otyr. Atap aıtqanda, oblystyń barlyq aýdandarynda  ınvestorlarmen jumys isteıtin arnaıy mobıldyk toptar qurylǵan»,- dep málimdedi J.Túımebaev. Prezıdent Joldaýynyń oryndalý barysy talqylanǵan jıynda aımaq basshysy agrarly óńir Ońtústik - ekonomıkanyń jańa draıverine aınalý biz úshin erekshe mindet ekenin aıtty. Iаǵnı, oblys elimizdiń kókónis jáne baqsha ónimderin óndiretin basty jetkizýshi bolýy qajet. Búgingi kúnge oblysymyzda jylyjaılardyń úlesi respýblıkada 87 paıyz kólemdi quraıdy, sol sııaqty tamshylatyp sýarý, ıntensıvti baýlar boıynsha da aldyńǵy qatarda. Osy aıtylǵan qarqyndy kórsetkishterdi joǵarlatý maqsatynda, oblys dıhanshylary otandyq aldyńǵy qatarly ǵylymı zertteý ınstıtýttarymen tyǵyz jumys isteýi qajet. Bul úshin bizder usaq sharýa qojalyqtardy irilendirip biriktirýimiz kerek»,- dedi ákim. Aıtylǵan mindetter men maqsattardy oryndaı otyryp, Ońtústik Qazaqstannyń 2025 jylǵa deıin jalpy óńirlik ónim kólemindegi úlesi 9 paıyzdan 15 paıyzǵa ulǵaıtylmaq.