Qazaqstandyq biregeılik – jańǵyrtý kepili

Elordadaǵy Ulttyq akademııalyq kitaphanada «Qazaqstan halqy Assambleıasy» qoǵamdyq qorynyń muryndyq bolýymen «Qazaqstandyq biregeılik – Qazaqstandy jańǵyrtýdyń kepili» atty dóńgelek ústel ótti. Is-sharaǵa Parlament Máji­lisiniń depýtattary, Assambleıa músheleri, qoǵam qaıratkerleri, elimizdegi etnomádenı birles­tikterdiń jetekshileri jáne bel­sendi jastar qatysty. «Ahysqa» túrik mádenı orta­lyǵynyń jetekshisi Ásker Pı­rıevtiń paıymdaýynsha, Táýel­siz­diktiń shırek ǵasyrynda qol jet­kizgen jetistikterimizdi aldaǵy ýaqytta eselep arttyrý kerek. Memleket basshysynyń «Qazaq­stannyń Úshinshi jańǵyrýy: jahan­dyq básekege qabilettilik» atty Joldaýynda osy maqsatty júzege asyrý úshin atqarylatyn jumys­tar tolyq qarastyrylǵan. – Qazaqta músheli jas degen uǵym bar. Búginde elimizdiń táýelsizdikke qol jetkizgenine 25 jyldan asty, ıaǵnı bizdiń memleketimiz ekinshi músheli jasyn toltyrýǵa jaqyndap keledi. 25 jastan asqan adam sııaqty, elimiz de nyǵaıyp, óziniń bolashaǵyn, qandaı baǵytty betke alatynyn aıqyndap aldy. Bizdi aldymyzda úlken belester, kúrdeli kezeńder kútip tur. Er-azamat óz ómirinde úı salyp, aǵash otyrǵyzyp, bala súıýi kerek degen qaǵıdany bilesizder. Degenmen, úı salyp, aǵash otyrǵyzǵannan keıin, ony baǵyp-qaǵý kerek. Balany da bilimdi, tárbıeli, sapaly adam etip ósirý úshin jumys jasaımyz. Olaı bolsa, jas memleketimizdiń basqalarmen terezesi teń, qýatty el bolýy úshin birigip eńbek etýimiz kerek, – dedi Ásker Pırıev. Aqmola oblysynyń Selı­no­grad aýdanyndaǵy Rodına aýyl­dyq okrýginiń ákimi Bella Gaz­dıeva Prezıdent Joldaýynda ada­mı kapıtal sapasyn arttyrýǵa basym­dyq berilgenine toqtaldy. Onyń pikirinshe, jastardyń bilimdi bolýy úshin orta mektepterdegi bilim sapasyna kóbirek kóńil bólý kerek. – Eldiń áleýmettik-ekono­mıkalyq ahýalyn jaqsartýda, ekonomıkalyq ósimge qol jetkizýde eń mańyzdysy adamı kapıtal, bilimdi azamattar ekenin ýaqyttyń ózi dáleldep otyr. Prezıdent Joldaýynda osyǵan basymdyq berildi. Al azamattardyń bilimdi bolýy úshin orta mektepter erekshe ról atqarady. О́kinishke qaraı, elimizdegi orta mektepterdiń barlyǵy birdeı sapaly bilim berip jatyr dep aıta almaımyz. Rodına aýyldyq okrýgindegi mektepterde bilikti muǵalimder jumys isteıdi, jyldamdyǵy joǵary ınternet bar, synyptar qajetti qural-jabdyqtarmen tolyq qamtylǵan. Alaıda, bizdiń tóńiregimizdegi basqa aýyldarda qystygúni jol jabylyp qalady, ınternet joq, oqý-quraldary tapshy... Oblys ortalyqtaryndaǵy zııatkerlik mektepter men aýyldyq jerlerdegi mektepterdiń bilim berý deńgeıin salystyra almaısyz. Menińshe, tıisti mınıstrlik birinshi kezekte barlyq mektepte sapaly bilim berýdi qolǵa alýǵa tıis. Sonda ǵana básekege qabilettilik qalyptasady, – dedi Bella Gazdıeva. Dóńgelek ústel barysynda qatysýshylar Memleket basshysy usynǵan konstıtýsııalyq reformaǵa qatysty usynystar ázirledi. Arnur ASQAR, «Egemen Qazaqstan»