• 23 Aqpan, 2017

Túrkistanda arnaıy vedomstvoaralyq komıssııa quryldy

140 ret

kórsetildi

2 mın

oqý úshin

Egemen Qazaqstan

Ońtústik Qazaqstan oblysyndaǵy №4 Jumyspen qamtý jáne áleýmettik baǵdarlamalardy úılestirý basqarmasynyń Túrkistandaǵy arnaıy áleýmettik qyzmet kórsetý ortalyǵynda azamattar tobynyń týberkýlez aýrýyna shaldyǵýyna baılanysty arnaıy vedomstvoaralyq komıssııa quryldy. Bul jóninde tolyǵyraq OQO Aımaqtyq kommýnıkasııa qyzmetinde ótken brıfıngte QR Densaýlyq saqtaý vıse-mınıstri Soı Alekseı, oblys ákiminiń orynbasary Erbol Sadyr, QR Densaýlyq saqtaý mınıstrliginiń Qoǵamdyq densaýlyq saqtaý qyzmeti komıtetiniń tóraǵasy Bekshın Jandarbek aıtyp ótti. Spıkerlerdiń málimdeýinshe, 2017 jylǵy 22 aqpanynda QR Densaýlyq saqtaý mınıstriniń buıryǵymen Vedomstvoaralyq komıssııa qurylyp, onyń qataryna Eńbek jáne áleýmettik qorǵaý mınıstrliginiń, Densaýlyq saqtaý mınıstrligi men Ońtústik Qazaqstan oblysy ákimshiliginiń ókilderi kirgen. Vedomstvoaralyq komıssııa tıisti emdeý sharalary, áleýmettik qyzmet paketi, emdeýdiń sapasy, ınfeksııalyq baqylaý talaptarynyń qanshalyqty saqtalǵanyn, oblystaǵy basqa medısınalyq-áleýmettik mekemelerdegi azamattardy tekserýden ótkizý qajettiligin anyqtaýy tıis. Atalǵan komıssııa músheleri búginnen bastap jumysqa kiristi. О́z kezeginde oblys ákiminiń orynbasary E.Sadyr ınfeksııanyń ári qaraı taralmaýyn qamtamasyz etý úshin naýqastar oqshaýlandyrylyp, tıisti keshendi tekserý men emdeý jáne kútim sharalarymen qamtamasyz etilgenin jetkizdi.Sondaı-aq, ol oryn alǵan jaǵdaı oblys ákiminiń jáne onyń birinshi orynbasarynyń tóraǵalyǵymen arnaıy májiliste, oblystyq halyq densaýlyǵyn qorǵaý máseleleri jónindegi Úılestirý Keńesinde qaralyp, tıisti memlekettik organdarǵa epıdemııaǵa qarsy sharalardy atqarýǵa tapsyrmalar berilgenin. Al oblys ákiminiń ókimimen oblystyq shtab qurylyp, tıisti is-sharalar júrgizilip jatqanyn aıtty. Sonymen qatar, vıse-mınıstr Soı Alekseı elimizdiń barlyq óńirlerindegi densaýlyq saqtaý basqarmalary tarapynan aımaqtardaǵy medısınalyq-áleýmettik mekemelerdiń emdelýshilerine tekserý sharalary uıymdastyrylatynyn atap ótti. Brıfıngte málim bolǵandaı, aýrýǵa toptyq shaldyǵý sebepterin anyqtaý úshin 1 -11 aqpan aralyǵynda Densaýlyq saqtaý mınıstrligi, OQO Densaýlyq saqtaý basqarmasy, Qoǵamdyq densaýlyq saqtaý departamentiniń mamandandyrylǵan uıymdarynyń ókilderiniń qatysýymen aldyn-ala tekserý uıymdastyrylǵan. Onyń qorytyndysy boıynsha pasıentterdiń flıýrografııalyq tekserýmen tolyq qamtylmaǵany, týberkýlezdi anyqtaý jáne emdeý algorıtmderi, dezınfeksııalaý tártibi saqtalmaǵany, t.b. kemshilikter anyqtalǵan. Búginde respýblıkadan arnaıy mamandar shaqyrtylyp, naýqastarǵa emdeý boıynsha jumystar júrgizilýde. Osy kemshilikterge jol bergen qyzmetkerlerge qatysty qyzmettik tekserý taǵaıyndalyp, tekserý qorytyndysymen tıisti sharalar qabyldanatyn bolady.