Dımash: Ata-anamnyń arqasynda osyndaı deńgeıge jetip otyrmyn

Qytaıda «I’m a Singer» halyqaralyq án baıqaýyna qatysyp jatqan otandasymyz Dımash Qudaıbergen «Jenmın jıbao» («Halyq gazeti») gazetine suhbat berdi, dep habarlady QazAqparat. Dımash – Qazaqstan Respýblıkasynyń mádenıet qaıratkerleri Qanat Qudaıbergenuly men Svetlana Aıtbaevanyń uly. О́nerli otbasynda týǵan. «О́nerli otbasynda dúnıege kelgenime, osyndaı ata-anam bolǵanyna ózimdi erekshe baqytty sezinemin. Ata-anam óner adamdary bolmaǵanda, qansha qulshynǵanymmen, ánshi bolýym ekitalaı edi», – dedi ol. Dımash jaqsy ánshi bolýdyń qyr-syryn aıtyp ótti. «Menińshe, mýzykalyq jaǵynan tabysqa jetý úshin kásibı qabilet basym bolý kerek. Eń mańyzdysy, ándi júrekpen oryndaýyń qajet. Men Maıkl Djeksonnyń, Djekı Channyń, Lýchano Pavarottıdiń jankúıerimin. Olardyń barlyǵy tynbaı eńbektenýiniń arqasynda úlken tabystarǵa jetken. Bárinen de mańyzdysy, olardyń bári álemdik deńgeıdegi juldyzdar bolsa da, óte kishipeıil, baýyrmal jandar. Sondyqtan men olardy úlgi tutamyn», – dedi ánshi Dımashtyń óner jolynda mundaı deńgeıge jetýine ata-anasynyń zor eńbegi sińgeni ras. Bul týraly ol: «Ol kisilerdiń arqasynda osy kúnge jettim. Ustazdaryma da erekshe alǵys aıtamyn. Olar árqashanda maǵan qolushyn berip, meni qoldap keledi. Ári meniń kásibı deńgeıimniń ósýine úlken septigin tıgizdi», – dedi Dımash. Dımash qazaq, orys, ıtalıan, fransýz tilderinde, tipti qytaı tilinde án aıtyp álemdi tańǵaldyrdy. «Kóp izdenemin. Operalyq baǵytta án aıtatyn bolǵandyqtan, ártúrli tilderdegi áıgili operalardy oryndap kórdim. Árıne, qulshyna úırený mańyzdy. Aldymen, sol elderdiń mýzykasy men áýenin unatý kerek. Osydan keıin án mátinin úırenesiń. Tipti, ándi jan-dúnıeńmen túsine alasyń. Ustazdarymnyń kómegimen osy tilderdi  úırenýge tyrysyp, sheteldik operalardy naqyshyna keltirip oryndadym. Sol arqyly nemis, ýkraın, fransýz, ıtalıan, aǵylshyn, túrik tilderinde aıtyp úırendim. Qazir qytaı tilinde aıtýdy úırenip júrmin», – dedi ol. Dımash Aspanasty elindegi «I’m a Singer» halyqaralyq án baıqaýyna qalaı kelgen eken? «Baıqaýdyń bas rejısseri, tálimger Hýn Tao burynǵy meniń halyqaralyq baıqaýlarda óner kórsetkenimdi baıqap, osynda shaqyrdy. «I’m a Singer» baıqaýy – naǵyz ánshiler baq synaıtyn óner dodasy. Ýaqyty men aınalymy da erekshe uzaq. Ol seniń sahnadaǵy sátińdi ǵana emes, ánshiniń baıqaýǵa daıyndalý barysyn, sondaı-aq, sahnadan tys turmys-tirshiligin de kórsetedi. Kórermenderge ánshiniń ónerimen birge ómirin de tolyq tanystyrady. Bul jobanyń eń úlken ereksheligi – jasy úlken, ataǵy áıgili, tabysqa jetken ánshilermen birge baq synap júrmin», – dedi Dımash Qudaıbergenuly. Tyńdarmandary Dımashtan joǵary nátıje kútip júrgeni anyq. Al ánshiniń ózi shi? «Baıqaýdyń nátıjesinen buryn, eń bastysy, kórermenderdiń qoldaýyna ıe bolsam deımin. Barynsha jaqsy óner kórsetip, bıik belesterge umtylyp, jankúıerlerimniń kóńilinen shyǵamyn degen úmittemin», – dedi ánshi. Dımash Qytaı eliniń ánshilerinen kimderdi súıip tyńdaıdy eken? Kimniń ónerin joǵary baǵalaıdy? Bul týraly: «Meniń jaqsy kóretin ánshilerim kóp. Qytaılyq ánshilermen kóp kezdesýlerde boldym. Barlyǵy óte qarapaıym, ashyq-jarqyn, ınabatty adamdar. Men tálimgerler Han Hýn men Lın Jyshýannyń ónerin joǵary baǵalaımyn», – dedi ol. Dımash EKSPO kezinde sahnaǵa shyǵatynyn málimdedi. «Bıyl maýsym aıynda Qazaqstanda EKSPO-2017 halyqaralyq kórmesi bastalady. EKSPO tuńǵysh ret Ortalyq Azııa elinde ótkizileıin dep otyr. Barlyqtaryńyzdy Qazaqstanǵa kelip, EKSPO kórmesin tamashalaýǵa shaqyramyn. Bári sátimen bolsa, men án aıtatyn bolamyn», – dedi 22 jastaǵy ánshi. Dımash sóz sońynda tyńdarmandaryna jyly lebizin bildirdi. «Armandaryńyzdyń oryndalýyn, ómir joldaryńyzdaǵy kózdegen maqsattaryńyzǵa qol jetkizýlerińizdi tileımin. Kúnderińiz kóńildi, tatý-tátti, aralaryńyz meıirimge, syılastyqqa tolý bolýyn tileımin», – dep aıaqtady sózin.