Mánerlep júzýdegi mánsiz áńgime

Mánerlep nemese sınhrondy júzýden Ulttyq quramada óner kórsetip júrgen jáne sport mansaptaryn aıaqtaǵan qyzdarymyzdyń bapkerler shtabyna ókpesi qara qazandaı eken. Kópshilikten ózderin qorǵaýdy, al quzyrly organdardan mamandar tarapynan jasalǵan bassyzdyqqa núkte qoıýdy suraıdy sýǵa sulý órnek salǵan qyzdarymyz. Bárin basynan bastasaq. Osydan on shaqty kún buryn ǵalamtor betinde sınhronshy qyzdarymyzdyń ashyq haty jarııalandy. Munda olar bas jattyqtyrýshy Janna Demchenko jáne shtabtaǵy ózge bapkerler Álııa Kárimova men Naılıa Baımurzına tarapynan bolǵan ádiletsiz áreketterden ábden sharshaǵandaryn jazǵan. Tipti, naq osy «janashyr» ma­man­dardyń arqasynda sportpen qosh aıtysýǵa májbúr bol­dyq degendi de aıtady hat ıeleri. Jalpy, qalam alyp hat jazǵan qyzdardyń esimi elimiz­degi sýda mánerlep júzý salasynda jaqsy tanymal. My­saly, Aınur Kereı men Áıgerim Jeksenbınova 2010 jyly Gýanchjoýda ótken XVI Azııa oıyndarynyń qola júl­degerleri. Al Arna Toqtaǵan bolsa, Doha-2006 Azıadasynda qola medal alǵan sportshy. Sonymen, ashyq hat mátini jarııa bolysymen sport­shylarymyzǵa jan-jaqtan habarlasýshylar kóbeıgen. Son­dyqtan olarmen tildesý ońaı bolmady. Dese de, oryn alǵan oqıǵaǵa qatysty quramadaǵy tanymal sportshy, Azııa oıyn­darynyń júldegeri Aınur Ke­reıdiń pikirin óz aýzynan estýdiń reti keldi. Tájirıbeli sportshy qyzdyń aıtýynsha, Ulttyq quramadaǵy bassyzdyqtar biraz ýaqyttan beri jalǵasyp keledi eken. Jaýapty mekemeler tarapynan sınhronshylardy qamtamasyz etýge jetkilikti qarjy bólin­genimen, olar qyzdarǵa jetpeı qalyp otyrǵan. Olardyń qaıda ketip jatqanynan da boıjetkenderimiz beıhabar. Al bular bolsa, qajetti kıim-keshek pen jarystarǵa baratyn qarajatty uzaq ýaqyttan beri óz qaltalarynan shyǵaryp kelgen. Esterińizde bolsa, byltyr Janna Demchenko Rıo-2016 Olımpıadasyna daıyndyq barysy jaıly suhbat berip, qurama músheleriniń jaǵdaıy tolyq jasalǵandyǵyn, al sýda shomylý kıimderi Máskeýde arnaıy tigiletinin aıtqan bolatyn. Biraq bapkerdiń bul sózderin Aınur joqqa shyǵaryp otyr. «Janna hanymnyń bizdiń jyl saıyn kıim-keshekpen qamtamasyz etiletinimiz týraly aıtqan sózderin estip tańǵaldym. Sebebi, biz álem chempıonattaryndaǵy kıim­derimizdi ózge jarystarda da kııý úshin birneshe jyl boıy saqtap júremiz. Kerek-jaraq­tyń qashan beriletindigin bil­meıtinbiz. Sýda shomylý kıimin satyp alǵan kezderimiz de bolǵan», degen ýájdi alǵa tartady Azııa oıyndarynyń júldegeri. Áriptesiniń oıyn mánerlep júzýshi Áıgerim Jeksenbınova da qoshtaıdy. О́z kezeginde ol bas jattyqtyrýshyǵa qymbat syılyqtar alý úshin shtabtaǵy bapkerlerdiń ózderinen birneshe márte aqsha jınaǵanyn jaıyp saldy. Árıne, sportshynyń baǵyn ashatyn da, babyn kelistiretin de bapker ekendigin eskersek, sol mamannyń eńbegin baǵa­lap, laıyqty syı-sııapat kórset­kende turǵan eshteńe joq deýge de bolatyn shyǵar. Degenmen, ol syılyqtyń májbúrli túrde emes, shyn kóńilmen berilgeni oryndy ári zańǵa qaıshy kel­meıdi. Qyzdardyń ashyq málimde­mesine qarsy alǵash pikir bildir­genderdiń biri – júzýden Rıo-2016 Olımpıadasynyń chempıony Dmıtrıı Balandın boldy. Ol óziniń Instagram paraqshasynda «Sınhrondy júzýden QR Ult­tyq quramasynyń jalǵan mú­sheleri jazǵan ashyq hatty joq­qa shyǵarý», dep sha­ǵym­daný­shylardyń sózderiniń shyn­dyqqa nelikten janas­paıtyndyǵy týraly oıyn bir­neshe tarmaqqa bólip jazǵan bolatyn. Balandın de, sınhronshy qyzdar da bir uıymnyń – Sý sporty túrleri federa­sııasynyń qaramaǵyna kiredi. Biraq olar­dyń salalary múlde bólek. Sondyqtan Olımpıada chempıo­nynyń mundaı qadamǵa ne sebepti barǵany túsiniksiz. Jo­ǵary jaqtyń tapsyrma­sy ma, álde qurbysy ári mánerlep júzýden Ulttyq qurama kapıtany Krıstına Tynybekovanyń ótinishi me, ol jaǵy bizge beımálim. Ras, kóp uzamaı Dmıtrıı bul jazbany paraqshasynan óshirip tastady. Degenmen, onyń sózderi quramanyń burynǵy múshelerine aýyr tıgeni anyq. Qyzdar «Balandındi sotqa beremiz, quramanyń burynǵy múshesi ekenimiz ras, biraq jalǵan qurama dep aıtýǵa onyń quqy joq», dep málimdep úl­gerdi. Al mán-jaıdy óz aýzynan estý úshin Dmıtrııge habarlasqanymyzda, ol áreket nátıje bermedi: chempıon telefon tutqasyn kótermedi... Al endi, Krıstına Tyny­bekovany tyńdasaq, aryzdanýshy toptyń basty maqsaty – bapkerler shtabyndaǵy oryndardy ıelený. Sonan soń, bul – qyzdardyń birinshi haty emes eken. «Mundaı hattar buǵan deıin de jazylǵan. Birde, tipti, bizge quramadan ketip, óz komandamyzdy qurý týraly usynys jasaldy. Bapkerlersiz. Sportshylar ózderi de tabysty óner kór­sete alady, tek qarjy máselesi sheshilse bolǵany degen pikirler aıtyldy. Olar­dyń «jyly oryn» izdep júr­gen­derine kúmánim joq. Qazirgi bapkerler jumystan ketse, je­ńimpaz retinde solardyń ornyn ıelenbek. Bas bapkerlikke Aınur Kereıdi laıyq kóredi. Qalǵandary onyń senimdi serigine aınalmaqshy». Tynybekova bul keleńsiz jaǵdaı quramadaǵy qyzdardyń uıymshyldyǵyn myǵymdaı túskenin aıtyp otyr. Bapkerler shtaby qazir áńgimelesýge asa qulyqty emes. Al Janna Dem­­chenkonyń bul oqıǵaǵa qa­tysty ne deıtinin bilý úshin ha­barlasqanymyzda, ol qazir ýaqy­tynyń tyǵyzdyǵyn, biraq aldaǵy kúnderi bizdi qyzyq­tyr­ǵan saýaldarǵa tolyqqandy jaýap beretindigin aıtyp, ýáde berdi. Qalaı degenmen de, kimniń jalǵan sóılep, qaı taraptyń sózi shyndyqqa janasymdy ekendigi mindetti túrde anyq­talady dep senemiz. Sebebi, mundaı keleńsizdikter qaı salada bolsyn bar jáne onyń tamyryna balta siltegennen basqa amal joq. Al aqıqat sal­tanat qurar bolsa, zań men erejeni belshesinen basyp júre­tinderdiń áreketterine tyıym salynar degen úmit­temiz. Mádına ASYLBEK, jýrnalıst ASTANA