«Barys» besinshi oıynda basym tústi

Keshe Astananyń «Barysy» Qurlyqtyq hokkeı lıgasyndaǵy pleı-off kezeńiniń 1/8 fınalynda «Traktor» komandasymen besinshi ret kúsh synasty. Chelıabide ótken bul oıynda esepti astanalyqtar ashty. Kezdesý­diń 12-mınýtynda Konstantın Pýsh­karev qaqpa aldyndaǵy qarba­lasta qaqpashydan aılasyn asyra bildi. Ekinshi kezeńde «Traktordyń» basymdyǵy baıqaldy. Onyń ústine, bizdiń hokkeıshiler oıyn tártibin jıi buzyp, tóreshiler tarapynan qatań jazalaýǵa ushy­­rap otyrdy. Sondaı sáttiń b­irinde, ıaǵnı «Barystyń» bir oı­ynshysy aıdynnan qýylǵan kezde chelıabilikter tarazy basyn teńestirip ketti. Goldy 29-mınýtta Artem Borodkın óz atyna jazdy. Osy esep matchtyń sońyna deıin ózgermeı, komandalar qosymsha taım oınaýǵa májbúr boldy. Al overtaımda, ıaǵnı 70-mınýtta Sen-Per Marten soqqan shaıba «Barysqa» jeńis ákeldi. Sonymen, «Barys» jalpy esepte 3:2 esebimen alǵa shyqty. Endi bir oıynda jeńiske jetse, Astana hokkeı klýby týrnırdiń kelesi kezeńine joldama alady. Qaırat ÁBILDINOV, «Egemen Qazaqstan»