Baýyryn anasyna bólip bergen

Adam aǵzalaryna jasalatyn kúrdeli otanyń biri – baýyr aýystyrý. О́ńirler arasynda bul ádisti búginde aqtóbelik dárigerler táp-táýir meńgerip qalǵany baı­qalady. Taıaýda alty saǵat­qa sozylǵan ota sátti ótti. Ota­nyń taǵy bir erek­sheligi – la­paroskopııalyq tásil­men jasalǵanynda. Maman­dardyń málimdeýinshe, mundaı jaǵdaıda jalańdaǵan hırýrg pyshaǵy ashyqtan-ashyq tándi tilgilemeıdi. Sonyń áserinen jaraqat ta, onyń tiligi de az bolady. Sol sebepten jaranyń orny da tez bitip, jazylyp ketedi. Bul osyndaı ozyq ádis­­pen iske asqan elimizdegi ekin­shi ota bolyp shyqty. Al alǵashqy ota ótken jyly qa­zan aıynda respýblıkalyq endoskopısterdiń kongresi ke­zinde jasalǵan. Bul joly Aqtóbede 24 jastaǵy qyz 48 jastaǵy anasyna baýyrynyń jartysyn bergen. Otany Seýl ulttyq ýnıversıtetiniń professory Kvang Výng Lı men aqtóbelik hırýrg-mamandar birlesip jasa­dy. Qazir boı jetkenniń de, anasy­nyń da jaǵdaıy birqalypty. Degen­men, olar aýrýhana­dan shyqqannan keıin de dáriger­lerdiń baqylaýynda bolmaq. Oblystyń bas hırýr­gi Erlan Sultan­gereev­tiń aı­týyn­sha, aqtóbelik dáriger­ler la­pa­ros­ko­pııalyq ádisti ko­reıalyq hırýrgtardan úırenip, atal­ǵan elde bilimderin jetil­dirip qaıtypty. Temir QUSAIYN, «Egemen Qazaqstan» AQTО́BE