Astanany gazdandyrý jobasy bastalar emes. Nege?!

Qazaqstan Respýblıkasynyń Prezıdenti – Elbasy N.Á.Nazarbaev 2012 jyly «Áleýmettik-ekonomıkalyq jańǵyrtý – Qazaqstan damýynyń basty baǵyty» atty Joldaýynda «Astanany qosa alǵanda, eldiń ortalyq óńirin gazdandyrýdy qamtamasyz etetin qubyr júıesin josparlap, júzege asyrýǵa kirisýdi tapsyramyn. Bul – kóp qarjyny qajet etetin mańyzdy jumys. Gazǵa táýeldilikten arylý úshin biz ony jasaýymyz kerek. Qazaqstan – munaı men gaz óndiretin el. Biz elimizdi gazdandyrýǵa mindettimiz», dep Úkimetke tıisti tapsyrma bergen bolatyn. Elbasynyń osy tapsyrmasynan keıin el­or­da­myz­ǵa gaz tartýdyń eki jobasy ázirlendi. Olar «Qartaly – Tobyl – Kókshetaý – Astana» magıstrali jáne «Beıneý – Bozoı – Shymkent» qubyryna «Qyzylorda – Jezqazǵan – Temirtaý – Qaraǵandy – Astana» magıstralin jalǵaý arqyly «Saryarqa» gaz qubyryn salý jobalary. Birinshi joba boıynsha 2012 jyly tehnıkalyq-eko­nomıkalyq negizdemesi men jobalyq-smetalyq qu­jattamasyn jasaýǵa 4,7 mlrd teńge jumsaldy, ıaǵn­ı respýblıkalyq bıýdjetten 2 mlrd teńge jáne «Samuryq-Qazyna» qorynyń tarapynan – 2,7 mlrd teńge. Biraq, Úkimettiń sheshimimen, kórsetilgen jo­ba­lardyń qaralýy men iske asyrylýy belgisiz mer­zimge toqtatyldy. 2013 jyldyń 23 qańtarynda ót­ken Úkimettiń keńeıtilgen otyrysynda Memleket bas­­shysy atalǵan máselege qaıta oralyp, gaz qubyry ma­gıstraliniń qurylysyn jedeldetýdi tapsyrǵan. Atal­ǵan tapsyrmanyń birinshi ret berilgenine bes jyl toldy. Biraq, 2015 jyly qurylysy aıaqtalatyn jo­ba osy kúnge deıin bas­tal­ǵan da joq. Al qazirgi kezde ózge eldiń kásipkerleri avto­kó­l­ikpen gaz tasymaldap, Astananyń birneshe úlken ny­sanyn gazdandyryp, naryǵymyzdy ıgerip, tabys taýyp jatyr. Astana qalasy men gaz qubyrynyń boıynda or­nalasqan eldi mekenderdi gazdandyrý – kele­she­gi mol, serpindi jobalardyń biri. Bolashaqta bul birqatar óńirdiń áleýmettik-ekonomıkalyq jaǵ­daıyn aıtarlyqtaı jaqsartady, óıtkeni, kógildir otynnyń tutynýshylar qataryn azamattarymyzben birge iri kásiporyndar men shaǵyn jáne orta bıznes ókilderi toltyrar edi. Mamandardyń aıtýynsha, shyqqan shyǵyn orta eseppen alǵanda, 5-7 jylda aqtalady. Sonymen qatar, Astananyń ekologııalyq ahýalyn aıtarlyqtaı jaqsartýǵa da múmkindik týar. Buǵan Úkimettegiler ne der eken? Sapar AHMETOV, Májilis depýtaty