QR Densaýlyq saqtaý mınıstrligi Elbasy Joldaýynda qoıylǵan mindettemelerdi júzege asyrý úshin 5 mańyzdy bastama kóterdi. Bul týraly densaýlyq saqtaý mınıstri Eljan Birtanov Densaýlyq saqtaý mınıstrliginiń alqa otyrysynda málimdedi, dep jazady Strategy2050.kz.
«Birinshi bastama – densaýlyq saqtaý júıesin pasıentterdiń múddesine qaraı ıntegrasııalaý. Integrasııa profılaktıkalyq deńgeıden bastap búkil kezeńderdi qamtýy tıis. Medısınany damytý, deni saý jáne uzaq ómir súrý jónindegi ulttyq baǵdarlama qabyldaý josparlanyp otyr, salany sıfrlaý jáne aqparattandyrý jónindegi sharalar jalǵasady», - dedi E.Birtanov.
E.Birtanov aıtyp ótkendeı, ekinshi bastama – standarttardy Ekonomıkalyq áriptestik jáne damý jónindegi uıymnyń talaptaryna sáıkestendirý. Bul sharalar aıasynda jeke medısınany damytýdaǵy kedergilerdi joıý, memlekettik fýnksııalardyń birqataryn táýelsiz kásibı ortaǵa berý, dári-dármek jáne medısınalyq buıymdardyń baǵasyn retteý josparlanǵan.
«Qazirgi jaǵdaıda memlekettik resýrstardy rasıonaldy qoldaný máselesi ótkir turǵandyqtan, úshinshi bastama osymen baılanysty. Bul baǵytta densaýlyq saqtaý salasyndaǵy ınfraqurylymdyq jáne kadrlyq saıasatty qaıta qaraý qarastyrylǵan. Jeke jáne sheteldik ınvestısııalar tartý, jeke-memlekettik áriptestikti damytýǵa, ǵylym men medısınalyq bilimdi jetildirýge mán berilmek», - dedi mınıstr.
Salanyń jetistigin qamtamasyz etý úshin onyń qarjylyq turaqtyǵyn qamtamasyz etý kerek. Sondyqtan tórtinshi bastama retinde qarjylandyrýdyń ońtaıly júıesin qalyptastyrý mindeti qoıylyp otyr.
Sonymen qatar:Stasıonarlyq kómekti paıdalanýdy azaıtý, Ozyq medısınalyq transfertterdi engizýge yntalandyrý, Bastapqy medısınalyq-sanıtarlyq kómek bıýdjetin qajettilikterge qaraı bólý, Tarıfterdi negizgi qorlardy, kapıtaldyq shyǵyndardy, medısınalyq jáne aqparattyq tehnologııalarǵa qyzmet kórsetýge ketetin shyǵyndardy, qarjylyq qyzmetterdiń shynaıy shyǵyndaryn esepke ala otyryp qaıta qaraý qarastyrylǵan.
«Besinshi bastama – pasıentke esep beretin jáne transparentti júıe qalyptastyrý. Osyǵan baılanysty medısınalyq mekemelerge sharýashylyq júrgizý quqyn berip, korporatıvti basqarý engizý, medısınalyq qyzmet kórsetýshilerge KPI engizý, qyzmet kórsetý sapasy men tıimdiligin pasıenttiń múddesine baǵyttaý josparlanǵan. Túpki maqsat – medısınalyq qyzmettiń halyqqa qoljetimdiligi men sapasyn qamtamasyz etý bolyp tabylady», - dedi E.Birtanov.
